همیشه شکر ایدرم کردگار یکتایه #فاطمیه_اسماعیل_زرین

در توحید
گریز به حالات #قیامت و شفاعت حضرت زهرا (س)
.
.
حاج اسماعیل زرّین
.
.
همیشه شکر ایدرم کردگار یکتایه
که خلق ایدوب بیزی لطفیله گتدی دنیایه
.
محبتی بیزی وادار ایدوب که خلق ایتدی
گتوردی احسن تقویمله سطح غبرایه
.
بو افتخاریدی خلق ایلیوب بیزی انسان
اوزوده ایلدی تحسین بو صنع زیبایه
.
که بیزلری هامی مخلوقیدن ایدوب ممتاز
گلن دگل بشرین امتیازی احصایه
.
تمام نعمته غرقوخ گر ایسته سن سایاسان
جهانیان گتورنمز شماره سین سایه
.
بولار تمامیسی الطاف حی یکتادور
بونوع سئیر وئروب شمس وانجم و آیه
.
قدیر و قادر و قیّوم و حیّ و بی انباز
غنیّ مطلق و یوخ احتیاجی همتایه
.
وجودی تک ولی تعدادیدن مبرّادور
حضوری واردی نه واقعدی جای و ماوایه
.
وجودی واردی – بو وارلیق دگول ولی حادث
نه واردی وارلیقنا فانی اولماقا پایه
.
اونون وجودینه حد و حدوده یوخ امکان
اگر حدود اولا- اوخشار بیر اوزگه اشیایه
.
نظرده گر اونی بیراوزگه شیء فرض ائده سن
اولار او شیء اوزی اوزگه خلق ائچون آیه
.
بونی بولاق ولی خالق دگل صفاته گلن
بیره یاخیندی نه مثل و قرین و همسایه
.
هامی خلایق اگر خالقین ائده تعریف
محالیدور قالارعاجز – آچار دلین لایه
.
عدالتی ائدوب ایجاب دوباره انسانی
دوتا گرامی هامی خلقدن بو معنایه
.
اوزون تانیدّیرا انسانه گوندره پیغام
پیمبریله چکه تحت حکم مولایه
.
آیردی حکمیله انسانی صنف حیواندان
وئروبدی عقلی کمک چکدی بعد اعلایه
.
هامی پیمبری علمیله خلق ائدوب خالق
ازلده علمی ائدوب انبیایه پیرایه
.
ائدوبله مردمی راه هدایته دعوت
چکوبله علمه طرف خلقی پایه به پایه
.
آچوبلا مکتب توحیدی چوخلی زحمتیله
که بلکه خلقی یتورسونله عالی مبنایه
.
گنه محبتین انسانه آرتیروب خالق
که بلکه رشد ائده قابل اولا عطایایه
.
گتوردی عالمه بر عقل کلّ کلّ بشر
نئجه بشر که یتوب قرب خاص یکتایه
.
ائدوب رسالته مامور به مهر ختم رسول
رسول اکرمی رهبر ویروبدی اجمایه
.
هامی پیمبره ائتدی محمّدی سرور
که بیر نفر یته بولمز شرفده طاهایه
.
گتوردی جانب حقدن الینده بیر برهان
سعادت آختارانا بیر نفیس سرمایه
.
چاقوردی مردمی تحت لوای توحیده
که فرق قویمادی اهل و عیال و قربایه
.
سعادتین یولونی گوستروب هامى فرده
نه فرق قویدی یهوده نه گبر و ترسایه
.
آچوبدی صفحۀ دنیاده خوان احسانی
چاغوردی مردمی بیر خیره بیر مزایایه
.
تمام ماخلق اللهه باخدی بیر گوزیله
محبت ائیلدی پیر و صغیر و برنایه
.
فقط شرافت اشخاصی سایدی تقواده
او کس که تابع اولوب دلدن حکم یکتایه
.
گتوردی دشمنی دشمنله ایلدی قارداش
داخی ال آچمادیلار جنگ و قتل و دعوایه
.
نقدر گور بشرین رشد فکرین آرتوردی
گتوردی جامعه ده چکدی سطح بالایه
.
بودور مبانی احکام بودور حقیقت دین
ویروب بو درسی پیمبر بو اهل دنیایه
.
