حالات حضرت زهرا(س) بعد از شهادت پدر
.
مرحوم عابد تبریزی
.
هدایتین گونی چون کسدی کوندن اشراق
جهانی چولقادی ظلمات کفر و بغض و نفاق
.
بسیط فرش مطبّق دولوب نوائیله
فغان و نالیه گلدی سپهر نیلی طاق
.
هدایت اهلینی بو غمده ائتدی خاک نشین
جفای گنبد فیروزه رنگ پست رواق
.
جهان سراچۀ اندوه آدیله آدلاندی
نبی اکرمه تا اولدی باغ خلد وثاق
.
نه تک جهان هامی دنیای خلقت اولدی ملول
بو جانگداز بلا کونه تاپدی استغراق
.
هدایت امرینی قورتاردی گئتدی دنیادن
او نفس هادی موسی و آدم و اسحاق
.
او سیر اولدی جهاندان ز بس گوروب آزار
هنوز اهل وفا و وفا اونا مشتاق
.
معاندینین اولوب منتهای کامی روا
محبّلر اورگین اودلادی شرار فراق
.
دوباره اولدی قدیمی عنادلر ظاهر
قیریلدی زور تعصّبله رشتۀ میثاق
.
وصیّت نبوی ترک اولوندی دست به دست
نظام جامعۀ دینی پوزدی اهل شقاق
.
بنای ظلم و تعدّی قویوب منافق لر
اساس مذهبی یخماخلیقا ائدیبله وفاق
.
عرب تعصّب ذاتی سین ایلیوب ظاهر
کهن رسوم اولوب تازه بدعته الحاق
.
کراهتیله صنم ترکین ایلین کسلر
صحیفۀ دله عکس بت ایلیوب الصاق
.
قوروبلا حلقۀ بیداد و کینه تا اولسون
کتاب شرع و دیانت او جمعیله اوراق
.
خلیفه ائتدیله بیر استقاله جو شخصی
بو شرّ محضه نفاق اهلی ایلیوبله تفاق
.
ابو قحافه نین اوغلی قمیص اخذ ایلدی
خلافت امرینی ظلماً نه روی استحقاق
.
بیله بیله که علی نسبتین خلافتله
همان تناسب قطب و رَحی ائدیب خلاق
.
هوانی ایلدی مسموم زهرگین انفاس
آزیبدی یولدان ائدن بو هوانی استنشاق
.
علینی خانه نشین ائتدی خانه ویرانلار
مه سپهر هدایت تاپیبدی حال محاق
.
گلیبدی جلوه یه شب تاب کرم لر گورجک
هدایتین گونی آفاقیدن کسیب اشراق
.
.
.
هامی محبّلرین قلبینی غم ائتدی کباب
خصوص فاطمه نی غصّه ایلدی بی تاب
.
.
.
صفای گلشن دین نزهت بهشت ولا
بهای گوهر عصمت چکیدۀ تقوی
.
یگانه خاطرۀ زنده نفس طاهادن
هامی مراتب فضل و کمالیده یکتا
.
حیا خزینۀ مخفی او کنزه بو گوهر
عفاف مشعل روشن او مشعله بو ضیا
.
بسیط خاکیده محدود شاهد قدسی
نجه که ضیق عبارتده وسعت معنا
.
حیا تجسّمی عصمت مثالی دین شرحی
وفا ثبوتی صفا شکلی صبر و سلمه رضا
.
بهشت جلوه و حورا سرشت امّا نه
بتول و فاطمه بس نه بهشت نه حورا
.
رکوعینه متذلّل عناصر علوی
سجودینه متواضع صوامع عُلیا
.
نفس حصاره دوشور سینۀ ملائکده
ایدنده زمزمۀ لاشریک له زهرا
.
حریم سایه سینه دورباش عصمتدن
نفوذ اولموب ائده نور مشعل بیضا
.
او مه یوزون عظمت هاله سی ائله بورویوب
که یوخ تصوّر معنایه فکریده یارا
.
بو آرزوئیله سرگشته دور نسیم جنان
که خاک کویون ائده کحل دیدۀ حورا
.
دوتاندا اوز گویه وجّهت نغمه سی دلده
دئیب خلوصینه سکّان عرش آمنّا
.
گل بهشت وئریب باش کویر غبراده
مگر که آرتیرا بو شوره زاره ذوق و صفا
.
سموم حادثه اسدی ولیک گلشنینه
قرار و طاقتینی دلدن ایلدی یغما
.
بهار ابری کیمی دولدی حق گورن گوزلر
شقایق اوسته نثار ائتدی لوءلوء لالا
.
