کربلایه شامیدن گلدی قطاری زینبون #اربعین_مطلع_اردبیلی

اربعین حسینی
.
.
مرحوم جلال الدین مطّلع اردبیلی
.
.
کربلایه شامیدن گلدی قطاری زینبون
یتدی مقصوده قوتاردی انتظاری زینبون
.
.
سالدى قارداش قبرینه بیر اوزگه حالیلن اوزین
قلبی گلدی رقته اشگیله دولدوردی گوزین
آچدی دل شرح ایلدی اول بینواگزلین سوزین
درده گلدی تازه دن قلب فکاری زینبون
.
.
قویمادی قارداش سنه اعدا ئوزوم یاس ساخلیام
جان ویرنده باجیلار تک گوزلروی باغلیام
گلمیشم ایندی حسینجان من دویونجا آغلیام
وار یانان قلبینده درد بی شماری زینبون
.
.
جان شیرین تک باسوب آغوشه قبر اطهرین
اوخشیوب آغلادی نه دلنن او شاه بی سرین
گه بوغازین یاد ایدوب گاهی کسیلمش اللرین
عالمی یاندیردی آه داغداری زینبون
.
.
عرض قیلدی السلام ای سینه سی مکسور اولان
تشنه لب ای گل بوغازی ظلمیلن منحور اولان
جسمی ای ادنی رعتیلر الینده عور اولان
وار یری قان یاش گوزیندن ایتسه جاری زینبون
.
.
هر گونی بیر ایل کچوب قارداش فراقون زینبه
قویمیوب بیر وقت راحت اشتیاقون زینبه
ویردیلر دیر نصاراده سراقون زینبه
صبری طاق اولدی گیدوب الدن قراری زینبون
.
.
سن ئوزون آگاهسن ظلم دیار شامیدن
جور بیحد یزید شوم خون آشامیدن
قورخمیوب اول بی حیا پیغمبر اسلامیدن
قاره اولدی مجلسینده روزگاری زینبون
.
.
بزم شرب ایچره ئوزون گوردون حسینجان برملا
معاویه اوغلى سنه نه ظلم لر گوردی روا
لبلروندن داد او ساعت وردی بیر چوب جفا
سلب اولوب بو ماجرادن اختیاری زینبون
.
.
گلدی پوزقون قافله قارداش مزارون گورمگه
اوخلانان عطشان بوغازی شیرخوارون گورمگه
قولاری تندن جدا اول جان نثارون گورمگه
اوج ایدوب افلاکه قارداش آہ و زاری زینبون
.
.
من سنی یارب بو زینب جانینه ویرّم قسم
خسته دل بو «مطّلع» دن قیل ئوزون رفع الم
اولما راضی کربلانون حسرتینده جان ویرم
وار یانوندا چوخ سنون شأن و وقاری زینبون
.
.
#اربعین #مطلع_اردبیلی #ترکی #زبدةالاشعار