در شأن و مصائب حضرت زهرا (س)
.
✍️ زبدة الاشعار ✍️
.
🆔: @nohe_torki
.
مرحوم تائب تبریزی
.
چرخ ادبده زهرۀ زهرادی فاطمه
بحر شرفده گوهر یکتادی فاطمه
.
باشدان ایاقه مهر و وفا صدقدور صفا
مجموعی قطره اولسالا دریادی فاطمه
.
مهر و وفا کتابینی ایتسن مطالعه
ایله قبول ازلده کی انشادی فاطمه
.
ذاتینده نوردور اؤزی ماهیّتینده نور
یعنی که نوره مَنشَاء و مَجلادی فاطمه
.
دنیا قالاردی ظلمت اگر سالمییدی نور
نور ازلدی روح تجلاّدی فاطمه
.
اوّلده خلق اولوب بونا خاطر تمام خلق
خلق عالمینده طلعت زیبادی فاطمه
.
مبهوت ایدن شئون و جلالتده مریمی
مام عزیز یازده عیسادی فاطمه
.
اون بیر امام آناسیدی پاکیزه سیری قیل
هم پاکدل بتول هم عَذرادی فاطمه
.
عفّتده بی بدیلدی عصمتده بی نظیر
مهد عفاف و عصمت کبرادی فاطمه
.
زهرا آدیله توبۀ آدم قبول اولوب
باب نجات آدم و حوّادی فاطمه
.
دنیایه گَلمیوب بو جلالتده بیر خانم
شأنینده تک جلالده تنهادی فاطمه
.
دنیا خانم لاری خانمی آدلانوب، ولی
بانوی اعظم ایکی دنیادی فاطمه
.
دنیاده ناامیدلره مایۀ امید
هم اُمّته شَفیعۀ عقبادی فاطمه
.
باشدان آیاقه وقر و کمالات قدسدور
وقر و کماله صورت و معنادی فاطمه
.
زهرا آدیله انجمن اهل کسا قوروب
بو انجمن ده انجمن آرادی فاطمه
.
هر چند قبری ایتگین اولوب قدری تک ولی
ایتگین اولان مزاریله پیدادی فاطمه
.
آخر وصیّتیله آدین زنده ساخلیوب
هر سوز دیوب بولوب ندی دانادی فاطمه
.
ایتدی وصیّت ایتگین ایده قبرینی علی
علّت اودور که شهرۀ دنیادی فاطمه
.
بیله وصیّتیله دم واپسین ده
بیلدیردی پشتوانۀ مولادی فاطمه
.
اؤز همسر عزیزینین اثبات حقّینه
کَسمیش نهان مزاریله مرصادی فاطمه
.
یورقون یاتوبدی ظاهر صورتده باطناً
اثبات حقّه بادیه پیمادی فاطمه
.
شأنیینده بسدی کیم حَسنینین آناسیدور
بو امتیاز عالیه دارادی فاطمه
.
ویرمیش حسین تشنه لبه شیر انقلاب
ایلوبدی انقلابی او آزادی فاطمه
.
دانشسرای سینه ده پرورده ایلیوب
زینب کیمی ادیبه بیر اُستادی فاطمه
.
خُلق عظیم صاحبی نین نور دیده سی
اخلاقده تمام سجایادی فاطمه
.
اُمّ الاَئمّه دور شرف انبیاء قزی
روح روان سرور بطحادی فاطمه
.
از بسکه چوخ سُوَردی بتولی رسولدن
مَشمولۀ خطاب فداها دی فاطمه
.
سویلردی بو محبّتیم اللّهین امریدور
بی شک محبّت ائتماقا اولادی فاطمه
.
جان تک باساردی باغرینا زهرانی مصطفا
اعلام ایدردی امّ ابیهادی فاطمه
.
دائم باباسی فاطمةُ بضعتی دیوب
یعنی که پارۀ تن طاهادی فاطمه
.
گه سینه سین اؤپردی دیردی نبیّ حق
روح بهشت و جنّت ماوادی فاطمه
.
عطر جنان مشامیمه بو سینه دن گلور
انسیّه آدلی دور اؤزی حورادی فاطمه
.
افسوس بو جلالت و بو احترامیله
گوردی جفای فرقۀ بیدادی فاطمه
.
اوچ گون گچوب وفات رسول گرامدن
سانموبلا اشقیا که مُعزّادی فاطمه
.
غوغا سالوب توکولدیله دربار رحمته
باخموبلا صاحب دَرِ والادی فاطمه
.
سانموبلا کیم او بیتده وار اهل بیت دین
بو اهل بیت ایچینده هویدادی فاطمه
.
غوغاگَرانه دوگدیله دربار رحمتی
ایوده ایشتدی بو اوجالان دادی فاطمه
.
