چون خیمه لرده اوچ گونودی قحط آبیدی #عباسیه_شانی_تبریزی

شهادت حضرت ابوالفضل علیه السلام
.
#زبدةالاشعار
.
: @nohe_torki
.
مرحوم شانی تبریزی
.
چون خیمه لرده اوچ گونودی قحط آبیدی
سوز عطشدن آل علی دل کبابیدی
.
بیر جمع تشنه قز گلوب عبّاس حضورینه
اللرده جام خشکیدی ، گوزلر پر آبیدی
.
گورجک بو حالی حالی پوزولدی او سرورین
غیرتده چون آتاسینا نائب منابیدی
.
بوندان علاوه ائتمیشدی بس که سو سبیل
سقّالیقا او چولده آدی انتخابیدی
.
اولدی سوار عقابه قویوب رزمگاهه یوز
مأذون اذن شاه جلالت مآبیدی
.
شرق خیمدن ایتدی مه هاشمی طلوع
ماه سپهره نور دم اکتسابیدی
.
گورجک او نوری خیره لنوب اشقیا گوزی
گویا که گون ضیاسی قرین سرابیدی
.
تا یتدی اشقیایه آچوب دل نصیحته
گور صادقی که ناصح قوم کذابیدی
.
حق بولمینلر ائتمدیلر حق سوزون قبول
گر چه تمام سوزلری رأی صوابیدی
.
بیر کسده قدرت اولمادی ویرسین جوابینی
حق کلمه سینده فرقهٔ باطل مجابیدی
.
غیظیله حمله ایتدی قوشون اوسته، گوئیا
شهباز عشق قصدی شکار غرابیدی
.
عَمر اوسته خندقه دیه سن مرتضا گیدیر
شمشیری ذوالفقاریدی دلدل عقابیدی
.
اویناردی برق تک اوزون الده ایتی قلیج
اود یاغدیرردی دشمنه تیر شهابیدی
.
شمشیر برقی جانینه اود سالدی دشمنین
توش عذاب ، ئولمه میش اهل عذابیدی
.
لشکر گوزونده تیره و تار اولدی رزمگاه
گر چه قلج وران اولارا ماهتابیدی
.
روباه وار قاچدی یلان عرب تمام
اعدا اؤزون ایتیردی ، ایله پیچ و تابیدی
.
آتلار صداسی نعره سسی بانگ الحذر
بیر اؤزگه شور حشریدی بیر انقلابیدی
.
یاردی نهنگ صولت او دریای لشگری
دشمن داغیلدی صاق صولا گویا حبابیدی
.
بیر یول آچوب او سرو خرامان مرتضا
گویا فرات خیبرینه فتح بابیدی
.
آلدى شریعه نی ، علی خیبر آلان کیمی
بیر کس که صولتی او شهه انتسابیدی
.
باخدی سویا سوسوزلوقی آرتوب دوباره دن
از بس عطشدن اوچ گونودی سلب تابیدی
.
بو اوچ گونی که سو یولونی باغلاموشدولار
دللرده تشنه لیق اودی پرالتهابیدی
.
فکر عبث دی ، گلمه سین هرگز خیالوه
عطشان تمام عترت ختم مآبیدی
.
هی سو گلوردی خیمیه سیراب اولوردولار
سیراب ایدن او جمعی دیمه اشکنابیدی
.
اوچ کیمسنیدی اوچ گئجه گوندوز سوسوز قالان
نفسین ایدن مباح سودان اجتنابیدی
.
بیر شاه تشنه کامیدی سو میل ایتمین
بیرده باجیسی زینب علیا جنابیدی
.
بیرده بو که سوسوزلارا سقائیدی اوزی
چگنینده مشک تشنه لبی لعل نابیدی
.
ایچمزدی ، سو تاپاندا ویرردی اوشاقلارا
مبهوت اونون وفاسینه هر شیخ و شابیدی
.
القصّه دولدورب ایکی اوجین آخار سودان
حیران قویان جهانی بو امر عجابیدی
.
نفسین مذمّت ائتدی توکوب تازه دن یره
عبّاس! حسین سوسوزدی بو نه میل آبیدی
.
دولدوردی مشگینی اؤزی چخدی سوسوز سودان
اوّلده مست جام شراب خوشابیدی
.
هر سمته باخدى باشلادی بیر یول ، همان او یول
نزدیک راه خیمه عرش احتجابیدی
.
یوز قویدی خیمه گاهه طرف شوق وذوقیله
ایلردی هر نه همّت و سعی و شتابیدی
.
ناگاه قویدی اوخلاری بیردن کمانلارا
بولمم او قومده بو نه شرم و حجابیدی
.
اول گلشن وجودینه گویا صفا ایچون
اوخ یاغدیران یاغیش کیمی گوگدن سحابیدی
.
