طفلان حضرت مسلم
✍️ زبدة الاشعار ✍️
?: @nohe_torki
.
#سبک_ای_باد_صبا (بیش از 7 سبک)
.
مرحوم هندی تبریزی
.
پیغمبره حارث بلوسن نسبتیمیز وار
اولدورمه یتیموخ مگر آز محنتیمیز وار
.
اقدام ایلمه قتلیمیزه گلمه اوزاق دور
انصاف ایله بیرحم مروتدن اوزاقدور
ظالم دیمیسن بو ایکی بیچاره قوناقدور
قانون شریعتله بیزیم حرمتیمیز وار
.
کافر اولا اسلامه دیمز بیر سوز ایوینده
ممکن اولا مهمانه ویرر یر گوز ایوینده
اُلدورمیوب هیچ کیمسه قوناقین اوز ایوینده
ظالم دیمیروخ رحم ایله باخ غربتیمیز وار
.
تقدیر بیزی خانه ی جلّاده گتوردی
قاتل قاپوسین ویردی نشانه داده گتوردی
آهونی چکوب منزل صیاده گتوردی
اوز قتلیمیزه گور نه عجب سرعتیمیز وار
.
بیر ایل بیزی چرخ ایلدی زندانیده محبوس
چوخ غصه چکوب اولمادوق اما بیله مأیوس
قورتولدوق او زندانیدن امّا گنه افسوس
بو ایوده بیزیم مین او قدر زحمتیمیز وار
.
هر چند سنه یالواریروخ ایتمیری تأثیر
بی چاره لره یوخدی مگر چاره و تدبیر
چوخ ویرما جفا سیلی سی وار بیزده نه تقصیر
ای سخت دل آخر گوروسن رقّتیمیز وار
.
گل مسلمون اولادینی سالما بو کمنده
مسلمسن اگر شیوه کافر ندی سنده
یول گوزلوری آغلیر آنامیز ایمدی وطنده
باجی آنادان آیری دوشوب فرقتیمیز وار
.
بو امرده گر مال جهاندور سنه منظور
ظلمیله بو آزاده لری ایلمه رنجور
گل زلفوموزی کس بیزی بازاری دولاندور
سات قول یرینه آل نه قدر قیمتیمیز وار
.
سن کسمه بیزیم باشیمیزی دوشمه عناده
پیغمبره باخ قتلیمیزه ایتمه اراده
قولاریمیزی باغلا آپار ابن زیاده
گورسون که نجه بیر سارالان صورتیمیز وار
.
گوردیله که رحم ایلموری عجز و نیازه
بیر مهلت آلوب دوردولا اول وقت نمازه
یوز دوتدی ایکی قطب وفا قبله رازه
عرض ایتدیله یارب نجه گور ذلتیمیز وار
.
یا عادل و یا حاکم و یا منتقم الله
طغیان ایلیوب ظلمده بو ظالم گمراه
بو باره ده یا رب سن اوزون اول گله خونخواه
یوخ ناصریمیز بیر سنیله نصرتیمیز وار
.
نفرین ایشیدوب گلدی غضبدن دله حارث
اَل آتدی چکوب خنجری بی فاصله حارث
سبقت ایلیوب بیربیره سویلردیله حارث
اُلمکده ایکی قارداش آرا سبقتیمیز وار
.
کسجک باشینی هر برینون زلفینی یولدی
آتدی سویا نعشین سو یوزی قانیله دولدی
گَلدی ایکی قارداش بدنی قول بویون اولدی
ای شیعه بو مطلبده بیزیم حسرتیمیز وار
.
صد آه حسین قارداشی عباسه یتنده
گوردی که دوشوب قولاری قالموبدی بدنده
سویلوب که بلیم سندی برادر سن النده
جسمون یاراسیندا منیله شرکتیمیز وار
.
اوخدان قاناد آچدی بو کشیده بویون عباس
هرگز دیمدون راحت اولا بیر قویون عباس
نه واردی قولون بیرجه اولاخ قول بویون عباس
نه درد دل ایتمکلیگه بیر فرصتیمیز وار
.
هر کیمسه وجود عالمینه گلدی عدمدن
لازمدی گرک فیضین آلا خوان کرمدن
هندی بو کلامیله بو دفتر بو قلمدن
معلومدور البته بیزیم اجرتیمیز وار
.
#طفلان_مسلم
#پیغمبره_حارث_بلوسن_نسبتیمیز_وار
#هندی_تبریزی
#ترکی
.
✍️ #زبدةالاشعار ✍️
?: @nohe_torki