بهاری اولدی خزان رحلت پیمبردن
ایشقلی گوندوزونی ائتدی غم شب یلدا
.
آتا فراقی گتیردی اونی ائله درده
که مونسی گئجه گوندوز اولوب فغان و نوا
.
ائله سیزیلدادی دلدن آتا فراقینده
که گلدی ناله و فریاده صخرۀ صمّا
.
آتاسی چکدیقی زحمتلری خیاله سالیب
اولوردی صبح و مسا ورد و ذکری وا ابتا
.
اوجالدی شیون و فریادی شهر یثربدن
بتول ناله سی شور قیامت ائتدی بپا
.
.
.
عدو جفاسی نبی فرقتی علی مُحَنی
گتیردی نی کیمی فریاده قلب فاطمه نی
.
.
.
پیمبرین قیزی شاه ولایته همدم
حریم عصمتینه چشم ماه نامحرم
.
هامی خلایقه مختومه اوج رتبتدن
هامی عوالم امکان ولاسینه ملزم
.
نه تک وجودی اولوب فخر دودۀ طاها
که اولموش اونلا مباهی سلالۀ آدم
.
ائله سخیلدی مصائبده قلب آگاهی
که ائتدی اشک روان چشمه سار چشمینی یم
.
گنه یتوب او مصائب بویوردی تلویحاً
اولور گونوزلره یتسه لیالی مظلم
.
حدیث غصب فدک ماجرای سقط جنین
بتولی چکدی بلا دامینه قدم به قدم
.
وریبلا مهبط تنزیل و وحیه آتش کین
اولوبدی صدمۀ مسمار زخمینه مرهم
.
بنای دهر عجبدور که اولمادی فانی
یاناندا ظلمیله درگاه میر حلّ و حرم
.
ائدیب صحیفۀ جسمینده نیلگون خطله
عدو جفاسینی دست سیاط ظلم رقم
.
ویرنده غسلینی لمس ایلدی او خطّی علی
نلر حکایت ایدوب بیلمم اول خط مبهم
.
که شیر داوری آغلاتدی هایهائیله
حیاتیدن اولوب آزرده امام امم
.
آچاندا ظلم الی ناموس کردگاره عدو
نه حاله قالدی علی یازماقا خجلدی قلم
.
امام کون و مکان لنگر زمین و زمان
ائدن مبانی اسلامی تیغیله محکم
.
گورنده گلبن عصمت اسیردور خاره
او باغبان ولا چشمی اولدی پر شبنم
.
او خاری صاعقه تک یاندیراردی شعلۀ تیغ
وقایه اولدی ولی امر سیّد اکرم
.
دایاندی لیک نه اوز ویردی غیرت اللهه
اوزی بیلیبدی فقط بیرده خالق عالم
.
او شمع خلوت عصمتدن آلدی جلوه دئمم
چراغ دیدۀ تاریک قوم ظلم شیم
.
محالدور گوره آیات حق دقایقینی
او گوز که پرده چکیب نورینه غشای ظلم
.
دئمه او عارضی نامحرمین گوزی گوردی
عفاف پردۀ ذاتی دی عصمته منضم
.
جمال آینۀ حق جلا و جلوه سینی
شوائب نظر باطل ایلمز برهم
.
.
.
گونه دقیق اولانون تار اولار جهان گوزونه
شعاعیله ویرار اوخ مهر آسمان گوزونه
.
.
.
زهی او نخله که تقدیر خالق ذوالمن
پیمبرین قیزینا ائتدی سایه سین مأمن
.
جمال حقّه اولان نور دیده تابش ائدیب
او نخلی ایلدی چون نخل وادی ایمن
.
ائدیب دی سنبله برجینده زهره منزلگاه
درخت سایه سینی نوری ایلدی روشن
.
نجه که سایۀ طوباده حور ایدر منزل
او رشگ حور ائدیب نخله سایه سین مسکن
.
سپیده جیب افقدن وئریبدی باش گویا
قمردی یا دوزولوب دوره سینده عقد پرن
.
نجه که غزوۀ خیبرده تکیه گاه اولدی
آتاسینا او مبارک درخت سایه فکن
.
بتوله ده بو برومند نخله سایه سالیب
که رنجه اولمیا گوندن او رنجدیده بدن
.
جفای خلقدن آزرده دل پریشان حال
کناره ایلدی یثربدن اهل یثربدن
.
ائوینده آغلاماقا قویمادی منافق لر
بقیعی ایلدی ناچار فاطمه مسکن
.
مدینه یوسفینون فرقتینده چون یعقوب
نوای وا اسفا دلده قوردی بیت حزن
.
