کوچ ائدور ای شامین اهلی، شامدن عصمت قطاری #کوچ_شام #تائب_تبریزی

کوچ اهل بیت از شام
.
✍️ #زبدةالاشعار ✍️
.
🆔: @nohe_torki
.
#سبک_ای_ویرن_ویرانه_یرده
.
مرحوم تائب تبریزی
.
کوچ ائدور ای شامین اهلی، شامدن عصمت قطاری
قالدی بو شهروزده مهمان، بیر حسینون یادگاری
.
.
میزبان تک سیزده اولسون، شیوۀ مهمان نوازی
سالمیون شام ایچره گوزدن، بو مه چرخ حجازی
دلده چوخدور دردی واردور، دلستانه چوخ نیازی
وار ثوابی گوگلون آلساز، اسگیلر دلدن شراری
.
.
بسکه حسرت چکدی قلبی دردیله دولدی بو یرده
باغرینی دوندردی قانه گل کیمی سولدی بو یرده
عاقبت دوشدی ایاقدان غصه مرگ اولدی بو یرده
خوابگاه ائتدی رقیّم بو خراب اولموش دیاری
.
.
بوردا بو روح روانیم غملره توش اولدی قالدى
دیل دئدی، دردیله دائم بو هم آغوش اولدى قالدى
نطقدن شیرین زبانیم دوشدی خاموش اولدى قالدى
لاله تک دوندردی قانه بو دل زار و فکاری
.
.
گوهر دریای عصمت معدن وقر و ادب دور
عزت و شأن عجم دور دختر شاه عرب دور
هم گوزی زهرا باخیشلی هم ئوزی زهرا نسبدور
بوردا بیله یادگاری قویدی زهرا یادگاری
.
.
شربتی اشک تر اولدی خون دل دائم غذاسی
ناز ائدن وقتینده اولدی درد و غم لر آشناسی
شمع عیشی سوندى الدن گئتدی ایستگلی آتاسی
بو بالام قالدی یتیمه یاندی قلب داغداری
.
.
نسگلی چوخدور ئورکده جان وئروبدور زار و خسته
شامده ائلسیز دوشوبدور بو بلالی دلشکسته
بیرکسی بو شهرده یوخ چوخ گلون سیز قبری اوسته
قویمیون باتسون غباره بو قیزین پوزقون مزاری
.
.
گونلرین باشه یتوردی غم لریله نسگلیله
قلبینی یاندوردی یاخدی اود توکن آه دلیله
دل یاران سوزلر دییردی دم به دم شیرین دیلیله
لعل لبلردن ائدردی صحبت جانانی جاری
.
.
ائل قبیله یوخ یانیندا حلقۀ ماتم قورون سیز
اوخشیون ویرانسرانی شیونیله دولدورون سیز
قبری اوسته لیل جمعه شمع ماتم یاندورون سیز
قویمیون ظلمتده قالسون بو مزار غصّه باری
.
.
بو قیز آز عمر ائتدی اما چوخ بلا اولدی باشیندا
یوز قویوب دیواره حالین شرح ائدردی گوز یاشیندا
آغلیوب مرگ آرزوسی ایلیردی اوچ یاشیندا
مستجاب ائتدی دعاسین عاقبت پروردگاری
.
.
یاد ائدون دردوز داشاندا سیز او غملر مبتلاسین
چوخ مجرب دور ائدر تئز اولسا هر دردوز دواسین
قبرینه سالساز آلارسوز هر مریض اولسا شفاسین
چیخماسون هرگز یادوزدان قبرینون بوس و کناری
.
.
آرتورون سیز احتشامین سیزلره حشمتدی قبری
ساخلیون هم احترامین بیر بویوک نعمتدی قبری
دردمند اهل شامه کوکب حاجتدی قبری
ایلیوب روشن بو مدفن شام تیره روزگاری
.
.
بو قیزین هجرانی قویماز صبر اودلی داده بوللم
یثربه گئتسم دوباره بوندان اؤتری شامه گلّم
سو سپوب اشگیله گرد قبرینی زلفیمله سیلّم
قبرینه اوللام مجاور کسب قیلّام افتخاری
.
.
« تائبا» گئت سنده شامه گور مزار مشک خیزین
باغرووا باس بیر ضریح شور خیز و عشق ریزین
شوقیله ائله زیارت شاه عطشانین عزیزین
تا صفای باطنیله پاک اولا قلبون غباری
.
.
.
#کوچ_شام #تائب_تبریزی
#کوچ_ائدور_ای_شامین_اهلی_شامدن_عصمت_قطاری
#ترکی
.
✍️ #زبدةالاشعار ✍️
.
🆔: @nohe_torki