ولادت باسعادت مولانا حضرت ابی عبدالله الحسین (ع)
#گریز به شهادت امام
.
.
✍️ #زبدةالاشعار ✍️
.
🆔: @nohe_torki
.
.
مرحوم صافی تبریزی
.
همیشه موج ورور بحر فیض سبحانی
جهانی دولدوروب آیات صنع یزدانی
.
اگر چه خلقت پیغمبران مرسلیلن
مزیّن ایتدی بو دار شهود امکانی
.
اولوبدی ختم رسالت امیر بطحایه
سالوب مشقّته بو آد همیشه طاهانی
.
گهی بشیر دی اوز قومنه گهى منذر
قیلوبدی امّته هادی علیّ عمرانی
.
وجود محترمی اولدی اشرف موجود
تاپوب شرف او سببدن وجود انسانی
.
یتوردی دین مبین حنیف اسلامی
دلیل متحکم اولان آیه آیه قرآنی
.
باخاردی اشرف مخلوق کل مخلوقه
گوروردی معصیتیله بو کونی ظلمانی
.
یاناردی اکثر اوقات حال امّتنه
دیردی نه آپارور بو خطا و عصیانی
.
مؤثّر اولدی خدای جلیل درگهنه
گلوب تلاطمه دریای لطف ربّانی
.
حسین نطفه سنی سالدی رحم زهرایه
او نوره حامله ایتدی بتول عذرانی
.
نزول ایلدی ویردی سلام جبرائیل
ادبله عرض ایدوب ای شهر علم سلطانی
.
مبشّرم سنه من بیر جدید مولوده
که ساخلیوب اونی بطننده مریم ثانی
.
اگر چه دوقّوز آی اولموش ولادته تعیین
کمال ذاتیدی تکمیل ایدوب بو نقصانی
.
بروج ستّه نی گون آلتی آیدا سیر ایلر
ایدر حسینیده شش ماهه کونی نورانی
.
حسین قورتاراجاق أمّتون او ظلمتدن
او دور گناه ایلین شیعه نون نگهبانی
.
حسین آدیله اولور بو بنای دین محکم
قیامته کیمی ساخلار بو شرع غرّانی
.
بو یازدیقیم یازیلان مایقال مجملیدور
حسین ولادتنه ویردی شرح طولانی
.
بو تهنیت آراسیندا دل آچدی تعزیته
سالوب ملالته سلطان ملک بطحانی
.
بیان ایلدی کیفیت شهادتنی
گتوردی داد و نوایه آناسی زهرانی
.
دیدی کَسَلَّله قفادن باشین او مولودین
قالور یارالی قوری یرده جسم عریانی
.
بولوندی اجر شهادت رضا ویروب آناسی
قبول ایلدی تقدیر حیّ سبحانی
.
دوتولدی تعزیه سی گلمه میش بو دنیایه
او بزم ماتمه روح القدس أولوب بانی
.
دیردیلر هاموسی واحسسین و وامظلوم
اولوب عزاسنه مشغول عالی و دانی
.
یتیشدی سیّم شعبان أو وقت اولوب که حسین
منوّر ایلیه خورشید وار دنیانی
.
دگلدی قابله اولماقه اوزگه لر قابل
خدا بو خدمته تعیین ایدوبدی لعیانی
.
بولوردی جسم حسین روحدن لطیفدی چوخ
دگه اذیّت ایدر روحه دست جسمانی
.
مخدّرات بهشتی اگر چه حاضریدی
ایدردی غبطه هامی بو مقام عُلیانی
.
ولیک خلقتی بیر نور محض اولان لعیا
اولوبدی قابله تاپدی بو شوکت و شأنی
.
تمام حور جنان انتظار خدمتیدی
وسیع دور او قدر استفاده میدانی
.
گلوب خدیجه یاننجا سالوب گتورمشدی
جناب مریمیله هاجریله حوّانی
.
او ساعتی که ظهور ایتدی سرّ لم یزلی
قویوب قدم بو جهانه او عشق قربانی
.
ازل بو کثرت آرا قیلدی وحدته اقرار
موحّد اولدى قیلوب یاد فرد و یکتانی
.
شهادت ایلدی اوز جدّینون رسالتنه
قبول ایدوب او رسولین کتابی فرقانی
.
ایدردی ذکرلرین بیر به بیر اولوالعزمون
سالوردی یاده خلیل و کلیم و عیسانی
.
قرائت ایلدی گوگدن گلن کتابلری
بیانه گتدی هامى لفظی کلّ معنانی
.
اولوب او جسم مطهّر قماطه پیچیده
آلوب ال اوسته او باب رسول دربانی
.
گتوردی روح الامین ویردی جدّی یاسینه
گوروبله گون الى اوسته او ماه تابانی
.
دهان پاکنه قویدی مبارک انگشتین
بیان حکمتیله دولدی شکّرستانی
.
حسینُ منّی أنا من حسین او یولداندور
نچون حسین او شهون اولدی شیرۀ جانی
.
اوپردی گه بوغازین که یوزینی آغلاردی
باساردی سینه سنه گه او مهر رخشانی
.
بولوردی بو بوغازى کیم اوخیله أوخلالّار
او اوخ یریندن آخار سو کیمی یره قانی
.
کنار نهرده تشنه بو نحر اولور منحور
تاپار ایلنده سِنان تا سَنان بو عطشانی
.
بولوردی بو یوزی اوّل گجه کول اوسته قویار
دیار کوفه ده خولینون اولسا مهمانی
.
تنور کنجین ایدر طور بو یوزین نوری
تاپار حسین او یرده مقام موسانی
.