صباح اولاندا قویاردی بقیعه اوز هر گون
یانیندا گوزلرینین جلوه سی حسین و حسن
.
او نخله نین هر اوچی سایه سینده دالدالانیب
غروب اولونجا ایدردی آتاسینا شیون
.
سیزیلتیسی گتیرردی فغانه دشت و دری
اولاردی ناله سینه همنوا تِلال و دمن
.
او آز زمان که بویورموشدی سیّد ثقلین
ائدنده امر حقیله وداع دیر کهن
.
خیال ائدردی خدایا نه وقت باشه یتر
رها اولام بو هامی محنت و بلادن من
.
بو عادتیله اولوبدور بیر آز زمان سپری
بنای ظلم دگر قویدی کینۀ دشمن
.
یخیلدی مأمن زهرا بقیعده ناگاه
او نخلی ریشه کن ایلوبله اشقیای زمن
.
بیلنمیرم که ائدیب هانسی دل بو ظلمی قبول
حقیقتاً او اؤرک سخت تردی یا آهن
.
بیلنمیرم نجه انصاف ائدیب بو ظلمی ایدن
او روح صاحبی انساندی یا که اهریمن
.
گلیبدی عادت معهودیله گینه بیر گون
گوروب بتول ایاقدان دوشوب او نخل کهن
.
.
.
قالوبدی گونلر ائوینده او سایه پرور ناز
ایدردی نالۀ جانسوزه دلده سوز و گداز
.
.
.
تاپیب وقوف علی ظلم قوم عدوانه
سالیب بو کینه شرر قلب شاه مردانه
.
گوروب که یاندیریری تاب آفتاب حرور
او گللری که صفادور ریاض ایمانه
.
حسینیله حسنین عارضی سولوب گل تک
اسوب سموم خزان گوئیا گلستانه
.
حجاز ایستیسی گون سوزی تاب فرسادور
چیتندی صبر ائلیه بیر هوای سوزانه
.
بنای کونه اولان علّت دوام و بقا
قیام ایلدی بنای بیت الاحزانه
.
پیمبرین قیزی بیت الحزن نشین اولدی
نسیم صبح خبر ایله پیر کنعانه
.
اساس شیون او یرده بتول ائدیب برپا
آتاسی ختم رسالت حبیب سبحانه
.
تمام ماخلق الله مستعد نوا
پیمبر عربی شهریار امکانه
.
بتول ناله سی انگیزۀ نوا اولدی
تمام انفس و آفاق گلدی افغانه
.
دل آچدی نالیه ذرّات عالم هستی
شهود و غیب رسوله اولوب عزاخانه
.
دیینده فاطمه سوز دلیله وا ابتا
اولوبدی جنّ و ملک هم صدا او نالانه
.
یری گویی بورویوب وا محمّدا شوری
نفوذ ایدوبدی حریم ریاض رضوانه
.
ولی مشخّصیدی فاطمه دیین دیللر
سالاردی سوز بیانیله شعله هر جانه
.
فضاده موج ویریر ایندیده او ناله سسی
یانار شرارینه هر آشنا و بیگانه
.
سن ای چراغ هدایت نه تئز خموش اولدون
که اولدی ظلمت غم چیره سطح کیهانه
.
سن ای خطاب لعمرک مخاطبی دؤزدون
زبسکه کینۀ اشرار سست پیمانه
.
دویوب حیاتیدن ائتدون جهانی ترک ولی
قیزون مصادف اولوب نائبات دورانه
.
قاپیم یانوب بالام اولدی شهید ظلمیله
فلک عم اوغلومی مقهور ائتدی دونانه
.
تظلّم ایلدی پیغمبره ایکی خاتون
بیری مدینه ده زهرا او شاهه ریحانه
.
بیریده قتلگه کربلاده زینبیدی
دوشنده گوزلری نعش امیر عطشانه
.
.
.
مدینه سمتینه اوز دوتدی دلده آتش آه
یانان دلیله ندا ائتدی یا رسول الله
.
.
.
بو جسمی قانینه غلطان سنون حسینوندور
یر اوزره پیکری عریان سنون حسینوندور
.
بو گل بدن که اولوب نیش خار ظلمیله
شکفته گل کیمی خندان سنون حسینوندور
.
بو بحر فیض الهی که سو کنارینده
وئریبدی تشنه جگر جان سنون حسینوندور
.
بو شاه کشور امکان که کهنه پیرهنین
سویوبلا فرقۀ عدوان سنون حسینوندور
.
بو قان خسوفه که دوشموش ولا سپهرینده
جمالی ماه درخشان سنون حسینوندور
.
بو تشنه کام که اولسون آتام آنام اونا قربان
اولان حقیقته قربان سنون حسینوندور
.
