حضرت امام سجاد علیه السلام
.
.
.
مرحوم حاج حیدر خوندل
.
.
کثرت غمدن اولوب ماتمسرا عالم بوگون
سید سجاده زهرا ساخلیوب ماتم بو گون
.
.
کوفه و شامی دولاندی بو وطن آواره سی
اولمادی بیر دردینون امّا اولونجه چاره سی
کربلا زنجیرینون بوینوندا قالدی یاره سی
حقّی وار آغلار او حاله دیدۀ عالم بو گون
.
.
سیل اشگین صفحه رخساره دائم باغلادی
سینه سین آه شرر باریله یاندی داغلادی
جان ویرنجه اوز آتاسین یاده سالدی آغلادی
هر گوزه باخسان عزاسینده اولار پُر غم بو گون
.
.
عمرینی آغلار گوزیله ایلدی آخر تمام
میل ایدوب نه بیر سرین سو نه دویونجه بیرطعام
هاردا سو گورسیدی سویلردی سوسوز اُلدی بابام
قلبیمی داغلار منیم بو محنت اعظم بو گون
.
.
هر اسیرین باغلی ال هر چند قلبین داغلادی
باخدی هر کیم قید و بند ظلمه یاندی آغلادی
ناقه ده امّا بونون دشمن ایاقین باغلادی
بو مصیبت آرترور اهل ولایه غم بو گون
.
.
اهل کوفه چکدی زنجیره تن تبداریله
ایتدیلر بیماره حرمت زحمت و آزاریله
کوفه ده زندانه گتدی عترت اطهاریله
اشگیله سالام او زخمین سوزینه مرهم بو گون
.
.
آشنالر یاندی بزم عامده بیگانه دن
قتلینه اقدام اولاندا زادۀ مرجانه دن
اولدی بیر سوزش نچه جاندان گچن پروانه دن
زینبون حالی ایدر احوالیمی برهم بو گون
.
.
اهل شامین قالموشام حیرتده ظلم فاشینه
باخمیوبلر اول شهین گوزدن آخان گوز یاشینه
توکدولر گه اودلی نی لر گاه تپراق باشینه
بوجنایت فکری قالمور بیرکسه مبهم بو گون
.
.
رسمدور زنجیر دائم الفت ایلر شریله
سلم محض اولموشدی باشینده اولان تقدیریله
بزم شُربه ایتدیلر حاضر غل زنجیریله
پایۀ احکام او حالتدن اولوب محکم بو گون
.
.
دلده یوخ یارا اونون شرح ایلیم هر محنتین
چوخ چکوب شامین یولوندا اهل بیتین زحمتین
خاصّه گُل یوزلی رقیه آلدی دلدن طاقتین
حالینی فکر ایلورم حالیم اولور برهم بو گون
.
.
ویردی جان ویرانه یرده اولمادی دفن ایلین
گوشه غربت قوری یر نه گلن وار نه گیدن
اولدی نه غساله نه قبرین قازان نه بیر کفن
ایلیوب امّا بنای عشقی مستحکم بو گون
.
.
بولمورم نه طرزیله تنظیمدی برنامه سی
لوح تقدیره نه یازمیشدی مشیّت خامه سی
اللر باغلی باشیندا اود دوتوب عمامه سی
حقّی وار یانسا او حاله عالم و آدم بو گون
.
.
عشقده از بس واریدی قدرت خلّاقه سی
ریشه سالمیشدی نهادینده محبّت ساقه سی
قبرینون اوستونده جان ویردی وفالی ناقه سی
ناقۀ فکریم ایدر بو غم اَلندن رَم بو گون
.
.
تک نه مندن پنجۀ آلام آلار صبر و قرار
بوردا سسلر وای حسین وای اهل دل بی اختیار
ذوالجناح اوستن دوشنده قتلگاهه زخمدار
عرض ایدوب یارب وفای عهدیدن شادم بو گون
.
.
ایستدی چوخ روشن ایتسون اهل عشقه مطلبی
خیمگاهه گلدی دلده اَلظُّلیمه مرکبی
زلف تک آشفته حال ایتدی وفالی زینبی
سرّی وار زینب آدیله غم اولوب مدغم بو گون
.
.
چون او مرکب راکبیندن تاپدی شرمنده اوزین
قیزلارین حالین گوروب اشگیله دولدوردی گوزین
کاکلیندن اوپدی بیر قیز بیر بالا اوپدی یوزین
خلدده یانماز نجه پیغمبر اکرم بو گون
.
.
ذوالجناحین تا سسین آلدی حریم اشگبار
بولماقا حالین سکینه خیمدن اولدی کنار
گوردی بی صاحبدی یال و کاکلیندن قان آخار
صاحب عصرین اوقان ایلر سرشگین یَم بو گون
.
.
سسلدی گل عمه بو آت گورنجه حسرت باخور
قلب دنیانی شرار آهی بیر اود تک باخور
حالی چوخ پوزقوندی گوزدن اشگی دریا تک آخور
رشگ ایدر بو اشگِ چشمه چشمۀ زمزم بو گون
.
.
بیر نچه مدّت قاباق ای سرور عالی تبار
یازموشام بو نوحه نی افسرده حال و اشگبار
ایمدی دوز بیر نیم قرن اولدی الیمده خامه وار
من فقیرم لطفوه نه سائلِ درهم بو گون
.
.
.
#سبک_زینبم_جان_اوستیم … 4 سبک
.
.
#سجادیه_شهادت
#کثرت_غمدن_اولوب_ماتمسرا_عالم_بوگون
#خوندل_تبریزی #سجادیه
#ترکی
#زبدةالاشعار
نظر دهید