گلوردی فوج ملایک یره قبیل قبیل
زیارت ایلماقا اول مَهِ درخشانی
.
واریدی اوچ گونه دین خاندان حیدرده
بو گَل بو گِئت بو تردّد بو عیش روحانی
.
تصدّق سرینه قیلدی فطرسی آزاد
خدا او منبع جود و کرم عطا کانی
.
شفا تاپوپ یوزینی گورماقیله دردائیل
اولوبدی بیر نظری اهل درد درمانی
.
اوچومجی گون دیدیلر حاملان عرش برین
که ای مقابل ذاتنده هر بقا فانی
.
اجازه ویر بیزه تا یر یوزینه نازل اولاق
بو دست قدرتیله ساخلا عرش اعلانی
.
حسین قونداقنى یا بویور گتورسونلر
ایداخ زیارت او گل روی و ماه سیمانی
.
خطاب ایلدی جبریله حضرت سبحان
که نازل اول یره قیل شاد شاه مردانی
.
گتور حسینمله ویر بو عرشیمه زینت
مشرّف ایله بو طاق سپهر خضرانی
.
گلوب دوباره حضور پیمبره جبریل
وئروب سلام حسینون أولوب ثناخوانی
.
حسینی گوتدی صعود ایلدی سماواته
نثار رحمتیله دولدی عرش دامانی
.
روادی گور بو حسینون دیار غربتده
آلا کنارینی یوزمین جماعت جانی
.
ورا الینه قلج اوخ سِنان گلن یکسر
بو شاه بی کسی هر دسته قوم سفیانی
.
بولورسن هانسی قلج هانسی تیر هانسی سِنان
اولوب الیمده منیم بیر مصیبت عنوانی
.
همان قلج که وروب مالک ابن یُسر لعین
سوسوز امام باشندان او تا یتن آنی
.
قلج دگن کیمی باشدان او قدر قان آخدی
دولوب او قانیله هر ایکی چشم گریانی
.
گلوب خیامه طرف سسلدی خانم باجیسین
أو حاله واقف ایدوب زینب پریشانی
.
چخوب حسینه باخوب یاندی باغلادی یاراسین
قایتدی معرکیه شه گزردی هر یانی
.
ایدردی جنگ ولى آختاروردی مقتلنی
که تا او یرده تاپا بزم وصل جانانی
.
سالوب سوسوزلوق اودی یاره زحمتی دلدن
او قلب عالم امکانی نور دورانی
.
دایاندی عرشۀ زین اوسته بیر نفس آلسون
بویادی قانی دوران یرده فرش غبرانی
.
الین قویوب یوزینه تکیه ایتدی نیزه سینه
ایدردی سیر مقامات عشق یزدانی
.
اودم سپنگله بیر سنگدل آتوب بیر داش
سالوب تحیّره مجموع سنگ خارانی
.
دگوب یارالادی پیشانی منوّرینی
شکسته ایلدى مرآت دین و ایمانی
.
سیلردی ذیل قمیصیله خون جبهه سنی
ایشقلانوردی بسان قمر او پیشانی
.
او حالتنده نمایان اولوب سنان قلبی
نشان ویروردی مکان رحیم و رحمانی
.
او اوخ که ذکری اولونمشدی بیر زنازاده
قویوب کمانه او دمده همان او پیکانی
.
گلوب هوائیله دگدی امام قلبندن
حصار دین مبینون یخلدی بنیانی
.
دلوبدی قلبین أو پیکان گچوب چخوب دالیدان
ایدوبدی قانیله بیر لاله زار او صحرانی
.
دالی طرفدن او تیری چخارتدی سرور دین
اولوبدی سست او وجودون چهار ارکانی
.
داخی دورانمادی بیر لحظه ذوالجناح اوسته
یخلدى توپراقا عشق صدیق میزانی
.
چکوب عروس محبت جمالنون عکسین
نشان ویروب أونا بی پرده بی بدل مانی
.
باخوب او صورته بیر سجده ایلدی قاخدی
دایاندی اللرینه اولدی محو حیرانی
.
گُل مرادیله گوردی دولوب آلى أتگی
تاپوبدی عمریده آختاردیقی گلستانی
.
دل آچدی راز و نیازه او عندلیب وفا
دیردی ای دوتان آفاقی لطف و احسانی
.
بو اکبریمدی بو قاسم بو قارداشیم عباس
ایدوبدی قانلاری قان بحری بو بیابانی
.
حسینه لطف ایله گیچ شیعه نون خطاسندن
او گونکه اخذ اولی اهل خطا گریبانی
.
او نیزه ذکری که فرمان عشقده یازیلوب
یتوب سوزوم او یره شرح ایدم او طغرانی
.
سَنانی گور که یتشدی همان سِنان الده
تاپوبدی قتلگهه ایچره او قانه غلطانی
.
گوروب حسین بوغازی گون کیمی ایشقلانوری
او حالی آغلادیری چرخده مسیحانی
.
بوغازنون چوخوروندان ورؤبدی بیر نیزه
که بلکه سوندوره اول نور طور سینانی
.
سالوبدی حیرته اوز نوری موسی عشقی
قالوبدی واله و مبهوت عرش سکّانی
.
او گونکه «صافی» امام زمان ظهور ایلر
چکر قلج آلا خون شه شهیدانی
.
گلور تموّجه دریای غیظ حضرت حق
دوتار او بحر محیطون جهانی طوفانی
.
.
#حسینیه_صافی_تبریزی
#حسینیه_میلادیه
#همیشه_موج_ورور_بحر_فیض_سبحانی
#ترکی
.
✍️ #زبدةالاشعار ✍️
.
🆔: @nohe_torki
نظر دهید