بو سو یانیندا باتان قانه یا رسول الله
یارالی بیکس و عطشان سنون حسینوندور
.
بو جسمی مصحف منزل کیمی اولان اوراق
ایدن اشاعۀ قرآن سنون حسینوندور
.
بو یاره دن گل آچان جسمی صحن گلشن تک
صفای روضۀ رضوان سنون حسینوندور
.
بو پا فتادۀ بیداد اشقیای زمن
قوام عالم امکان سنون حسینوندور
.
سپس بقیع ده زهرا آناسین ائتدی ندا
آنا بو فدیۀ جانان سنون حسینوندور
.
ایدن بو عرصه گهی جسم زخمداریله
بهشت لاله و ریحان سنون حسینوندور
.
بو شعله رنگ فروغیله بزم قربه اولان
جمالی شمع شبستان سنون حسینوندور
.
بو اودلی قلبی اولان داغدار زینبدی
بو قانلی لالۀ نعمان سنون حسینوندور
.
بو فلک بحر هدایت که موج حادثه دن
اولوب شکستۀ طوفان سنون حسینوندور
.
بو قانلی لعلیله نوش ایلین عطش جامین
حریف محفل عرفان سنون حسینوندور
.
بو روح ختم رسل جان حیدر کرّار
منیم امیدیم آنا جان سنون حسینوندور
.
بو دعوت ازله شوقیله دیین لبیک
حریم قربده مهمان سنون حسینوندور
.
بو منتهای تواضعله توپراق اوسته یاتان
سریر عشقیده سلطان سنون حسینوندور
.
بو تشنه کامیله تسلیم جان ائدن که اولوب
زلال وصلیله ریّان سنون حسینوندور
.
.
.
دایان که سالدی شرر جانه «عابد» بو مقال
دوباره ائت گینه زهرا مصائبین دنبال
.
.
.
اولاندا اشک ترون عارضه روانه آنا
اؤرکده آتش حسرت چکر زبانه آنا
.
نه سرّی وار که کمان غم و مصیبتدن
نه اوخ رها اولوب ائتدی سنی نشانه آنا
.
او ال که جدّیم اؤپرمیش نولوب عطوفتله
چکیلمیری باشیما ایندی مثل شانه آنا
.
یوزون بو منزله خورشید وار سالماسا نور
باتار قرا گئجه تک ظلمته بو خانه آنا
.
سولوب او یوز که سولیدی جهان او سولمازدی
نجه سمومیدی اسدی بو گلستانه آنا
.
نه حالیدور گورورم اسسه باد پائیزی
بنفشه رنگی وئرر یوخسا ارغوانه آنا
.
توکولدی بسکه مصیبت او سرو قد رسا
سپهر قامتی تک بنزیری کمانه آنا
.
اؤرکده چوخدی سوزوم لیک دلده یوخدی توان
که دردیمی گتیرم بیر به بیر بیانه آنا
.
سنیله من ایکی شمعوخ که سن خموش اولوسان
ولیک یاندیراجاقدور منی زمانه آنا
.
بهاریدی سنیله آشیانه گلشنیدی
خزان یتیشدی خراب اولدی آشیانه آنا
.
یانور آتامدا غمونده نجه کی من یانورام
یاناندا سرو بلی اودلانار جوانه آنا
.
بهار قافله سی کوچ ائدیر بو گلشندن
دالینجا اشکیم اولور سیل تک روانه آنا
.
قیزون دئسین کیمه درد دلین مصائبده
گمانی یوخ داخی بیر اؤزگه همزبانه آنا
.
گورنده اشکیوی دل قان اولوبدی لعل کیمی
دوزولدی رشتۀ مژگانه دانه دانه آنا
.
او غم که شیر خدا قلبینین توانین آلوب
نئدر منیم کیمی رنجور و ناتوانه آنا
.
سن ای سپهر نبوّتده اختر تابان
خزینۀ شرفه گوهر یگانه آنا
.
هامی بلایه رضای خدا یولوندا دؤزوب
که اولدون اهل حقه اسوۀ جاودانه آنا
.
دؤزر قیزوندا سنون تک هامی مصائبده
اگر چه غنچه کیمی قلبی دؤنسه قانه آنا
.
بلا ولائله تواَمدی آگهم دؤزرم
هامی مصائبه حق اوسته عاشقانه آنا
.
شب دیانتی روشن گونوز ایدر صبریم
انیسیم اولسادا گر نالۀ شبانه آنا
.
.
.
بیان زینب اولوب شعله جان زهرایه
کمال رأفتیله دل آچیب تسلّایه
.
.
.
