وداع امام حسین علیه السلام
.
✍️ #زبدةالاشعار ✍️
.
🆔: @nohe_torki
.
#سبک_شبانگاهان
.
مرحوم تائب تبریزی
.
چکوب عشق یار حسینوى قان دولان میدانه آنام باجی
گرک گیوب قرمزی گتسون محضر جانانه آنام باجی
((اولوب قلبیم غمدن آکنده
سنی تاپشوردوم خداونده
من خداحافظ من خداحافظ ))
.
.
بلایه دل وئرموشم اوّل اودلی دلده عشق نهانیم وار
اورکده عشق نهان – باشدا شور جانان مهربانیم وار
بلا منی جستجو ایلر من بلانی تا جاندا جانیم وار
نقدری درد و بلا گلسه نوشدور بو جانه آنام باجی
.
.
خزان دین دور یاخونلاشموش گلشن قرآن تار و مار اولسون
گرگ حسینون قانی آخسون کربلا دشتی لاله زار اولسون
گولوب گللر – لاله لر آچسون باغ دین دونسون نوبهار اولسون
قزلقانیم رنگ و بو ویرسون بیله گلستانه آنام باجی
.
.
اولور بیان یکدل اولماقلوق تک بو بیر سوزومدن باجی زینب
سئچنمرم گرچه گل یوزلی قزلاری اوزومدن باجی زینب
نئدیم سالور عشق جانانیم عالمی گوزومدن باجی زینب
او شوریله عازمَم ایندی محضر جانانه آنام باجی
.
.
ایکی محبت ایکی مِهره بیر اورکده هرگز مکان اولماز
عیاندور که هر محبتلر پایدار اولماز جاودان اولماز
محبّتِ یار اولان دلده هیچ محبّتِ این و آن اولماز
او دور سانّم مهر یاریمله هامونی بیگانه آنام باجی
.
.
او یرده که دعوتیم واردی ذات خلّاق مهربانیمدن
گوتورّم إل لاله زاریمدن بلبل و گلدن گلستانیمدن
بو سرگردان اهل بیتیمدن دختران شیرین زبانیمدن
سیزی بو صحراده تاپشورّام مهربان یزدانه آنام باجی
.
.
ایله محو عشق جانانم باش و جانیم بولمَم هایاندادی
منیم ایله عالمیم واردی سانمارام که عالم هایاندادی
قالوب نازلی قزلاریم هاردا سوگلی رقیّم هایاندادی
بو سن بو صحراده بو نچّه نازنین نازدانه آنام باجی
.
.
دولی گوزیله باخار قزلار لاله تک باغریم لخته قان باغلار
چکوب دلدن آه آتش زا داغلى سینه می تازه دن داغلار
حرم لریم سس چکر آغلار گوزده گوز یاشی قزلاریم آغلار
اوشاقلاری قویما گلسونگر شوریله افغانه آنام باجی
.
.
بویونلارین چیگنینه قویموش دلغمین باخار قزلاریم آغلار
دولاندیروب گوزلرین گوزدن گوز یاشی آخار قزلاریم آغلار
توکوب گوزدن گوز یاشی منی یاندیرار یاخار قزلاریم آغلار
اوشاقلار احوالینه یانّام منده یانه یانه آنام باجی
.
.
نه یاخشی دور جان ویروب تشنه دینه بیر جان تازه آلماقدان
مُضایقم یوخ منیم مرهم قانیله زخم دینه سالماقدان
مقدم دور سرخ رو ئولماق زرد روئیله زنده قالماقدان
گیدوب گرکدور باتام منده سرخ رو آلقانه آنام باجی
.
.
شریکةُ الأعظمیم سنسن هر حوادثده باوفا زینب
باجی قارداش روحیمیز بیردی وار ایکی دلده بیر صفا زینب
بو چولده مندنصورا سنسن قهرمان کرب و بلا زینب
اسارت حالیله اول وارد صحنۀ میدانه آنام باجی
.
.
سموم ظلم اسدی بوچولده گلشنیم یاندی گللریم سولدی
هوانی قانلو بولود دوتدی قان یاغوب صحرا قانیله دولدی
اوجا قامت سرولَر سندى قانلو سیللرده قانه غرق اولدی
نوالی بلبللریم حسرت قالدی گلسِتانه آنام باجی
.
.
منیم قوم و قارداشیم یوخدی قارداشیم سنسن خواهریم سنسن
ائیلیم یوخدور دادیمه یتسون هم ائیلیم سن هم یاوریم سنسن
آنام یوخدور دردیمی آلسون خواهریم سنسن مادریم سنسن
اودور سنی سسلرم دائم بو همین عنوانه آنام باجی
.
.
اموبسن زهرا آنامدان سود ای بتول عذرایه ریحانه
عزیزۀ خیرةُ النّسوان زین اب بابام شیر یزدانه
سزادی مرد آفرین اولماق سن کیمی دخت شاه مردانه
دایان سیل غم قباقینده داغ کیمی مردانه آنام باجی
.
.
دایان ویرمه صبریوی باده سن که صبرین دریاسی سن زینب
وقاریوی ساخلا چون وقرین صورتیله معناسی سن زینب
طلیعۀ استقامتسن کربلانین زهراسی سن زینب
اولار آنامدان سنون کیمی دختر فرزانه آنام باجی
.
.
دایان مبادا مصیبتلر آغلادوب سنی بیقرار ایتسون
بو آغلاماقدان گوزل راقدور صبر ایله صبرون دادیوه یتسون
محبت ایتسن منه سعی ایت قویما بو آراده قانیم گتسون
تمام نشریّه لر یازسون داستان بو قانه آنام باجی
.
.
ایله بیر عالمدی آیریلیق آغلیان گرک سینه داغلاسون
دولوب بیر ابر بها تک عارضینه گوز یاشی باغلاسون
رقیه می ساخلا گوز اوسته فرقتیمده قویما چوخ آغلاسون
بو روحیم آغلار بالام گلسه ناله و افغانه آنام باجی
.
.
بو قز منی چوخ سُؤَر گئتسم واقفم باغری قانیله دولار
خزان یتر نوبهارینده باغریقان اولار گل کیمی سولار
خرابه شامده ز بس خون دل ییَر غصّه مرگ اولار
یوزی یوزومده ویرر جان بو نازنین دردانه آنام باجی
.
.
قبول ایتمه خواهش نفسون راه الفتون باغلا ای تائب
خیاله سال ئوز خطیئاتون اودلی سنیه وی داغلا ای تائب
حسینی سال واسطه حقدن مغفرت ایسته آغلا ای تائب
آقان دیر گل آلاخ غفران بیز بو نوحه خوانه آنام باجی
.
.
#حسینیه_وداع #وداع
#چکوب_عشق_یار_حسینوى_قان_دولان_میدانه_آنام_باجی
#ترکی
.
✍️ #زبدةالاشعار ✍️
.
🆔: @nohe_torki
نظر دهید