زبدةالاشعار

نقل ایلیور بو صحبتی مجلسی صاحب بحار #فاطمیه_انور_اردبیلی

در مدح امّ الائمّه(س)
.
✍️ زبدة الاشعار ✍️
.
🆔: @nohe_torki
.
مرحوم #انور_اردبیلی
.
نقل ایلیور بو صحبتی مجلسی صاحب بحار
هر سوزی مجلسی یازوب پایهٔ اعتباری وار
عالم نامداردور صاحب شأن و افتخار
غبطه محدّثین ائدر دفتر ارج دارینه
رحمت حیّ لم یزل روح بزرگوارینه
.
.
بیر گونی آدم صفی چهره ی صنع وحدتی
صاحب آفرینشون یعنی نمونه صنعتی
حضرت جبرئیلیله گردش ائدوردی جنتی
باغ بهشت انورون والهیدی صفاسینه
دقت ائدوردی بیر به بیر قصرلرون نماسینه
.
.
گزدی بهشتی بیر گوزل قصریله اولدی روبرو
گوردی عجیب طرزیله زینت ائدوبدی ذات هو
روح الامینه کشف ائدوب گورملی بیر بنادی بو
هرکیمون اولسا طالع بختی عجب خجسته دور
ایسته دی مدخله کچه درگهی گوردی بسته دور
.
.
حضرت بوالبشر دئدی حامل پیک رحمته
درگهی بو عمارتون باغلی قالوب نه علته
اولسا اجازه قفلین آچ داخل اولاخ عمارته
صحنده کی مناظرین چشمه لرینده دید ائدک
غرفه لرین اطاقلارین فرشلرین گوروب گئدک
.
.
صادر ائدوبدی امرینی خالق مالک الرقاب
خازن جنت نعیم آدمه ائتدی فتح باب
داخل اولوب عمارته بوالبشر اولدی کامیاب
روح الامین او قصرده آدمه اولدی رهنما
مرتبه مرتبه چیخوب وارد اولوب اطاقلارا
.
.
بیر اطاقا یتیشدیلر آدمی سالدی حیرته
گوزلری دوشدی نوریدن هیکل و قد و قامته
گوردیله بیر گوزل خانم جلوه سی واردی جنته
حُسن جمال اقدسی زینت عدن جان فزا
طاق جبین انوری مطلع نور کبریا
.
.
قدرت ال قویوب اونون باشینه تاج ارجدار
گردنینه آسوبدی بیر عقد ثمین و شاهکار
صاق قولاقیندا وار یاشیل رنگینده حلقه گوشوار
صول قولاقیندا قرمزی رنگیده گوشواره سی
ایلور او گوشواریه غبطه گویون ستاره سی
.
.
آدم بوالبشر ائدوب روح الامینیدن سوال
کیمدی بو محترم دوتوب ذاتینی ذات ذوالجلال
گلدی بیانه جبرئیل قیلدی بو طرزیلن مقال
چرخ جلالتون بودور سویلدی روشن اولدوزی
لم یزلون حبیبه سی ختم پیمبرون قیزی
.
.
الله اونی عزیز ائدوب مدحتینه یوخ احتیاج
فاطمه دور گوزل آدی مجلس عصمته سراج
ختم رسل نشانی دور باشینه قویدوقی او تاج
مرتضوی علامتی آسدوقی طوق گردنی
زوج بتول دور وئرر بزم ولایه روشنی
.
.
صاق قولاقندا گورسنور رنگی یاشیل او گوشوار
اوغلی حسندی مسند صلحده میر نامدار
صول قولاقیندا که حسین اوغلیدی چوخ بلاسی وار
گوزلریم حسرتینده دور واردی شیرین سوزوم اونا
گلسه جهانه هرزمان من لَلییَم ئوزوم اونا
.
.
بیر آنا زینتی دئدی بو ایکی گوشواره دور
یعنی ایکی گوزل بالا دوغماقینا اشاره دور
هر ایکی نازنین بالا بیر فلکه ستاره دور
حیرته سالدی آدمی توسن فکری لنگدور
شرح ائله گوشواره لر بس نیه رنگ رنگیدور
.
.
گلدی بیانه جبرئیل مطلبی ایلدی علن
لوحده گورموشم دئدی ثبته یتوبدی بو سخن
رنگی یاشیل نما اولور زهریله جان وئرور حسن
آسمش او گوشواره که فاطمه صاق قولاقینه
بنذری واردی اوغلونون پارچالانان دوداقینه
.
.
قرمزی گوشواره دور قرمزی قان علامتی
آخر وقت حسینینون قان اولاجاقدی خلعتی
اهل بهشتی سربسر آغلاداجاق شهادتی
فاطمه نون گوزل گلی پرپر اولار چمنده گل
باشی آچوق ایاق یالین جدّی گلنده سنده گل
