در مقام خامس آل عبا (ع)
.
#زبدةالاشعار
.
: @nohe_torki
.
مرحوم انور اردبیلی
.
کیم حسین ذکرین ائدوب رتبه اکبر تاپدی
مس عبدیتی اکسیره چاتوب زر تاپدی
.
کیم تفکر ائلیوبدی دوشونوب کیمدی حسین
دفتر معرفت و همّتی زیور تا پدی
.
بو شهه نوکر اولان یتدی شکوه ابده
او شکوهی که نه دارا نه سکندر تاپدی
.
هوس کویؤن ائدن مأمن معنا گوردی
عطش عشقی اولان چشمۀ کوثر تاپدی
.
کارگاه ازلیده یوخ حسینون مثلی
عرضیت ئوزونه گور نجه جوهر تاپدی
.
چهرۀ خلقت حسینیله ایشقلاندی بلی
ماسوالله عجب رونق و منظر تاپدی
.
آفرین مکتب قرآنه حسین ساز اولدی
کنز اسلامه صد احسن بئله گوهر تاپدی
.
بیر شهیدی که اونا نوحه دیوب روح الامین
بوالبشر ناله ائدوب باغ مشجر تاپدی
نوح گردابه دوشوب قیلدی توسل او شهه
ساحل امنه چخوب کشتی سی لنگر تاپدی
.
#عید_قربان
.
گتدی اسماعیلینی ذبح ائلسون ابراهیم
امتحانینده عجب نمرۀ بهتر تا پدی
.
سس گلوب کسمه بو قربانووی ال ساخلا خلیل
امریمیز خاتمه ای پیر دلاور تاپدی
.
فدیۀ أعظمه قربانیوی تبدیل ائتدوک
سربلند اولدی منا جلوۀ برتر تاپدی
.
حیرته سالدی بو جریان خلیل اللهی
چون تعجب گتورن حکم مقرر تاپادی
.
دئدی اسماعیله جنّت قویونی اولماز عوض
آزمایشده بالام درسینی ازبر تاپدی
.
کیمدی بو ذبح عظیم نسبت اونا ابراهیم
بو گذشتیله گنه رتبۀ احقر تاپدی
.
سس گلوب باخ باشوون اوستونه دقّتله خلیل
باشینون اوسته باخوب نور مدوّر تاپدی
.
گوردی بیر شخص مجللدی همان دایره ده
باخدوقیجا اونا بیر عالم دیگر تاپدی
.
یوز دوتوب حقّه دئدی کیمدی بو انسان جمیل
نقشۀ صورتینی بیله مصور تاپدی
.
رشتۀ جانیم اسور گل یوزونه باخدوقجا
بو گوزل شخصه ئوزون روح مسخّر تاپدی
.
مرحبا خلقته هانسی صدفون درّیدی بو
آفرینش گل آچوب نخلی گوزل بر تاپدی
.
وجهیوی گوستره یارب بیله مرآت اولماز
ذات پاکون ئوزونه اولمیا مظهر تاپدی
.
ساحت قدس خدادن بو ندا گلدی خلیل
باصفا قلبین ئوزون یاخشی منور تاپدی
.
نور ایچینده گورونن شخصه باخوب یاخشی تانی
اونی یاخشی تانیان جنّتیمه در تاپدی
.
نسل پیغمبر خاتمدی سنون نسلوندن
کیم اونا دشمن اولا خیر ایتوروب شر تاپدی
.
نام نامیسی حسین مرتبه سی ذبح عظیم
حقّینه عارف اولان وحدته باور تاپدی
.
ایکی نهرون آراسندا سوسوز اللرده ئولر
لوح پر قدر قَدَردَه بو مقدّر تاپدی
.
#قتلگاه
.
عصر عاشور یتوب حکم قضا آلدی یرین
قلب مقتلده یرین سرور محشر تاپدی
.
آلننی قویدی قزل قانه آخان تربتنه
باشلادی ذکرینی تکرار مکرر تاپدی
.
بورودی قتلگهی زمزمۀ یا قدّوس
یاره یالواردوقجا لذّت او سرور تاپدی
.
قان دولان گوزلره باخ ذکر دیین لبلره باخ
کیم عبادتده بئله شأن موقّر تاپدی
.
یاره لی سینیه باخ قانی آخان قلبینه باخ
عاشق صادق عجب منصب اشهر تاپدی
.
قویدی زینب باجسین شیعه لری قیلدی دعا
مرحبا شیعه لره گور نجه رهبر تاپدی
.
الى گویدیدی هله امتی ایلوردی دعا
ناگهان مقتله یول شمر بداختر تاپدی
.
الله الله سسینی کسدی امامون او دنی
چخدی بیر سینیه که زلزله گویلر تاپدی
.
بوسه گاه نبوی خنجریله بوسه لشوب
فاطمه هول ائلدی بیر قره معجر تاپدی
.
خامس آل عبا ذکرینی تعقیب ائلسون
ئوزونه نیزه باشین عرشۀ منبر تاپدی
.
فکر غارتله قوشون خیمه لره یوز قویدی
چادر اهل حرم شعلۀ آذر تاپدی
.