بو قدر شوره گلوب ایلمه نوا زینب
یارالی قلبیمه آهون ویرار یارا زینب
.
سرشگ چشمیوی دریا تک ائتمه طوفانی
سن ای سفینۀ محنتده ناخدا زینب
.
من آغلیرام سنیده گورسه اشکبار علی
باتار ملاله دل قلب ماسوا زینب
.
هامی مصائبه وار منتها ولیک سنون
غم و مصیبتیوه یوخدی انتها زینب
.
نقدر واردی جهان وار مصیبتون اثری
قیام حشره مقارندی ماجرا زینب
.
گورر اگر چه دوتوب اشک پرده سی گوزومی
ورای پرده نی مشهود و برملا زینب
.
فضای یثربی ترک ایلییبدی طائر فکر
که دلده وار هوس سیر کربلا زینب
.
نولور او قانلی بیاباندا گوزده جلوه لنیر
اولور مجسّم او احوال جابجا زینب
.
گورورم اوغلومی مخیمدن آیریلیر اما
خیَمده محشر کبری اولوب بپا زینب
.
سوسوز یارالی اوغولسوز قالان غریب اوغلوم
نداسی دلده اولوب هر نفسده یا زینب
.
حسین معنی وجه بقای مطلق حق
اولوبدی جذبۀ توحیدیده فنا زینب
.
هامی عوالمی گوزدن آتیب او عالمده
باشیندا شور ضیافتگه لقا زینب
.
گلیر مشامه شمیم وفا و عشق مگر
گذر او دشت بلادن ائدیب صبا زینب
.
او دشتیده توکولن قانیله تاپار مطلق
بهار گلشن دین نزهت و صفا زینب
.
سنیده بیر ائله عشقیله ترک ائدر اوغلوم
بو اقتضانی ائدیب لطف آشنا زینب
.
توکر او قانی جفائیله توپراقا دشمن
ایکی جهان اونا اولماز اولا بها زینب
.
اولان علاقۀ عشق و وفاده سلسله بند
تعلّقاتیدن ایستر اولا رها زینب
.
نه تک عیالینی راه وفاده ترک ایلر
که گوزده محو اولی بالمرّه ماسوا زینب
.
جهان دنائتین اثبات ائتماقا اوغلوم
او کهنه پیرهنه ایلر اکتفا زینب
.
طنین نغمۀ تکبیری گوش جان آلیری
دوتوب حسین سسی کونی گوئیا زینب
.
.
.
بلی حسینیله حق کلمه سی جهانی دوتار
ندای رحمت حق جمله ماسوانی دوتار
.
.
.
یاخینلاشوبدی خسوف مه سپهر ولا
اولوبدی شمس هدایت گونی شب یلدا
.
.
.
گورنده حق گوزی پژمرده حال زهرانی
عذاره اولدی روان سیل اشک مرجانی
.
دل آچدی هر دله سرمایه بخش نطق و بیان
کلامی مایۀ تکلیم پور عمرانی
.
مخاطب ایلدی ترکیب صدق مصداقین
دانیشدیروب گل شاداب باغ طاهانی
.
سن ای سرادق عصمتده شاهد قدسی
که روشن ایلمیسن بزمگاه عرفانی
.
نه گوردون ای گوزی حق جلوه سیله روشن اولان
که گرم خواب ایلدون چشم مست شهلانی
.
نه گوردی گوزلرون ای گوزلرون فداسی جهان
که ایستمز داخی بیرده گوره بو دنیانی
.
نولوب فروغیوی بیر اختر یمانی تک
دوتوب کدورت ابر سیاه ظلمانی
.
نیه دانشمیسان ای نطقی روح جاویدان
نه غم خموش ائدوب اول لعل گوهر افشانی
.
گل آفتابیله بارانیله شکفته اولار
توکر گوزوم اودی رخساره اشک بارانی
.
ولی آچیلمیری بو گل کیمی سولان رخسار
گوروب ز بس ستم برگ ریز دورانی
.
نولور خرام ائده سن بیرده سرو قامتیوه
نثار ائدم گل سوری و یاس و مینانی
.
چراغ محفلیم ای نور بزمگاه امید
سن اولماسان اولی دل شمع آه سوزانی
.
ایشیق گونوم شب یلدا اولور ائدنده خیال
فراق گونلرینی روزگار هجرانی
.
مناظر دله مجذوب سن که ایستمیسن
گوزون گوره بو بلاخیز دار ویرانی
.
زجاج نور الهی سینیب او دم که جفا
مکدّر ایلدی بو چهرۀ مصفّانی
.
اوزونده نقش بهار و خزان اولوب ترسیم
ائدر حکایت ایکی حالت گلستانی
.
