ترکیب بند حالات حضرت زینب کبری سلام الله علیها
#گریز به مصائب روز #عاشورا
.
✍️ #زبدةالاشعار ✍️
.
🆔: @nohe_torki
.
علیرضا عباسی ( احسان تبریزی)
.
ولایت کنزینه گوهردی زینب
امامت برجینه اختردی زینب
.
حقیقت اهلینه مفخردی زینب
وجود عصمته جوهردی زینب
.
بتوله نائبه دختردی زینب
حیا و عفته محوردی زینب
.
لدنّی علمینی ازبردی زینب
زنان عالمه سروردی زینب
.
که معنا ده همان کوثردی زینب
آدیندان زینت حیدردی زینب
.
فصاحت باشینه افسردی زینب
ضلالت قلبینه خنجردی زینب
.
آنادان ارثیدور حجب و حیاسی
آتادان ارثیدور نطق رساسی
.
.
اله گلدی او گون عشقین مرادی
گوز آچدی عالمه پنج جمادی
.
سما لرده گرامی اولدی یادی
ائدیب دی آل طاها جشن وشادی
.
آدین سسلوردی گویلرده منادی
گلوب بیر لوح محفوظ ایچره آدی
.
یازوب دی زین اَب حقین مدادی
بو آد خوشحال ائدیب شاه معادی
.
علی المرتضا میر رشادی
علی تک خوار ائدر اهل فسادی
.
ائدر نطقیله حق اوسته جهادی
سوزوندن فتح اولار شامین بلادی
.
بلی نطقینده چون مولا دی زینب
مقام و رفعتی اعلادی زینب
.
.
آلوب آغوشینه ختم رسالت
آدین سسلیب قولاقینه او حضرت
.
خبر گتدی رسوله پیک رحمت
پس از تبریک اونا وئردی بشارت
.
بو مولوده دئدی چوخ قیل محبت
وئریبدی حق بونا عالمده عزت
.
ولی وار طالعینده چوخ مصیبت
گورر عالمده بی حد رنج ومحنت
.
قالار بیر خوش گونه دنیاده حسرت
سوروشدی علتین هادی امت
.
آچوب دی کربلادن غملی صحبت
محول دور بونا بیر غملی نهضت
.
سالار دیلدن بونی امت جفاسی
حسینیله بونون وار ماجراسی
.
.
رسول اکرمه اول محرم راز
دوباره آیری مطلب ائتدی آغاز
.
ائدر صبری بونی عالمده ممتاز
ظهور ایلر بونون نطقیندن اعجاز
.
ایکی عالم سنی ایلر سر افراز
ائدیب دی جبرئیل اعلایه پرواز
.
ائدیب لر بیر به بیر قنداقه سین ناز
ولی ائتموردی زینب دیده سین باز
.
حسینی گلمسه دهره گوز آچماز
ائده تا عشقینی معشوقه ابراز
.
الین قنداقیدن قالخزدی بیر آز
حسینیندن بو نوعی ائتدی پیشواز
.
باجی قارداشینه آندیردی عشقین
چراغین دهریده یاندیردی عشقین
.
.
گوروب بو حالتی شاه شهیدان
کنارینده اوتوردی شاد و خندان
.
گوزه ل باجیم ندن ایلورسن افغان
منه باخ اولما چوخ نالان و گریان
.
گوزون آچدی او دخت شاه مردان
اوجالتدی اللرین تئز قونداقندان
.
حسینه ایلیبدی عشقین اعلان
ائدیب بو مسئله حضاری حیران
.
اولوبدور فاطمه حالی پریشان
پیمبر دن سوال ائتدی هراسان
.
بوطفلین حالی ائتدی باغریمی قان
گوروب احمد بتولی بسکه نالان
.
خبر وئر دی اونون آینده سیندن
گوتوردی پرده غم پرونده سیندن
.
.
قیزیم واردی بونون باشدا بالاسی
بو دنیانین بونا اولماز صفاسی
.
گیر بو پنج تن رخت عزاسی
گیر اول منه ماتم قراسی
.
اوزر دنیادن ال سن تک آناسی
گورر وار مرتضاده باش یاراسی
.
ئولر زهر جفادن مجتباسی
حسینی چوخ سویر وار ماجراسی
.
