پرچمیم دوشمه یره دست وفا پروردن #عباسیه_فکری_اردبیلی

شهادت حضرت ابوالفضل (ع)
..
..
..
مرحوم فرهاد فکری اردبیلی
..
..
..
پرچمیم دوشمه یره دست وفا پروردن
چون امانت یتیشوبسن الیمه حیدردن
..
قویمادیم من ییخیلاندا دوشسن سنده یره
گر چه حفظ ایلمک اولموردی سنی لنگردن
..
صبر ائله صاحبووه من سنی تحویل وئروم
عاریدور پرچمی دشمن آلا سر لشگردن
..
گوز تیکوبدور سنه مخیمده پریشان قیزلار
قان اولوب قلبیلری چرخ جفا گستردن
..
ناگران قلبیلرین شاد ائدوسن اسدوقجه
سویونور خیرداجا قیزلار کرم داوردن
..
صبر ایله گوزلریمون نوری حسینیم گلسون
قویما شرمنده اولام من شه بی یاوردن
..
شه گلنده قدمی آلتدا ییخیلوق ایکی میز
اوپروک شوقیله خاک قدم رهبردن
..
یوز دوتوب خیمیه عباس دیدی گل قارداش
سالدی دشمن بو اوزون قولاریمی پیکردن
..
قولاریم یوخ نئجه بو چولده اولوم پرچمدار
گل حسین پرچمووی آل کسیلن اللردن
..
ایکی قول بیر گوزی سو مشگینه قیمت وئردیم
بو آغیر قیمته بلکه سو آلام لشگردن
..
دیدیلر آزدی بو قیمت بو تمنادن گئچ
سو بهاسی بو گون آرتوقدی در و گوهردن
..
بیر زادا یوخدی گمانیم دیدیم آیا نیلوم
نا امیدم ئوزولوب السیز الیم هر یئردن
..
قالوب عباسه فقط بیر یارالی جان نقدی
سیز قبول ایلیون آخر اونی بو مضطردن
..
داش اوره کلر سوزیمی ائتمدی افسوس قبول
ائتدی شرمنده منی لشگر کین اصغردن
..
ممکن اولسا ئوزیوی رزمگهه فوری یتور
شاهبازون ییخیلوب صدمه گوروب شهپردن
..
گوزومون آغ قره سین قانه قاتوب تیر سه پر
داخی سلب اولدی توان یاره لی نام آوردن
..
گه ویروللار منی نیزیله گهی خنجریلن
گورمورم تا ئوزیمی حفظ ائلییم خنجردن
..
یارالی شیر کیمین دوره می روبه لر آلوب
سپریم یوخ هدفم دشمنه دور و بردن
..
اوخ آتانلاردا منی ایندی کمانیله ویرور
نه حیا ائتدیله مندن نده پیغمبردن
..
ائله کی گوردی منی نوفل بی دین قولسوز
اندیروب آهن عمودین بو سپر سیز سردن
..
ییغیشوب سینمه جان قویما وئرم جان سن سیز
یارالی باشیمی گل آل سپه کافردن
..
سوز سوزی چکدی دیدیم منده بیر آز دردیمدن
یوخسا خوشتر دگل هیچ سوز سخن دلبردن
..
آیریلیق وقتیدی گل بیرده دویونجا دانیشاق
کام دل گوی آلا عباس دم آخردن
..
گوز که گورموردی او دم قارداشین عطرین آلدی
پیشواز ایسته دی ائتسون او سوسوز سروردن
..
طاقتی اولمادی افسوس ایاق اوسته دورا
بو قیامت اونا بالاتر اولوب محشردن
..
دیدی عفو ایله آقا دورماقا یوخ امکانیم
یارالار وئرمور امان تا دورام آخر یردن
..
چاره م اولسیدی حضورونده آقا یاتمازدیم
گئچ علی اکبره خاطر یارالی نوکردن
..
لطف ائله یوخدی الیم گوزلرومون سیل قانین
قوی چاتوم قلبیده کی مقصده بو محضردن
..
یوزووه باخماق حسین عین سعادتدی منه
ائتمه محروم منی فیض رخ انوردن
..
بیرده ای شافع عصیان کرم دریاسی
پوزما فرهادین آدین روز جزا دفتردن
..
..
..
#عباسیه #فکری_اردبیلی #عباسیه_شهادت #ترکی #زبدةالاشعار