گلدی قاپی دالیندا دایاندی وقاریله
گوردی که باب بیت دَه غوغادی فاطمه
.
ایتدی ندا سوزوز نه دی گلدی بیله جواب
امر خلیفه لازم الاجرادی فاطمه
.
یا بیعت ایلیه علی یا کی قاپون یانا
بو حکم رأی مجلس شورادی فاطمه
.
اوت ورّوخ ایوده ایوده اولانلاردا اودلانار
بیز باخماروق علیدی بو زهرادی فاطمه
.
تهدیدیله دانشدیلا سندیرمادی اُزین
ایتدی مُجاب تودۀ بیدادی فاطمه
.
اصرار ایتدیلر قاپونی آچمادی خانم
درک ایتدیلر که روح تقلاّدی فاطمه
.
اسباب آتش الده دوتوب ایتدیلر هجوم
گوردی هجوم فرقۀ شیّادی فاطمه
.
اود وردیلار یانوب ملک اذن ایستین قاپی
یاندی قاپی دیمَه که مجزّادی فاطمه
.
نمرود ناری نور خلیلینی چولقادی
دورینده گوردی اود یارادان بادی فاطمه
.
ضربتله ووردیلار آچیلوبدور یانان قاپی
سانموبلا پشت درده کی حورادی فاطمه
.
صدمه گوروب قولی همی سندی قابرقاسی
عرشه اوجاتدی ناله و فریادی فاطمه
.
مسمار دَر باباسی اُپَن سینه دن اُپوب
قاندان گوروب دولی دل ناشادی فاطمه
.
شاخ گل بهشتدن آیریلدی غنچه سی
گُل غنچه سیدی محسن او گل آدی فاطمه
.
واضح دینمرم دِیولَن کارد صحبتین
وار ایمدی ده دچار او ایذادی فاطمه
.
وار چوخلی سوز یانان قاپیدا استناد اولوب
ساخلوب قیامَتَه همین اَسنادی فاطمه
.
قاتل لریندن اُوردا آلار انتقامینی
الله قوراندا محکمۀ دادی فاطمه
.
فرمایش ایتدی فضّه خَبَر ویر عم اوغلوما
بولسون نجه دچار بلایادی فاطمه
.
دلده ولیّ حقّ آدی دلدن دوشوب قالوب
ضعف عالمینده عاطفه بنیادی فاطمه
.
مولا گلوب نه حالیله گوردی دینمرم
ذکر ایتمه سَم رضا اولا باجادی فاطمه
.
چون ایسته مزدی گورسون علی نی شکسته حال
فعلیله اُوز مرامینه گویادی فاطمه
.
حاله گلنده گوردی که یوخدور عم اوغلوسی
ایتدی ندا فدائی مولادی فاطمه
.
آلدی خبر که نولدی عم اوغلوم گلوب جواب
مولا اسیر فرقۀ اعدادی فاطمه
.
باشی آچوخ آپاردیلا مولانی مسجده
گوردی وظیفیَه دم ایفادی فاطمه
.
قاچدی دالنجا یتدی علی دامنین دوتوب
گویا ایدوب مبارزه ایجادی فاطمه
.
هرگز دیردی بوشلامارام من بو دامنی
یارب نقدر اهل تولّادی فاطمه
.
یوزال چکردی بیعَتَه الله ولی سینی
ساخلاردی تک او مَفخر اوتادی فاطمه
.
زهرا گوروبله دامن مولانی بوشلامیر
مانع اولا او امره مهیّادی فاطمه
.
اولدی اشاره قنقذ بی رحمه ناگهان
مَشمول هر اذیّت و ایذادی فاطمه
.
قنقذ آلاندا بیر یاری یانمیش اودون اله
ضعف ایلدی دلینده علی آدی فاطمه
.
دوشدی یول اوسته قالدی علینی آپاردیلار
الدن ویروب او مرشد ارشادی فاطمه
.
بیر بوردا قنقذ آچدی یول اوستونده ظلم الین
گوردی که روبروی تَعَدّادی فاطمه
.
بیرده قباله الده یول اوستونده توش اولوب
گوردی جفای قاتل بیدادی فاطمه
.
گلدن لطیف اوزه اوتوروب زاغ پنجه سی
اول ضربَتیله آبله سیمادی فاطمه
.
«تائب» بالان مریضدی یالوار شفاسین آل
زهرا الیله شافی مرضادی فاطمه
.
.
#فاطمیه_مدح
#فاطمیه_شهادت
#چرخ_ادبده_زهرۀ_زهرادی_فاطمه
#تائب_تبریزی
#ترکی
.
✍️ #زبدةالاشعار ✍️
.
🆔: @nohe_torki
نظر دهید