کرب و بلا چولونده طوفاندی یا اباالفضل #اکبریه_شاکر_تبریزی

#کرب_و_بلا_چولونده …
#عاشورا_گونی
شهادت حضرت علی اکبر (ع)
زبانحال امام (ع) با حضرت ابوالفضل (ع)
.
.
مرحوم شاکر تبریزی
.
.
کرب و بلا چولونده طوفاندی یا اباالفضل
اوغلی ئولوب حسینون گریاندی یا اباالفضل
.
.
تل اوستونه چخوبدی قانلی عبا الینده
پرپر اولوب مناده یوخدور رمق گولونده
اشگی آخار عذاره اکبر آدی دییلنده
سلطان هر دو عالم بی جاندی یا اباالفضل
.
.
قانه باتوبدی یکسر دین حقون فداسی
آلمیش قوجاقه نعشی بیکس لرون آقاسی
داغلی اورکدن عرشه اوج ایلیر نواسی
رنگی صولوب حسینون نالاندی یا اباالفضل
.
.
ایوای دئین زمانی دشمن ایدر شماتت
اکبر باشندا واردی حیدر کیمی جراحت
لیلا یانندا اُولدم افسوس اولا خجالت
جدّی رسوله اکبر میهماندی یا اباالفضل
.
.
شاه جهان بویوردی قارداشینه او ساعت
زینب گلن زمانی ایله اوزون هدایت
قویما فغانه گلسون اول معدن کرامت
جبریل خیمه گهده درباندی یا اباالفضل
.
.
پرواز ایدوبدی قوشلار گویده نوایه گلدی
اخیامیدن چخوبدی قزلار صدایه گلدی
ترک ایتدی آسمانی حوران عزایه گلدی
قرآنه هدیه ویرمک آساندی یا اباالفضل
.
.
فریاد اوجالدی یردن اسدی بؤتون فلک لر
آچدی باشین سماده ایوای دئدی ملک لر
زینب نوایه گلدی دوندی قانا اؤرک لر
اکبر شهید راه قرآندی یا اباالفضل
.
.
#اکبریه_شهادت #اکبریه #شاکر_تبریزی
#کرب_بلا_چولونده_طوفاندی_یا_اباالفضل
#ترکی
#زبدةالاشعار