دوباره نعمتینی خلقه حق ائدوب تکمیل
رسوله امر ایلیوب باشلاسون وصایایه
.
مباد امّتی اوندان صورا قالا باشسیز
یته دوباره قوانین کفر اجرایه
.
غدیر خمّ ده پیغمبره یتوب فرمان
نزول ائده هامی مردم او گون او صحرایه
.
امام امت بر حقی حجت اللهی
یرینده نصب ایده روشن اولا بقایایه
.
علی ولیّ خدانین ولایتین یتوره
هامی بوله على مولادی کل مولایه
.
یتوردی حکم خدانی علینی نصب ائتدی
امور دینه ائدوب خلقى أمر ایفایه
.
گلوبله دسته به دسته ائدوبدولر بیعت
که تهنیت سسی اوج ائتدى عرش اعلایه
.
بیر آیری یرده پیمبر سایوب وصی لرینی
اوز آدلاریله که مخصوص اولان مسمّایه
.
ائیکمجی سی حسن مجتبا او چومجی حسین
که سبط اکبر و اصغردی میر بطحایه
.
حسین صلبنه مخصوص ائدوب ائمه لری
اولار ذخیرۀ امتدی گنج والایه
.
بیر آیری امره ده ماموریدی رسول خدا
انده اشاره سوزونده وصی اخرایه
.
یتوردی امته آخر وصی مهدی دور
که غیبتی یتر آخر زماندا کبرایه
.
گلر جهانی او افسادیدن ائدر اصلاح
داخی مسلط اولار قدرتیله اعدایه
.
بیر آیری مطلبی ده امّته ائدوب تاکید
کتاب عترتین حفظنده صبر و تقوایه
.
علی ولایتنه دائما ائدوب تاکید
علینی فرض ائدوب هارون اوزونده موسایه
.
على اطاعتین الله اطاعتنده سایوب
علی سوونلره یوخ روز حشر همپایه
.
تاپار علینی سوونلر منیده کوثرده
اشاره ائتدی بو صحبتده روز عقبایه
.
که یعنی روز جزایه اوزوزی حاضر ائدون
علی یولوندا اولانلار یتر تمنایه
.
سفارش ائیلدی بیرده عزیزه فاطمه سین
اوزی چوخ حرمت ائدردی بتول عذرایه
.
جزا گونی بولونر احترامی فاطمه نین
تیکن زمان گوزونی محشر اهلی زهرایه
.
شفاعته هامی امت او ار اونا محتاج
او سخت مرحله ده دل آچار تمنایه
.
نولور او کیمسه نون احوالی نار دوزخدن
که سیلی ویردی اوتانموب أو روی زیبایه
.
نولور او کسکه پیمبر قیزینا قمچی ویرا
که قمچی یر سالا اول جسم ناتوانایه
.
نولور او کسکه بتولین الیندن حقین آلا
آخا گونون گئجه – گوزدن سرشکی سیمایه
.
نولور اولار که بتولین بالاسین ئولدوره لر
دوشه آزعمرده چوخ غصه و بلایایه
.
ندور جزا گونی بولمم جوابی ثانینون
شکایته گله زهرا خدای دانایه
.
یقین که گئچمیه جاقدور بتول ثانیدن
نقدر وار یاناجاق نار تاب فرسایه
.
یقین که ایستیه جاقدور حسینینون قانین
حسین آدی سالاجاق حشری شور و غوغایه
.
اگر شفاعته محشرده گلمیه زهرا
هامی او یرده دوشر درد بی مداوایه
.
اصول دینی بو اشعاریده یازوب «زرین»
خدایه شکر اولا یتدی بو فیض عظمایه
.
بو بیرعملدی که چون واردی جنبۀ تبلیغ
عقیده سین ائدوب اظهار گتدی انشایه
.
اگر مطالعه ائتسه بیری بو اشعاری
ایدر توجه اوزی – یوخ لزومی ایمایه
.
خدا اوزون بیزی بو راه حقه ارشاد ائت
گیداخ بویولدا یتاخ رستخیز کبرایه
.
.

#مناجات_اصول_دین #فاطمیه_مدح #قیامت #ترکی #همیشه_شکر_ایدرم_کردگار_یکتایه #فاطمیه #زبدةالاشعار #مناجات_اسماعیل_زرین #قیامت_اسماعیل_زرین