رازو نیاز حضرت امام حسین (ع) در قتلگاه
.
✍️ #زبدةالاشعار ✍️
.
🆔: @nohe_torki
.
مرحوم تائب تبریزی
.
یارب اوزون نه ایله سن احسان او یاخشیدور
گورسن نلر حسینوه شایان او یاخشیدور
.
عهد آلموسان بو دشتده قربان دین اولام
آلسا یرین او عهد او پیمان او یاخشیدور
.
آغلار گوزوم سودا سو کنارینده تشنه لب
جانانمین یولوندا ویرم جان او یاخشیدور
.
قانیم آخا فرات یانندا فرات تک
سیراب اولا بو قانلو بیابان او یاخشیدور
.
صحرای عشقی گلشن توحیده دوندره
آچسا گل بهشت بو بستان او یاخشیدور
.
تسلیم محضم امریوه جان و دلیله من
هر امرون اولسا ای حق منان او یاخشیدور
.
واردور هامی قضایه یولوندا رضایتیم
چونکه رضایتوندی بو رضوان او یاخشیدور
.
سندندی هر نییم وار امانت سنونکیدور
ردّ امانت اولسا کماکان او یاخشیدور
.
هر جانه جان ویرن، جان آلان سن سن ای خدا
گیتسه یولوندا بو باش و بو جان او یاخشیدور
.
بیر قامتی که کوی وفا خاکساریدور
گوهر تک اولسا قانینه غلطان او یاخشیدور
.
بیر کشتی وفا که جوموب بحر رحمته
دائم گوره تلاطم و طوفان او یاخشیدور
.
بو شوره زار کرب و بلانی آخان قانیم
ایتسه صفالی صحن گلستان او یاخشیدور
.
سیر و صفای گلشنیمه شیعه لر گلوب
دلده حسین اولسا نواخوان او یاخشیدور
.
جسمی که یاره لر گوز آچوب یار اوزین گوره
هر قدر آلسا زخم فراوان او یاخشیدور
.
قویماز نمازی فوت اولا صون دم شهید عشق
عاشق اولا نمازه مسلمان او یاخشیدور
.
سو یوخدی دستماز آلارام قانیله بو گون
آب وضو شهیده اولا قان او یاخشیدور
.
فرش اؤسته جانماز ایدرم آنّیمین قانین
سجادۀ شهید اولا قاندان او یاخشیدور
.
گورسم که وقت تنگدی، دورت رُکندن بدل
تک بیرجه سجده ایلرم عنوان او یاخشیدور
.
بو سجده گاه عشقده قانلو دوداقیله
ذکر اولسا نام حضرت سبحان او یاخشیدور
.
بیر درده سالمیسان که دواسی اوزونده دی
ایتسن اوزون سُؤَن کیمی درمان او یاخشیدور
.
گلسه یولواندا هرنه بلا جان قاچیتمارام
درد و بلانی گوندره یزدان او یاخشیدور
.
قانلا وجود صفحه سی قرآن فدا سنین
تذهیب اولا چو صفحۀ قرآن او یاخشیدور
.
گلشن دولوسی قرمزی گل یولّادیم سنه
اولسا قبول درگه سلطان او یاخشیدور
.
گوردوم او گللریله نگاریم حضورینه
ایتسم روانه غنچۀ خندان او یاخشیدور
.
تقدیم یار اصغریمی ایلدیم دیدیم
اولسا هدیه غنچۀ عطشان او یاخشیدور
.
ایتدیم فدا نییم واریدی بیر بو باش قالور
بو باشدا اولسا فدیۀ جانان او یاخشیدور
.
بو باش بدنده وار نَقَدر نقص عهد اولور
یتسه کماله ده پیمان او یاخشیدور
.
سَن سُؤموسن بو حاله دوشم منده دوشموشم
دلبردن آلسا دلشده فرمان او یاخشیدور
.
آتدیم محبتّونده بو دنیا محبّتین
دل ویرسه بیر محبّته اسکان او یاخشیدور
.
اوز نازدانه قزلاریمین ترکین ایتمیشم
تک دوتموشام سنی، سنه قربان او یاخشیدور
.
بو سمتیده سزیلدیری جسمیمده یاره لر
ایلر اویاندا عترتیم افغان او یاخشیدور
.
گوزگوز اولوب بو یاره لر آغلار بویاندا قان
قزلار اویاندا دیده سی گریان او یاخشیدور
.
قانلو لبیله من ایدرم ذکر یا رحیم
اَحسن دیر او حالیمه رحمان او یاخشیدور
.
قانیم آخار بو قانلو چوله دلده یا رؤف
یرده یازا شعائر قرآن او یاخشیدور
.
بو باشیم اؤسته زینبیله قزلاریم گلوب
واعمّتا دیسونله پریشان او یاخشیدور
.
واعمتّا دلینده اوشاقلار اوستمده
زینبده واحسین دیه گریان او یاخشیدور
.
یول گوزلورم آنام گله زینب هرایینه
زینبله ایتسه چاک گریبان او یاخشیدور
.
بولّلم بلاگورن باجیمی چوخ سُوَر آنام
درد دل آلسا نازلی قزیندان او یاخشیدور
.
همناله اولسالار باشیم اوسته آنا بالا
شیونله دولسا صحنۀ میدان او یاخشیدور
.
بیرده دوتوب اوغول قانینی یاخسا زلفینه
آغ ساچلارینی ایلسه الوان او یاخشیدور
.
عمریمده آختاران گونی بو گونده تاپمشام
لطف ایتموسن منه بیله امکان او یاخشیدور
.
باشه یتوبدی دلده اولان آرزولریم
عهد ازل تاپوب بیله پایان او یاخشیدور
.
صون دمده لیک شیعه لرین ناگرانیم
ایتسن بلالی شیعیه احسان او یاخشیدور
.
منظور اولان خدا منه غفران شیعه دور
ویرسن بو گونده وعدۀ غفران او یاخشیدور
.
سس یتدی یاحسین کیمی سُؤسن باغیشلارام
قلبونده ذرّه قالمیا حرمان او یاخشیدور
.
بخصوص عارفانه سنه آغلیانلارین
روز جزاده گورمسه نیران او یاخشیدور
.
حق سوز مدام دفتره ثبت ایله «تائبا»
دولسا کلام حقیلّه دیوان او یاخشیدور
.
برهانی اولمیان سوزی یازما کتابده
هر یازدیقون سوزه اولا برهان او یاخشیدور
.
.
.
#حسینیه_تائب_تبریزی
#قتلگاه #حسینیه_شهادت
#یارب_اوزون_نه_ایله_سن_احسان_او_یاخشیدور
#ترکی
.
✍️ #زبدةالاشعار ✍️
.
🆔: @nohe_torki
نظر دهید