وار یری قان آغلاسون اسلامیان پیغمبره #پیامبراسلام_صحاف_تبریزی

شهادت حضرت خاتم الانبیاء (صلى الله علیه و آله)
..
..
..
..
مرحوم صحاف تبریزی
..
..
..
..
وار یری قان آغلاسون اسلامیان پیغمبره
باش آچوب آغلار بوگون صاحب زمان پیغمبره
عرش اولوب ماتم سرا
آغلار سراسر انبیا
..
..
..
..
اوج ایدوب افلاکه یردن شیون و داد و فغان
غرق اولوب بحر غمه سکان عرش لامکان
باش آچوب ایلر نوا سبّوحیان قدّوسیان
بزم ماتمدور بو گون کون و مکان پیغمبره
..
..
..
..
بیر طرفده وای عم اوغلوم وای دیر شیر خدا
بیر طرفده فاطمه ایلر نوا باشدا قرا
بیر طرفده دیده گریاندور حسین و مجبتا
سیل تک ایللَّه گوز یاشین روان پیغمبره
..
..
..
..
هر غمه دین اوسته دوزدی بو حبیب کردگار
گه توکوبلر باشینه کول گاه ایدوبلر سنگسار
عقل کلّه گه جنون آد قویدی قوم نابکار
کینۀ مکنونه سین ایتدی عیان پیغمبره
..
..
..
..
سالدیلار گاهی عباسین بوینینا اعدای دین
ویردیلر صادق رسوله کذب و هذیان نسبتین
دوزدی هر بیر یاریه اول رحمةً للمعالمین
آچمادی دل شِکویه باخ مهربان پیغمبره
..
..
..
..
ایتدى فرمایش عم اوغلى یاعلى مندن صوا
قویما زهرانی گلوب فریاده چوخ ایتسون نوا
فاطمه روحیمدی دیزده طاقتیم گوزده ضیا
مهجۀ دلدور بو بانوی جهان پیغمبره
..
..
..
..
منکه تاپشورّام سنه ایندی امانت یاعلی
برگ گل تک نازنین جسمی سلامت یاعلی
جان سنون جان بو گل و باغ رسالت یاعلی
سن بلورسن که بودور روح روان پیغمبره
..
..
..
..
نه اولوب خم بار محنتدن کشیده قامتی
نه آغارمیش ساچلاری غمدن نه سولموش صورتی
وار نه جسمینده یارا نه یوزده سیلی ضربتی
کشفدور آینده سی راز نهان پیغمبره
..
..
..
..
بیر به بیر ایتدی وصایاسین رسول محترم
باب رحمتده دایاندی قابض الأرواح او دم
دقّ باب ایلوب سلام ایتدی او پیک خوشقدم
ایستدی رخصت ایده عرضین بیان پیغمبره
..
..
..
..
اولدی بو سسدن دگرگون وضع حال فاطمه
هیبتیندن گول کیمی سولدی جمال فاطمه
اضطرابه دوشدی آخدی اشگ آل فاطمه
ضعف مستولیدی اوُل عرش آستان پیغمبره
..
..
..
..
ضعفدن حاله گلوب آچدی گوزین ختم مآب
سویلدی یا فاطمه ایتمه قزیم چوخ اضطراب
اذن ویر گلسون بودور پیک خدای مستطاب
خالق عالم ویروب لطفین نشان پیغمبره
..
..
..
..
قابض الارواح دور بو عیش دنیانی پوزان
باجنی قارداشه یاری یارینه حسرت قویان
کیمسه دن اذن آلمیوب آلماز نقدری وار جهان
وار بو اذنین اختصاصی بیر آتان پیغمبره
..
..
..
..
بیر قاپو که قابض الارواح اوندان اذن آلا
نه روا دور شیعه لر اوچ گون پیمبردن صورا
دشمن بیشرم رو ظلم آتشیله اود وورا
قویمویا حرمت ملایک پاسبان پیغمبره
..
..
..
..
داد او ساعتدن آچوب ال چرخ عصمت ماهینه
باخمادی هرگز او بیدین دلده سوز آهینه
کونی یاندوردی وورورب اود فاطمه درگاهینه
هر مصیبتدن بو غم اولدی گران پیغمبره
..
..
..
..
قولّاری سیندی گوگردی ظلم الیله پیکری
بطنینه صدمه یتوب اودلاندی قلب مضطرى
محسنی سقط اولدی پهلوسینده قالدی اللری
باخمادی بیر شرم و عار اول باغریقان پیغمبره
..
..
..
..
آند ویرم من سنى یارب بتول اطهره
ایله قسمت بیتوی «صحاف» زار و مضطره
داغلی قلبیندن اوجانسون ناله چرخ اخضره
ایلسون قبرینده گوز یاشین روان پیغمبره
..
..
..
#پیامبراسلام #صحاف_تبریزی #پیامبراسلام_شهادت #ترکی #زبدةالاشعار