بیری بنفشه و نیلوفری نشان وئریری
بیری خزان زده اوراق برگ ریزانی
.
تحمّل ایلدون الله رضاسینه بیلیرم
کمال شوقیله هر محنت و بلایانی
.
شرار قلبیوی تا عالمه نشان ویرسین
یانان اؤرک له دوتار لاله لر بیابانی
.
سکوتون آرتیری قلبمین شراره سینی
جواب ویر سسیمه فاطمه علی جانی
.
.
.
بو سوزده آچدی گوزون عالمین گوزی آرام
گوروب دوروبدی باشی اوسته کایناته امام
.
.
.
سروش نغمه سی ذرّات جسمه وئردی توان
عروقه جوهر سیّاله تک اولوبدی روان
.
صفیر طایر قدس آشیان طنینیندن
ائشیتدی آیت رحمت حبیبۀ دوران
.
آلیبدی عطر علینی بتول او وقتیده کیم
مشامینه یتیشردی شمیم باغ جنان
.
بو عطر جذبه سینه گئچدی خلدیدن یعنی
علی لقاسینه قرباندی روضۀ رضوان
.
نظاره ایلدی چوخ اشتیاقیله یوزونه
مگر اولا بو تماشا ذخیرۀ هجران
.
ایشقلانیب گوزی گوردوقجا عارضین که ائدر
فروغ دیده نی افزون تلاوت قرآن
.
بو سیر و جذبه ده ناگاه زهرۀ زهرا
گوروب صحیفۀ بدر اوسته انجم رخشان
.
علیدی آغلیری ایوای باشیم اوستونده
دولوبدی دردیله قلب عوالم امکان
.
بو اشک اود کیمی یاندیردی قلب فاطمه نی
گوزونده خون جگر موجی ایلدی طغیان
.
شکفته لندی او خاموش غنچه صحبتیله
گوروبدی مایۀ الهامین آچدی نطقه زبان
.
سن ای قلمرو خلقتده صاحب اورنگ
سن ای سریر امامتده والی و سلطان
.
امام مفترض الطّاعه سن منه بیلیسن
نیاز یوخ داخی طرح اولسون اؤزگه بیر عنوان
.
بو مدّتی که منه فیض وئردی دیدارون
یوزونده سیر ایلدیم نور جذبۀ عرفان
.
نقدر لطف و صفا وار جهان خلقتده
تمامینی منه ائتمیشدی سنله حق احسان
.
سنیله دلخوشودیم شدّت مصائبده
عنایتون منه ایلردی هر غمی آسان
.
ولیک حیف اولا عمروم یتیشدی پایانه
آیردی جبریله سندن منی جفای زمان
.
بودور غمیم کیم اولار دردیوه شریک سنون
هجوم ائدنده فشار شداید دوران
.
عم اوغلی سن کیمی مظلوم اولان بو دنیاده
محالدور که گوره دور گنبد گردان
.
نجه روادی که ظلمیله حجّت اللهه
بو وسعتیله جهانی عدو ائده زندان
.
عجبدی ئولمدی زهرا او گون که جبریله
چکیلدی بیعتینه کفر مطلقین ایمان
.
.
.
بو خاطرات اؤرکدن آلیبدی طاقت و توش
علی باخا باخا یومدی گوزون اولوب خاموش
.
.
.
علی او حکمتی نافذ امور تقدیره
ویرردی غسل مفاد بیان تطهیره
.
سپردی درّ عدن ابر چشم گوهربار
ائدردی خون جگر آبشار دیده نثار
.
بتول غسلینه اشک علی سزادی بلی
یووار بنفشنه نی شبنمله چشم ابر بهار
.
قرا گئجه هامی آفاقی تیره پوش ائتیمش
باتوبدی پردۀ ظلمتده ثابت و سیار
.
سپهر عصمتی غم ایلیوبدی ابر آلود
جمال آینۀ عفّتی دوتوب زنگار
.
او پاک گوهری تغسیل ائدر علی که یته
وقوعه امر خداوند قادر و قهّار
.
و گرنه مظهر طهره لزوم یوخ غسله
که آبرو ائدر افزون سویا دُر شهوار
.
اولوب عیان نظرینده گذشته خاطره لر
تاپوبلا شکل گوزینده هامی حقیقت وار
.
گوروب بتولی که شمع حریم وحدتیدی
ائدردی بیت امامتده منتشر انوار
.
غمینده همدمیدی محنتینده یاوریدی
تمام درد و غمین قلبیدن ائدردی کنار
.
اونیله خانۀ دل رشگ باغ جنتیدی
سرور و نوریدی صبح و مسا و لیل و نهار
.
