اربعین
.
.
مرحوم حاج داود بیدق داری
.
.
گلمیشم دیداره ای شاه لب عطشانیم حسین
دوشموشم دیلدن ولی محکمدی ایمانیم حسین
.
قد خمیده زینبون قربان بو توزلی قبریوه
فیض وصل یارینی چوخدان گزور جانیم حسین
.
تللین اوستوندن گئدن گوندن سنون بیماریوم
باخ منه یاز نسخه می ای درده درمانیم حسین
.
مختصر عرض ایلیوم شام اهلی قارداش نیلدی
آشکار اولسون سنه درد فراوانیم حسین
.
سن یخلدون قتلگاهه من آدامسیز خیمه ده
ساحل علقمده قالدی قولسوز اصلانیم حسین
.
قول قولا باغلاندی قیزلار باشلیوب یول قافله
ساربان اولدی بو یوللاردا نگهبانیم حسین
.
عشقون آسان ایلدی اولده هربیر مشگلی
یوردی دردون عاقبت سخت اولدی آسانیم حسین (1)
.
وارد اولدوق کوفیه سن نیزه ده من ناقه ده
اولدی مین کرب وبلا هر ساعت و آنیم حسین
.
آشنالر ال چالوب بیگانه لر قان آغلادی
سندی صفلر آغلادی فوج یتیمانیم حسین
.
من علینون مکتبینده درس ایمان آلمیشام
مکتب عشق علیده یوخدی نقصانیم حسین
.
سنمادیم بیگانیه سندیرمادیم ئوز وقریمی
سندیروبدور دشمنی هر یرده برهانیم حسین
.
گولدی هر کیم عشقیمه آغلاتدیم آخرده اونی
حقون اثباته یتوردوم طبق پیمانیم حسین
.
موجیلی دریا کیمین نطقیله توفان ایلدیم
تیتره دوب قصر عبیداللهی توفانیم حسین
.
سن تلاوت ایلدون قرآنی نوک نیزه ده
قانه دوندی ناقه ده بو قلب شان شانیم حسین
.
اوندا چالدیم محمله منده بلالی باشیمی
اولدی رنگین قانیله زلف پریشانیم حسین
.
کوفه دن چخدیم ولی دوشدوم بیر آیری مشگله
شهر شوم شامیده یاندی دل و جانیم حسین
.
داش وران کیم؟ ال چالان کیم؟ محشر اولدی زینبه
یاندی جان و دل توکوب اود چشم گریانیم حسین
.
ایلمه مندن گلایه داش دگنده دینمدیم
قوللاریم باغلیدی چون اولموردی امکانیم حسین
.
وئردیلر یئر آغلیان قیزلاریوه ویرانه ده
دولدی هر صبح و مسا اشکیله دامانیم حسین
.
بیر گجه قانلی باشون گلدی خرابه منزله
قانلی باشون بیر طبقده اولدی مهمانیم حسین
.
آلدی آغوشه رقیه تا یارالی باشووی
غصه مرگ اولدی او دمده نازلی جیرانیم حسین
.
قالدی زهرای سه ساله اربعینه گلمدی
کسدی هجران نغمه سین مرغ غزلخوانیم حسین
.
الده جان نقدی گلوب «داور» سنون درباریوه
موریدور درگاهیده سنسن سلیمانیم حسین
.
(1) (که عشق آسان نمود اول ولی افتاد مشگلها)
.
.
#اربعین
#گلمیشم_دیداره_ای_شاه_لب_عطشانیم_حسین
#بیدقداری
#ترکی
#زبدةالاشعار
نظر دهید