ویردی خبر حسین بیر اهل منبره #اکبریه_صدری_اردبیلی

حالات حضرت علی اکبر (ع)
.
#زبدةالاشعار
.
: @nohe_torki
.
مرحوم صدری اردبیلی
.
ویردی خبر حسین بیر اهل منبره
چوخ آغلیون بالام شهزاده اکبره
.
.
وقتیکه یخدیلار آتدان جوانیمی
اکبرلن آلدیلار بیر یرده جانیمی
فکر ایلین بیلر رمز بیانیمی
لازم دگل حسین اللرده جان ویره
.
.
گل دادیمه بابا سس گلجک عرصه دن
الدن او وقتیده ویردیم حیاتی من
گیتدی هرایینه بو روحسیز بدن
اوز روحین آختاروب میداندا تا گوره
.
.
هر سنگدل اگر اولسیدی قاتلی
قویمازدی قانینه باتسون او کاکلی
داشداندا سخت میش بو قاتلون دلی
وردی عمودیله یخدی اونی یره
.
.
راوی دیور حسین سلطان تشنگان
میداندا اکبرین درک ایتدی ناگهان
گوردی نفس چالور قان ایچره اول جوان
نزدیکدور یته جدّی پیمبره
.
.
اول قانلو پیکره قالمش نچه قدم
آتدی اوزین یره آتدان او قدى خم
تاپدی او نورسی نه نوعی بلمورم
گوردی دولوبدی قان اول قاره گوزلره
.
.
اول جسمه تکیه گه ایتدی اوزین حسین
سس ویرمدی اوغول سیلدی گوزین حسین
افسوس ایشتمدی اکبر سوزین حسین
باعث بودور که جان یتمشدی لبلره
.
.
وای اکبریم دیدی وای نورسیم بالا
آیا قولاقوه یتمز سسیم بالا
نجه علاقمی سندن کسیم بالا
لعنت بو گردش چرخ ستمگره
.
.
اوخشادی آغلادی یوسف لقاسینی
فرش ایتدی تپراقون اوسته عباسینی
قویدی عباسینه نورس بالاسینی
حمل ایتدی خیمۀ اولاد حیدره
.
.
اندیردی عرصه دن تلّون ایاقینه
زینب ایاق یالین قاچدی قباقینه
قارداش بالاسینی آلدى قوجاقینه
قربان بیبون على صد پاره پیکره
.
.
بو حالی اهل بیت ایتدی مشاهده
بیر کیمسه قالمادی اول خیمه گاهده
اول نعشی قویدیلار تا بین راهده
وا اکبرا سسی اوج ایتدی گوگلره
.
.
یولدیلا زفلری اول نعشون اوستنه
گوزیاشی سپدیلر بلکه بو اود سونه
قالدی دیدی آنون لیلا قرا گونه
نوبت یتنده اول بیچاره مادره
.
.
تا «صدری» زنده سن دار فناده سن
دریای شعریده دائم شناده سن
اوقات عمریدن قیل استفاده سن
یاز نوحه اکبره ثبت ایله دفتره
.
.
#اکبریه_صدری_اردبیلی
#اکبریه_شهادت
#ویردی_خبر_حسین_بیر_اهل_منبره
#ترکی
.
#زبدةالاشعار
.
: @nohe_torki