ایدردی لطفی ریاحین عصمتی شاداب
صفاسی ائتمیشدی بیت وحدتی گلزار
.
تاپاردی لطف و صفا ارغوان و یاس و سمن
ائدردی بسکه بهار ابری تک سرشک نثار
.
ولیک تاپدی تحوّل او حالی ائتدی خزان
بهار فاطمه نی دور گنبد دوّار
.
وفات ختم رسالت دوشوبدی خاطرینه
که روز فاطمه اولدی او غمده لیلۀ تار
.
نه قدر غصه و غم قلبینه هجوم ایلیوب
قیاس و حصرینه دانادی ایزد دادار
.
دوشوبدی یادینه بیعت کشاکشی که او گون
پیمبرین قیزی “خلو ابن عمی” ائتدی شعار
.
یتنده بو یره افکاری بولمورم یارب
یتوبدی فاطمه غسلی هارا که گئتدی قرار
.
کنار اولوب یوزونی قویدی روی دیواره
چکوب سس آغلادی اول کان صبر و کوه وقار
.
سوروشدولار نه سبب اولدی آغلادون بویوروب
قویوب بو گلده جفا خاری ایله بیر آثار
.
که گر چه گورماقا امکانی یوخ او آثاری
ویرنده غسلونی ال لمس ائدوبدی بالاجبار
.
.
.
مکرّر ایلیری نوک قلم بو معنانی
یازیر بیر اؤزگه بیانیله غسل زهرانی
.
.
.
اولوبدی درّیله ترصیع خرمن سوسن
یتوب طراوته تقطیر شبنمیله سمن
.
دوزولدی جزع یمانی صدف صحیفه سینه
تلألؤ ائتدی گل مریم اوسته درّ عدن
.
ایکی فروغ تجلّی ائدیب او ظلماتی
مثلده لیلۀ طوریله وادی ایمن
.
سرشک قلب عوالمدن آغلادی هستی
عیون باکیه دنیانی ائتدی بحر محن
.
تموّج ایلدی تسنیم و سلسبیل و رحیق
که آبرو آلالار بلکه غسل فاطمه دن
.
ولیک برگ گله شستشو ازلدن اولوب
سرشک بلبل شوریده ایله مستحسن
.
اودور که اشک امامت وجود عصمتده
نجوم باهره تک تاپدی جلوۀ روشن
.
مشاعل فلکی ده سونوبله تکریما‌ً
که رنجه اولمیا روح حبیبۀ ذوالمن
.
صفا وئروب او گله گوز یاشیله چشم خدا
صفا تاپار بلی ابر آغلاسا بساط چمن
.
مباد جسمینی رنجور ائده هجوم سرشک
گله وقایه چو گلبرگ اولدی پیراهن
.
او طهر مطلقه تغسیل ایستیوب که اولا
رعایت سنن شرع انور و متقن
.
علیدی غسل ویرن جسم پاک زهرایه
دُر سرشکی تاپیب گونۀ عقیق یمن
.
بو غسله لازم اولوب لمس ائده او گل بدنی
غلاف غنچه ده ملموس اولوب گل سوسن
.
بو لمسده نه تداعی اولوب نه حس اولدی
که تازه لندی وضوحیله خاطرات کهن
.
شراره سالدی دل و جانه باد ظلم عدو
وئروب او ظلم اثری آتش دله دامن
.
چکیبدی غسل دن ال دست لم یزل ناچار
جمالی صفحۀ دیواره اولدی جلوه فکن
.
ائله فغانه گلیب آغلادی که معناده
تمام انفس و آفاق ایلدی شیون
.
دایان قلم داخی یازما که آز قالیر سالسین
شرار غم دله سبک بیان و طرز سخن
.
نه اوز ویریب دئماقا یوخدی تاب و توان
وداعینه او زمان که گلیب حسین و حسن
.
نه تک شرار غمه یاندی زینب و کلثوم
که وار یری دییم اودلاندی تار و پود کفن
.
خزان لهیبی بلی یاندیرار هامی چمنی
آلار طراوت نسرین و یاس و نسترنی
.
.
.
الهۀ ملکوت صفا مه محراب
خسوفه دوشدی عذارینده ابر تیره تراب
.
.
.
فراق فاطمه ده اولدی سوگوار اسلام
غمینده باتدی عزایه شرایع و احکام
.
مدینه نی گئجه غرق ایلمیشدی ظلماته
دوتار جهانی خسوفه ماه ظلام
.
ستاره لرده افول ائتدی موج ظلمتده
پیمبرین قیزینی قبره تاپشوراندا امام
.