نه سعی جنگ ایدردی نه بیر حمله لشکره
امّا تمام جهدی فقط حفظ آبیدی
.
ایستردی مشگی بلکه یتورسون سوسوزلارا
اطفاله سو آپارماقیله کامیابیدی
.
کشف مصیبت ایتماقا یوخ گر چه اختیار
امّا اولوب ، یازوبدیلار شرح کتابیدی
.
باب اشاره مُجمَلاً عرض ایلیم گرک
بیر غم که هر کتاب غمه نئچه بابیدی
.
شیر اوغلی شیری گلّۀ روباه ایدوب شکار
اف روزگاره ، دوری ازلدن خرابیدی
.
قول ویردی سو آلانمادی دویدی حیاتیدن
جان نقدى الده راغب مرگ ، اول جنابیدی
.
پیکان ظلم پیک اجل اولدی، آنّینا
دگدی ، ولی حقیقت عشقه نصابیدی
.
ایستردی خارج ایتسون اوخی سجده گاهدن
شکرانه سجده ایتماقا جای ثوابیدی
.
ال خدمتین رجوع ایلدی هر ایکی دیزه
ال عذری بو خصوصیده چوخ باحسابیدی
.
ویردی تکان عمامه باشندان دوشوب یره
سنده باش آچ ، که باشین آچان بوترابیدی
.
باشی آچوخ قالاندا گلوب بیر نفر شقی
الده دمیر عمودیدی دلده عتابیدی
.
امّ البنین روحینی آغلار قویان هنوز
اوردا اولان او نچه سؤال و جوابیدی
.
یا فاطمه نئجه دیوم آتدان دوشن زمان
نچه قدم ایاقی که بند رکابیدی
.
از بس یورولموشیدی دوشوب نطقسیز یاتوب
گوردی که قان حریری عجب رختخوابیدی
.
گلدی امام او دمده گوروب ناز بستری
فرزند بو توابون او قانلی ترابیدی
.
سسلندی دور اویمی ، یخان قدیمی بوکن
دشمن دوتوب بو دشتی مگر وقت خوابیدی
.
قارداش سسین آلاندا گلوب جانه تازه دن
حسّ ایلدی باشی اوسته گلن آفتابیدی
.
عرض ایلدی باغشلا آقا گورموری گوزوم
قان پرده سی گوزوم قباقیندا نقابیدی
.
شاه شهید آنلادی قارداش مرامنی
آخر امام عالم سرّ غیابیدی
.
بولدی که یوخ الی سیله قانلان دولان گوزی
بو باره دن چون حسرت دل بی حسابیدی
.
سیلدی او ساربان کسن ال قارداشین گوزون
نه حالده گور اول شه مالک رقابیدی
.
فرمایش ایتدی خیمه دن ایمدی گلنده من
چوخ منتظر رقیه ، سکینه ، ربابیدی
.
عرض ایلدی خیامه برادر گیدنمرم
خجلت مصیبتی چون اشدّ المصابیدی
.
میداندا قویدی قارداشینی گلدی خیمیه
بولدی مرامی قارداشین عهد شبابیدی
.
بوش مشک الده گوزده دولی اشگ ، مشک سا
دلده کلام و ذکری همین بو خطابیدی
.
گل ای آنام نشانه سی غم پروریم باجی
گور قلبیمی نه نوعیله پر اضطرابیدی
.
عبّاسیم ئولدی ایمدی گرگ یاسینی دوتام
یغ باشیمه نقدر که عصمت مآبیدی
.
سویلوب خیامه بس نیه نعشین گتورمدون؟
سپماقه زخم جسمنه گوز پر گلابیدی
.
فرمایش ایتدی علّتی واردور گلنمدی
بوینوندا گر چه رشته ءالفت طنابیدی
.
سو اولمادی الی بوشیدی گوزلری دولی
آهیندن اودلانان فلک نه قبابیدی
.
سو ایچمدی اوزی ولی بو چولده قانیله
گلزار دینه ویردی او که آب تابیدی
.
جان اوسته العطش دئمه دی تشنه ویردی جان
معلوم اولان که مایل عالی شرابیدی
.
وصل نگار ایچون یوخودی ال خضاب ایده
باشدان ایاقه جسمی ولی قان خضابیدی
.
توک گوز یاشی ذخیره ائیله حشره #شأنیا
روز جزاده هر بیری بیر درّ نابیدی
.
ایسته او غملی قبرینی یا کربلا چاغور
عبّاس آدی گلنده دعا مستجابیدی
.
.
#عباسیه_شهادت
#چون_خیمه_لرده_اوچ_گونودی_قحط_آبیدی
#ترکی
.
#زبدةالاشعار
.
: @nohe_torki