چون منزل ایتدی آل پیمبر خرابه ده #حضرت_رقیه_منصور_تبریزی

شهادت حضرت رقیه (س)
..
..
..
..
مرحوم منصور تبریزی
..
..
..
..
چون منزل ایتدی آل پیمبر خرابه ده
عرشه اوجالدی ناله سراسر خرابه ده
.
عرش خدایه فخرایلیوب سرفراز اولوب
خاک سیاه اولدی معطّر خرابه ده
.
ناموس پرده سینده اولان هاشمیّیه
یر ویردیلر او قوم ستمگر خرابه ده
.
بی فرش و بی چراغ قوری یرده آج سوسوز
جانه یتوشدی عترت خیبر خرابه ده
.
مرغ شکسته بال کیمی سربزیر پر
آغلاردی صبح و شام حرملر خرابه ده
.
یاده دوشنده عزّتیله اوز وطنلری
غربت ایدردی چوخلی اثرلر خرابه ده
.
بی اختیار سس چکوب آغلاردیلار تمام
ظاهر اولوردی شورش محشر خرابه ده
.
اکبر دیوب رقیّه سیزیلداردی نی کیمی
دائم ایدردی ناله مکدّر خرابه ده
.
حسرتله سویلیردی علی قارداش هارداسان
.
گل بینوا باجین سنی گوزلر خرابه ده
.
الحق یقینیدور بو که نازلی رقیّه نی
ایتدی هلاک فرقت اکبر خرابه ده
.
راوی دیر یزیده دینده حکایتی
گوردوم اوجالدی شوریله سسلر خرابه ده
.
بی اختیار آچدی گوزین بیحیا یزید
ایتدی سوال نولدی سراسرخرابه ده
.
داد و فغان و ناله و فریادیدور ندن
سجاد ئولموش اولسا گیجه گر خرابه ده
.
فریاد ایتمسونله سحر حکم ایلرم
ایلله کفن و دفنینی یکسر خرابه ده
.
گیتدی غلام گتوردی خبر بیر یتیمه قیز
رؤیا ایدوب آتاسینی ایستر خرابه ده
.
سویلوب گلون آپارون قانلی باشینی
تاپسون تسلّی اول مه انور خرابه ده
.
ناگه اوجالدی ناله یتیشدی غلاملر
تسلیم اولوندی زینبه اول سر خرابه ده
.
قویدی برابرینده او طفلین کنار ایدوب
روپوشینی او بیکس و یاور خرابه ده
.
دوشدی او قانلی باشه گوزی عرض ایلدی
عمه بو کیمدی باباما بنزر خرابه ده
.
فرمایش ایلدی بودی تشنه شهید اولان
آتان حسین کشتۀ خنجر خرابه ده
.
قویدی یوزین یوزینه توکوب قانلی گوز یاشین
قان آغلادی او حالی گورنلر خرابه ده
.
عرض ایلدی بابا سنی کیم ایلدی شهید
گوردی حرملرین بیله گونلر خرابه ده
.
باخ گور بابا ننوعیله قول باغلی آج سوسوز
ویردی مکان قوم بد اختر خرابه ده
.
سولدی سارالدی صرصر ظلمیله گلشنین
اولدی اسیر خاره بو گللر خرابه ده
.
صف صف دوروب باخوب ایللَّه طعنه لر
مین ظلمیله شماتت ایدلّر خرابه ده
.
از بس بابا دیدی بی حس و اختیار
دوشدی بسان طایر بی پر خرابه ده
.
گلشن پوزولدی سولدی گلی ئولدی عندلیب
اسدی او نوگل تره صرصر خرابه ده
.
قول باغلی آج سوسوز قوری یرلرده ویردی جان
بیر نوعی درده گلدی اسیرلر خرابه ده
.
غربت غمی وطن غمی ویرانه لرغمی
اود ووردی قلب زینبه غملر خرابه ده
.
جان تک کناره آلدی رقیّه جنازه سین
نی تک ایدردی ناله مکرّر خرابه ده
.
هر قدرساکت ایتدیله آرام اولمادی
ایتدی سوال سرّینی خواهر خرابه ده
.
بیله بویوردی سوزیله گوردوم دونن گیجه
یاتمور بالام فغانیله سویلر خرابه ده
.
عمه قوری یر اوستی یوخوم گلموری آجام
اود سالدی جسم و جانه او دللر خرابه ده
.
«منصور» ایلیوبدی شهیده رقیّه نی
شمر لعین و مرتد و کافر خرابه ده
.
یارب نصیب اولا بو یتیمین زیارتی
مذکور اولا بو غصّه لی سوزلر خرابه ده
.
.
.
.
#حضرت_رقیه #منصور_تبریزی
#حضرت_رقیه_شهادت
#چون_منزل_ایتدی_آل_پیمبر_خرابه_ده
#ترکی
#زبدةالاشعار