اربعین سالار شهیدان اباعبدالله الحسین (ع)
.
✍️ #زبدةالاشعار ✍️
.
🆔: @nohe_torki
.
مرحوم حاج محمود رهبری تبریزی
.
کرب و بلایه گلموشم قارداش وفالی زینیم
بیحد جفالر چکموشم قارداش وفالی زینبم
.
بو اربعینی حق منه لطف و عنایت ایله دی
بو آلتی گوشه قبریوی زینب زیارت ایله دی
.
.
قارداش بو پوزقون قبریوه اولسون باجون زینب فدا
آل غصّه لی بو گوگلونی زینب چکوب چوخلی جفا
گلدیم دوتام بو اربعین قبرون كنارینده عزا
بیحد جفایه دوزموشم قارداش وفالی زینبم
بو اربعینی حق منه لطف و عنایت ایله دی
بو آلتی گوشه قبریوی زینب زیارت ایله دی
.
حیراندی عالم صبریمه ای سرور کون و مکان
زینب نه چکدی شامده شاهد دی خلاق جهان
نه سن خبر آل قارداشیم نه زینبون ایتسون بیان
گوز یاش دمادم توکموشم قارداش وفالی زینبم
بو اربعینی حق منه لطف و عنایت ایله دی
بو آلتی گوشه قبریوی زینب زیارت ایله دی
.
.
برنامه بو نهضتی هر یرده تکمیل ایله دیم
بو مدتی سندن حسین برنامه تحصیل ایله دیم
هر ساعتیم گیچدی یوز ایل هجرینده تعجیل ایله دیم
ایمدی وصاله یتموشم قارداش وفالی زینبم
بو اربعینی حق منه لطف و عنایت ایله دی
بو آلتی گوشه قبریوی زینب زیارت ایله دی
.
.
منده بلالی سینمی تیر غمه ایتدیم سپر
توکدوم عذاره گوز یاشی گیزلینده هر شام و سحر
کرب و بلا دشتینده من گوردون اوزن چکدیم نه لر
دیلده غمه یر ویرموشم قارداش وفالی زینبم
بو اربعینی حق منه لطف و عنایت ایله دی
بو آلتی گوشه قبریوی زینب زیارت ایله دی
.
.
نالم برادر وار یری سنسیز اوجالسون گویلره
چوخ ظلم لر اولدی حسین بو چولده آل حیدره
اود ووردولار خرگاهوه قیزلار داغیلدی چوللره
ظلم فراوان گورموشم قارداش وفالی زینبم
بو اربعینی حق منه لطف و عنایت ایله دی
بو آلتی گوشه قبریوی زینب زیارت ایله دی
.
.
اوچ گون بو صحراده سوسوز قالدى بنات فاطمه
قویدی اثر لب تشنه لیق معناده قلب خاتمه
یاندی سوسوزدان عترتین دوشدی او ساعت یادیمه
عطشان لار اشگین سیلموشم قارداش وفالی زینبم
بو اربعینی حق منه لطف و عنایت ایله دی
بو آلتی گوشه قبریوی زینب زیارت ایله دی
.
.
زهرا آنام گُل عطرینی بو قبریدن آلّام حسین
ویرسن اجازه کوینگون قبر اوستونه سالّام حسین
عزم مدینه ایتمرم بو دشتیده قالّام حسین
چوخ زحمتیله گلموشم قارداش وفالی زینبم
بو اربعینی حق منه لطف و عنایت ایله دی
بو آلتی گوشه قبریوی زینب زیارت ایله دی
.
.
قانون سبب اولدی بو یر چاتدی مقام و عزته
چکدی سنون عشقون منی قارداش دیار غربته
شکر ایلرم یوز قویموشام ایمدی بو قانلی تربته
عزت عجب کسب ایتموشم قارداش وفالی زینبم
بو اربعینی حق منه لطف و عنایت ایله دی
بو آلتی گوشه قبریوی زینب زیارت ایله دی
.
.
.
قبرون آلوب اطرافینی اهل حرم ایلور فغان
اولدی بو صحراده حسین ظلمیله گلزاریم خزان
گلدی هامی شاماتیدن قالدی او یرده بیر بالان
بو سینه ده یر ویرمیشم قارداش وفالی زیبنم
بو اربعینی حق منه لطف و عنایت ایله دی
بو آلتی گوشه قبریوی زینب زیارت ایله دی
.
.
اهل جفا ویرانه ده یر ویردی آل هاشیمه
گلدی همان ویرانه ده حدسیز بلالر باشیمه
دوشدوم بو فكره من نجه شرح ایلیوم قارداشیمه
سنسیز بلایه دوشموشم قارداش وفالی زینبم
بو اربعینی حق منه لطف و عنایت ایله دی
بو آلتی گوشه قبریوی زینب زیارت ایله دی
.
.
قالدی رقیّن شامده گلدی بو یورقون کاروان
دوتمور دیلیم شرح ایلویم ویرمور بو گوز یاشیم امان
نازلی قیزون ویرانه ده ویردی قوری یرلرده جان
قبره قویاندا اوپموشم قارداش وفالی زینبم
بو اربعینی حق منه لطف و عنایت ایله دی
بو آلتی گوشه قبریوی زینب زیارت ایله دی
.
.
شام و سحر ویرانه ده او آغلادی من آغلادیم
دیللر دیدی یاندی دلیم قلب جهانی داغلادیم
حسرتله جان ویردی قیزون منده گوزونی باغلادیم
بیحد بلایه دوشموشم قارداش وفالی زینبم
بو اربعینی حق منه لطف و عنایت ایله دی
بو آلتی گوشه قبریوی زینب زیارت ایله دی
.
.
یارب اوزون احسان ایله ویر بیر برات کربلا
بر حرمت آلعبا ای خالق ارض و سما
کرب و بلاده (رهبری) ورد ایلسون یازینبا
ورد زبانی ایتموشم قارداش وفالی زینبم
بو اربعینی حق منه لطف و عنایت ایله دی
بو آلتی گوشه قبریوی زینب زیارت ایله دی
.
.
.
.
#اربعین_رهبری_تبریزی
#کرب_و_بلایه_گلموشم_قارداش_وفالی_زینیم
#ترکی
.
✍️ #زبدةالاشعار ✍️
.
🆔: @nohe_torki
نظر دهید