خیمه لر یاندی بناتون باشینا کول یاغدی
شعله دن هر بالا قز اوچماقا شهپر تاپدی
.
ترک ائدوب محورینی تنگه دوشن اولدوزلار
هر ستاره ئوزونه غصه لی محور تاپدی
.
قوماق اولماز قاچانی کوفه لیکر قوؤدی ولی
یورولوب گیزلنه نی فرقۀ کافر تاپدی
.
قمچیلر اندی بدنلر گویروب قول سندی
اولمیان ظلمی قوشون اهلی میسّر تاپدی
.
صحنۀ قتلی وروب صحنۀ غارت دالیا
مغربین خجلتیله خسرو خاور تاپدی
.
ایکی قز خار مغیلانه پناهنده اولوب
قول بویون اولدی گزوب زینب مضطر تاپدی
.
#شام_غریبان
.
قورخولی قزلارى جمع ایلدی یانمش چادرا
فاتح شام ئوزونه غصّه لی لشکر تاپدی
.
یاره لى طفللرون باغلادی بیر بیر یاراسین
استراحت مگر اول بانوی اطهر تاپدی
.
بالش ائتدی ئوزونه هر بالا قز ئوز قولونی
یورولانلار یوموشاق تپراقی بستر تاپدی
.
باشنا دوشدی قرا بخت ربابون یوخوسی
نه او دیلسیز بالانی نه اونی اصغر تاپدی
.
قویاقون صحبتی بوردا گئدگون قتلگهه
هاردا مأوا گورگون سرور محشر تاپدی
.
فاطمه یوسفینون کوینگی وار یا سویولوب
کوینگی گئتدی ایشی بس هارا منجر تاپدی
.
مقتله واردی گلن یا که تردد کسیلوب
سوز سوزی چکدی بورا قلب ایوی اخگر تاپدی
.
#مهمانان_قتلگاه
.
یوز قویوب مقتله بیر بیر گیجه سویقونچیلاری
فرصت غارت اَوَل بجدل ابتر تاپدی
.
مشتری اولدی حسینون گوزل انگشترینه
بارماقین آلدى اله قانیله احمر تاپدی
.
اهرمن بزم سلیمانی وروب بیربیرینه
رعشه ظلمیندن اونون گنبد اخضر تاپدی
.
بیر یارا وردی او سلطانه چخارتدى اوزوگون
فوق ایدیهم اَلَه اَل او ستمگر تاپدی
.
قانلی انگشتری غارت ائلیوب، دو شدی پولا
مقتلی امن دئمه یارهلی پیکر تاپدی
.
بیر قرالتی گنه گورسندی گلور گوداله
تازه بیر وحشت او صحرای غم آور تاپدی
.
بندۀ عشق الهینی ساتوب بند زره
نقشۀ ظلمی او بی رحم و سبکسر تاپدی
.
ساربانیدی یوخیدی ئوزونون اسلحه سی
دولانوب قتلگهی بیر پارا خنجر تاپدی
.
پردۀ رمزده کچدوم سوزی القصّه پارا
هر یتیمون باشنا ال چکن اللر تاپدی
.
کربلانون چولی گهواره کیمی ترپندی
بو نه مطلبدی وقوع أی حق داور تاپدی
.
ساربان گئتدی قوناقلاردا گلوب جنتدن
کربلانون چولینی باغ معطر تاپدی
.
مصطفی فاطمه، قارداشی حسن، شیر خدا
یرده خلقت گُلنی دوره ده پر پر تاپدی
.
فاطمه گلدی دیله اهل صفا بزمینده
گِله عنوانی او خاتون مطهر تاپدی
.
امتون سیّدی گور اوغلووی نه حاله سالوب
بئله حالدا بالاسین هانسی پیمبر تاپدی
.
نه گلوب قزلاری دیداره نه اهل حرمی
نه گلوب قارداشنی غصّه لی خواهر تاپدی
.
زینبون چوخ ایشی واردی گله بیلمز بو گجه
چرخ او مظلومی یتیم قزلارا مادر تاپدی
.
أذن و ئرسون دُؤشرم ساچلاریمی سینه سینه
پرورش سینه ده بو نازیله پرور تاپدی
.
گلمینلر عوضینده یاخارام زلفیمه قان
ئوزونه یاخشی حنا بو آق هوروکلر تاپدی
.
دئدی بیر اوخشاما زلفین بویادی القانه
هانی عبّاسون حسین ال سنه لشگر تاپدی
.
بدنون بوردا قالوب قانلی باشون مقتلده
هانسی شاهون باشی قانلی کولی افسر تاپدی
.
شأنیوه غبطه ائدر بدر و احد قربانی
سن تاپان رتبه نی نه حمزه نه جعفر تاپدی
.
نوحه یازماق چتین ایشدور او قدر صبر ایستور
اوتوز ایلدن صورا بو سوزلری «انور» تاپدی
.
.
#حسینیه_مدح #حسینیه_شهادت
#کیم_حسین_ذکرین_ائدوب_رتبه_اکبر_تاپدی
#ترکی
#یادگار_انور
.
#زبدةالاشعار
.
: @nohe_torki
نظر دهید