حالات دفن حضرت خاتون محشر(س)
.
#زبدةالاشعار
.
: @nohe_torki
.
رضوی زنجانی
.
گئجه وقتی ویریلوب فاطمیه غسل و کفن
مخفی تشییع اولونوب دخت نبی فخر زمن
بالالار سالدى یولا یعنی آنا تابوتین
نصف شب قبر ائوینه گیتدی او مجروحه بدن
.
.
دوشه یا رب گوروم اود ظلم ائوینه جبر ائوینه
نجه مولا او گئجه حاکم اولوب صبر ائوینه
آیریلوب شیر خدا فاطمه دن دلده فغان
نجه تاپشوردی یارالی بدنی قبر ائوینه
.
.
دیدی گویا ائویمین زینتی زهرا سنیدون
باور ایله دیزیمین طاقتی زهرا سنیدون
گور نجه قانه دونوب فاطمه سنسیز اورگیم
دهریده قولّاریمیون قدرتی زهرا سنیدون
.
.
بیزدن آیریلدون ایا شافع محشر بو گئجه
گللرین رنگی سولوب اولدولا پرپر بو گئجه
گوز یاشی جاری ایدور سسلنور الآن بالالار
وای بیزه قبره گیدور یاره لی مادر بو گئجه
.
.
باد محنت بو صولان گلشنی اینجیتدی خانم
حقّیوی غصب ایدن اعدا سنی اینجیتدی خانم
جسمیوه غسل ویرن وقتیده بیر صحنه گوروب
اؤرگیم قانه دونوبدی منی اینجیتدی خانم
.
.
راضی اولمازدون حسین صورتی گل مثلی سولا
راضی اولمازدون على قلبینه غم غصّه دولا
غم هجرون منه دشوار اولوب الآن زهرا
قورخورام فاطمه سندن صورا عمروم چوخ اولا
.
.
گیدورم منزله بحر غمی طوفان گورورم
باخورام قیزلاریمی زلف پریشان گورورم
چیخیرام صحنیده محسن گوز ائوینده گورونور
نصفی یانموش قاپودا فاطمه جان قان گورورم
.
.
آیریلیق غصّه سی بو طاقتیمی دلدن آلوب
مرتضی شیر خدا اؤزگه بیر احواله قالوب
سن که یومدون گوزیوی حیدر ائویندن گیتدون
فاطمه منزیلیمه ابر محن سایه سالوب
.
.
قدر تیم واردی منیم تیغ شرر باری چکم
نسخه ی عمرینی ظالملرین عالمده بوکم
درس عبرت ویرم اول ظلم ایدن اشخاصه ئوزوم
فرقۀ فتنه گری بیر بیرینون اوسته توکم
.
.
ولی نیلوم منه بیر سوز شه والا بویوروب
تابعم من او سوزه اول گل یکتا بویوروب
عمرینون گلشنینه صرصر أسن وقتینده
صبر ایدم حقّه گوره غملره طاها بویوروب
.
.
سنسیز ای فاطمه منزلده داخی غم سوزی وار
حسنین قاره گیوب غصه و ماتم سوزی وار
خرداجا زینبیمی من نجه آرام ایلیوم
زینبین یعنی سنه دلده بیر عالم سوزی وار
.
.
آنام اولسیدی دیر که غمیم اولمازدی منیم
ساری گل مثلی یوزوم هجریده سولمازدی منیم
بحر غم دلده بو گونلر داخی جوش ایتمزیدی
آنام اولسیدی دلیم دردیله دولمازدی منیم
.
.
آناسیز خردا قیزین چون یوخی گلمز گوزونه
چوخ سؤور که آنا گلسون قولاق آسّون سوزونه
آناسیلا دانشان گونلری هم یاده سالار
گوزیاشی جاری ایدوبدی دانشار ئوز ئوزونه
.
.
ای گل گلشن فردوس و جنان فاطمه جان
محنتنده ایدورم آه و فغان فاطمه جان
شمع عمرون که سنون دهریده خاموش اولدی
فاتح خیبر اولوب قدّی کمان فاطمه جان
.
.
هر زمان دوشسه گوزوم اول در و دیواره خانم
مرتضانی محنین ایلیر آواره خانم
«رضوی» سوز بیله گلدی داخی قورتار سوزیوی
دل پُر دردیوه عالمده ایدر چاره خانم
.
.
.
#فاطمیه_رضوی_زنجانی
#فاطمیه_شهادت
#ئجه_وقتی_ویریلوب_فاطمیه_غسل_و_کفن
#ترکی
.
#زبدةالاشعار
.
: @nohe_torki
نظر دهید