نه طوفاندان هراس ایلر علی اوغلی نه یئللردن #عباسیه_مصیبی_تبریزی

« رجز قمرمنیربنی هاشم درمیدان نبرد »
.
.
.
مصیبی تبریزی
.
.
نه طوفاندان هراس ایلر علی اوغلی نه یئللردن
نه خم قاشه یتر گردآب غارتدن نه سئللردن
.
نه ایلر واهمه قانین توکنلردن بو صحراده
نه قورخارتیغ وخنجردن نه لشکردن نه ائللردن
.
ابوالفضلین سیز ای لشگر یادیزدا ساخلیون آدون
بو آد بیر آددی دوشمز تا قیام حشر دیللردن
.
هدف معراج عشق اولساگرک جان بسله سین عاشق
کسیلسون قول،یاریلسون باش،سوزولسون قانی تئللردن
.
حسینون سربه داری لشکر عشقین علمداری
نه خوف ایلر حیاسیز کوفه اهلیندن ؛ دغللردن
.
مگر دریای قهر و غیرتین موج خروشانی
هراس ایلر سو آلتیندا خزف لردن خزل لردن
.
او کس کی اَشهَدُ انُّ عَلی نی سسلنور دلدن
گوزون ئورتر مگر حَیَّ علیَ خَیرِالعَمَللردن
.
علی نین شیردل ضرغامی الده تیغ صمصامی
ئولوب یا شرحه شرحه اولسادا قاچماز اجللردن
.
جوشار قان چشمه سی عباس آتلانسا بو صحراده
دولار میدان قَتَل لردن قوپار طوفان جَبَل لردن
.
ئورک کیم وئرسه زهرایه حسینه زینبه ؛ والله
نه بیم ایلر کشاکشدن نه رهزن دن نه یَللردن
.
چوخوز صفّینده شاهد اولوبسوز جنگ عباسه
ووروب شمشیری باشلاردان چیخوب امّا کفللردن
.
بورونسه شعلۀ جوّاله عباسین اجل تیغی
چیخار آتشفشان داغلاردا داشلاردان گُسَل لردن
.
ابوالفضلین اگر کیم ضرب شستین گورمیوب؛آلسون
عرب شعرینده تصویرین ؛ رجزلردن ، غزللردن
.
او شمشیری که ضرب تیغی داشدان دگسه؛خورد ایلر
سالار طوفان، جوشار القان،او ضربتدن او چوللردن
.
او شمشیری که برق ضربتیندن قان یاغار گوزدن
چکللر شیهه آتلار ، نعره لر قالخار جَمللردن
.
بو خنجر گلسه جولانه بیچر باشلار کسر قوللار
کی کثرت توپراقا دوشسون فقط قالسون اقل لردن
.
بو جرات بو شجاعت بو جسارت تا دم محشر
نه دیللردن دوشر نه حذف اولار ضرب المثل لردن
.
نه تک عباس ، اکبرلر سالوبلار اود بو صحرایه
شهامتدن دیوب قاسملر اَحلی مِن عَسَل لردن
.
اجازه شه دن اولسیدی بو صحرا محشر اولموشدی
جهانه فاش اولاردی اصل یل یل لر بدللردن
.
«مُصَیب»هرنه درگه دن یوزون دوندرسه ، واللهی
چویورمز یوز بو درگهدن الین اوزمز بو اللردن

.
.
#عباسیه_مصیبی_تبریزی #عباسیه_شجاعت #ترکی #زبدةالاشعار