سکوت محض اولوب کائناته مستولی
تمام انفس و آفاق غرقۀ اوهام
.
لسان حق دانیشور نه بیانیله یارب
ندن حکایت ائدیر لحن قول و طرز کلام
.
دل آچدی هر دله تقریر اعتباری ویرن
دانیشدی هر سوزه گفتاری منبع الهام
.
ائله دانیشدی که ذرّات کونی یاندیردی
ائله دانیشدی که هر نفس دن آلوبدی قوام
.
سن ای چراغ شبستان آرزو و امید
سن ای نهال گلستان آشنایی و کام
.
سن ای ریاض محبّتده سوری شاداب
سن ای حدائق عزّتده نخل سرو اندام
.
سن ای حریم امامتده شمع بزم مراد
سن ای جهان نبوّتده نور صبح مرام
.
سن ای ترانۀ عصمت لسان قدسیده
سن ای حمامۀ رحمت فراز عرش مقام
.
سن ای بهار امیدیم نه تئز خزان اولدون
نه تئز بو گلشنی سولدوردی چرخ ارزق فام
.
منه سراچۀ ظلمتدی بو جهان سنسیز
نجه که اولماسا گون تیره شام اولور ایّام
.
نجه حسین و حسن دردینه وئروم تخفیف
نه نوع زینب و کلثومی ایلیوم آرام
.
سنیله بیت امامتده هر صفا واریدی
قیریلدی رشتۀ الفت پوزولدی سبک نظام
.
نولوبدی قبریوون اوسته سنه سلام ایدورم
نوازش ائتموری جان گوشینی جواب سلام
.
کیمیله درد دل ایلوم فشار محنتده
کیمه دیوم سوزیمی ایلسه هجوم آلام
.
اؤرکدن آیریلوقون دردی زایل اولماز اولا
اگر چه عمریمون ادواریده تاپا اتمام
.
علی که خنده ویروب شدّت مهالکده
مصیبتونده توکر اشک صبح اولا یا شام
.
غمیم همیشه لیق اولدی مصیبتیم دائم
ملال و حزن مؤبّد فشار غصّه مدام
.
.
.
دانیشدی بسکه کنار مزار زهراده
گتوردی قبریده روح بتولی فریاده
.
.
.
سن ای تجلّی نور هدا روانیمده
سن ای نفوذ ولای الست جانیمده
.
سن ای ترشّح ابر عنایت ازلی
بنفشه و سمن و یاس و ارغوانیمده
.
سن ای سحرگه رحمت نسیم جان بخشی
شکوفه و گل و گلگشت و گلستانیمده
.
سن ای یگانه فروغ ستارۀ امید
شب سیه ده دل هفت آسمانیمده
.
سن ای حریم سویدای دلده صدر نشین
سن ای مکین امین بزم لامکانیمده
.
او اود که ویردیلا درگاه باجلالتوه
هنوز سوزشی وار مغز استخوانیمده
.
نه حاله قالدی او گون طایران گلشن قدس
که چکدی شعله جفا ناری آشیانیمده
.
بو درد شدّتینی آشنای درد بولر
نفوذ ایستدی بیگانه دودمانیمده
.
او لحظه که سنه بیر لحظه مین قیامت اولوب
نه چکدی دل دئماقا یوخ توان بیانیمده
.
ولایتونله ولی دل تاپاردی آرامش
یاناردی مشعل توحید خانمانیمده
.
نبرد حال حیاتیمده سن امیدیمدون
یوخ اؤزگه قبریده سندن صورا گمانیمده
.
نیاز اولمادی ائتسون سؤال امامتدن
فرشته گوردی آدون نقشینی زبانیمده
.
نقدر شرم ائدورم ائتمدی وفا عمریم
یتوب بهاریوه آفت منیم خزانیمده
.
چوخالدی غصّه و دردون عم اوغلی جان بولورم
یانار نهانیده قلبون غم نهانیمده
.
نه عمر باشه یتوب یتدی باشه عهد ولا
بو علقه ریشه سی وار جوهر روانیمده
.
ریاض خلده تماشایه احتیاجیم یوخ
که واردی نقش رخون چشم خونفشانیمده
.
بهار اولاندا ویرر لاله باش مزاریمدن
که شرح حال ایلسون نقل داستانیمده
.
یانار او حال جگر سوزه شاعریم «عابد»
نجه که اودلانی «فیروز» نوحه خوانیمده
.
ائده لّه اهل عزائیله ناله و فریاد
که بزم غم قورالار بلکه آستانیمده
.
.
.
.
#فاطمیه_فاطمیه_شهادت #ترکی #زبدةالاشعار #عابد_تبریزی
نظر دهید