آغیر دور محنت کرب و بلاسی
چخار عرشه او دم آه و نواسی
.
باتار قانه او چولده اقرباسی
آغاردار باشینی دشمن جفاسی
.
اوجالدیب ال یا پیشسین قارداشندان
اوجالدار تلیده بیر گون باشندان
.
.
حسینه اولدی زینب یار وغم خوار
ئولونجه عشقینه اولدی وفادار
.
باجی قارداش اولوب بیر یولدا همکار
قیام ائتدی حسین زینب اولوب یار
.
اولوبدور کربلاده وقت ایثار
جهاده عزم ائدیر دی پور کرار
.
چاغیر دی زینبه ایلیب دی اظهار
باجی سنسن منه یار فداکار
.
ئولوب عباسیم اول دینه علمدار
بو باشسیز عترته یوخدور مددکار
.
سن اول بی کس لره یار و پرستار
وبیرده نهضته سن اول هوادار
.
یئتیر بو نهضتی حسن ختامه
ولایت پرچمین وور شهر شامه
.
.
غرض حشر اولدی برپا کربلاده
کسیلدی تشنه قربان لار مناده
.
گلوب دی اکبرین نعشی عباده
ئولوب صاحب لوا یاتدی لواده
.
ائدیب دی ناله نی لر نینواده
ملک لرده ائدیب ناله سماده
.
حسینه آغلادی قوشلار هواده
یارالی پیکری قالدی آراده
.
سوسوز لبلر ولی حمد وثناده
ائدیب دی قتلینه قاتل اراده
.
جفا اهلی هامی فکر جفاده
خیام اوسته گلیب آتلی پیاده
.
قرالدی آسمان قوزاندی طوفان
قاچوب قیزلار چوله زار و پریشان
.
.
یالان وعده ائدیب دی شمری مغرور
امامی ئولدوره تا اولدی مامور
.
ائدیب دی حبّ دنیا گوزلین کور
اولوبدی روبرو ظلماتیلن نور
.
جناندا ناله چکدی یکسره حور
قرا یئللر اسوبدی عصر عاشور
.
اولوبدور گون غبار ین ایچره مستور
دوتولدی گون اولوب چون لیل دیجور
.
جفا اهلی ولی ظلمونده مسرور
بلالر زینبی ایلیب دی محصور
.
خیامه حمله گتدی خصم چون مور
ائدن یوخ خیمه گهدن لشگری دور
.
حسینین باشی ذبح اولدی قفادن
دئییب تکبیرینی نوک جدادن
.
.
ائدیب اعراب نادان شور و بلوا
خیامی ظلمیله ایلوبله یغما
.
صورا چکدی اوتا یاندیردی اعدا
نمایان اولدی اولدم حشر کبرا
.
قالوبدی بی کمک اولاد طاها
ملک لردن اوجالدی وا حسینا
.
قالوب دشمن آرا زینب ده تنها
قاچور صاقه صولا دلبند زهرا
.
قالوب اوتدا امام عصر وفردا
کئچیبدیر خیمیه زینب او اثنا
.
اوزون ناره ووروب پروانه آسا
گوروب سجادیده قالموبدی یارا
.
آلوب آغوشینه بیماری چخدی
عدو قلبین اونون ایثار ی سخدی
.
.
قوتاردی قتل وغارت یاتدی پیکار
باتوب گون لیل غم اولدی پدیدار
.
آرایه زینبی آلموشدی قیزلار
هره بیر نوع ائدیب دی دردین اظهار
.
سنان نی تک بالا قیزلار سیزیلدار
گئدیب دی غارته خلخال وگوشوار
.
ایاقلاردا قولاقلاردا یارا وار
یاری یانمش چادردا بی هوادار
.
بالالاره اولوب زینب پرستار
اوبیکس غمزده طفلانه غمخوار
.
نگهبان اولدی هم یار و مددکار
بابا وای سسلییر یورقون بالالار
.
بالا قیزلار یاتوب تاپدی فراغت
ائدیب دی صبحه جک حقه عبادت
.
#زینبیه_میلادیه
#زینبیه_مدح
#ولایت_کنزینه_گوهردی_زینب
#علیرضا_عباسی
#ترکی
.
✍️ #زبدةالاشعار ✍️
.
🆔: @nohe_torki
نظر دهید