.
.
من ایکی یول ئوزوم گرک خادم جان نثار اولام
خدمت ائدم او سروره صاحب افتخار اولام
یوم ولادتینده هم قتلگهینده یار اولام
فاطمه دن اولان گونی عشقیله لای لای دییم
بیرده دوشنده مقتله کرب و بلاده وای دییم
.
.
چرخ زمانه الغرض سرعتیله ائدوب مدار
ماه محرّمون اونی وحشته دوشدی روزگار
عصر زمانی نینوا تیتردی مثل گاهوار
شدت درد و غم سالوب بحرلری تلاطمه
خانه ی زینیدن یره دوشدی عزیز فاطمه
.
.
قانیله دستمازینی آلدی نمازون عاشقی
قیلدی نماز حاجتی راز و نیازون عاشقی
سوز و گدازه باشلادی سوز و گدازون عاشقی
اوغلی ئولن حسین سنون جاندا سنوندی ربنا
یاره لی قلبیدن آخان قاندا سنوندی ربنا
.
.
مرتبه ی فنا منیم حمد ائدورم بقا سنون
غصه منیم بلا منیم درد منیم دوا سنون
قانه بویانمش ال منیم دامن کبریا سنون
قانینه غوطه ور اولان تشنه کمکلریم سنون
خیمه لریمده قورخولی قاره لچکلریم سنون
.
.
کچمیشم هر ندن نه بیر یاور و یولداشیم قالور
باجیلاریم قرا سالوب باشه نه قارداشیم قالور
تحفه فقط حضوروه بیر یارالی باشیم قالور
کاش بو باشدا تز چیخا نیزه نون اوستت دینجلیم
زحمت عمری قورتارام مجلس وصله تز گلیم
.
.
آیه ی بیّناتوون واردی صریح عبارتی
وئرمسون اهل دعوته وعده ی استجابتی
یاره لیم سخلمیشام درگهوه بو ساعتی
وار سنه بیرجه حاجتیم کرببلاده چوخ دئمه
شیعه لرون نجاتینه روز جزاده یوخ دئمه
.
.
قانه باتان دوداقلارون اولدی دعاسی مستجاب
ساحت حقیدن یتوب روح الامینه بو خطاب
تنگه سالوب حبیبیمون اوغلونی سوز آفتاب
ایله نزول چتر تک جسمینه آچ قنادوی
خدمت ائله حسینیمه دفتره یازدیر آدوی
.
.
عرشیدن اندی جبرئیل کرب و بلا مناسینه
شهپرین آچدی چتر تک قتلگهون فضاسینه
سایه سالوب او سرورون سینه سینون یاراسینه
کولگه صفاسینی حسین گوردی او تنگ مرحله
بیلدی که جبرئیلیدور شهپر آچوبدی مقتله
.
.
یار قدیمسن دئدی واردی ثبات خدمتون
لازم امتناندور حرمتون حسن نیتون
دردیمه ایلمز دوا ذره بو یرده نصرتون
کولگه ده حل اولان دگل مشکل ابتلای عشق
عشق طبیبی حقیدور اوندادی تک دوای عشق
.
.
گون نقدر حرارتین آرتورا حدّت ایلیه
ذره لریندن اود توکه سوزشی شدت ایلیه
قان قوریا سزیلدیا یاره م اذیت ایلیه
سوز دئمیشم من عاشقم عهدیمون اوسته من وارام
یاریمی ترک ائدوب سنون سایوه دالدالانمارام
.
.
صبح ازل نسیمیم سایه رحمتم ئوزوم
محفل عشقدور بو یر یاری گورور منیم گوزوم
عشق ائوی سایه ایستمز ایستیه من گرک دوزوم
سیر ائله ئوز مقاموه شأنیله افتخاریله
مجلسی خلوت ائتمیشم قوم دانیشوم نیگاریله
.
#فاطمیه_مدح
#فاطمیه_شهادت
#نقل_ایلیور_بو_صحبتی_مجلسی_صاحب_بحار
#حماسه_شهدا_انور
#ترکی
.
✍️ #زبدةالاشعار✍️
.
🆔: @nohe_torki

متن پیشنهادی:  باد صبا گئت وئر خبر موسی الرضایه #حضرت_معصومه_محمدرضاصادقی

نظر دهید

جستجو در نام شاعر یا مناسبت

Search
Generic filters
Exact matches only
Filter by Custom Post Type

کلمات کلیدی: فهرستاشعار14معصومموضوععاشورائیانماهشاعراصفهانیتبریزیاردبیلیزنجانی

جستجو در مصرع اول

Search
Generic filters

Filter by Custom Post Type

دسته بندی درختی

دسته بندی درختی