گئجیله یثربی ترک ایلینده میر هدا #خروج_مدینه_سیفی_اردبیلی

خروج از مدینه و گریز به حالات حضرت صغری (ع)
.
#زبدةالاشعار
.
: @nohe_torki
.
سیفی اردبیلی
.
گئجیله یثربی ترک ایلینده میر هدا
گلوب نوایه یقین روح حضرت زهرا
.
نوای فاطمه دن غم دوتوبدی نه فلکی
بو نوحه نی خانم اوّل ئوزی دیدی گویا
.
سؤنوب چراغی حسینون قاپوسی باغلاندی
اولور جلای وطن ظلم الیله آل عبا
.
اراده ایتدی حسین مکّه و منا اوغلی
که راه کعبه دن ایتسون ورود کرب و بلا
.
حیالی قزلارینا بانوان عصمتینه
اولون بویوردی مهیّای درد و رنج و بلا
.
اگرچه مقصدیمز کعبه، کبریا ائویدور
او یرده واردی گوزل مشعریله مروه صفا
.
منای کعبه ده حُجّاجیلر کسر قربان
عظیم کنگرۀ عشق ناب اولار برپا
.
بیزیم بو حجّیمز امّا منایه چاتمیاجاق
بیله مقدّر ایدوب حیّ داور و دانا
.
نه ایم وار الده گرک سوق ابتلایه چکم
گرکدی حجّ حسین نینواده باشه چخا
.
او شوره زار بیابان کی کربلادی آدی
ئوزی گرک عرفات و فراتی زمزم اولا
.
مراد عشقه وظیفمدی ایلیم تقدیم
حروف ابجد یزدان برابرینده فدا
.
بودور قرار الستیم گوزل نگاریمله
او چولده من ایلیم قانلی قتلگاهی منا
.
او یرده گرم اولاجاقدور شهادته بازار
او یرده قان اولاجاقدور فروش ایچون کالا
.
اَوَل شهید بنی هاشم اکبریمدی منیم
شبیه سنّیده زهرایه صورتاً طاها
.
تعهّد ایلمیشم زینبون اسارتینه
گرک ننم باجیمون غصّه دن باشی آغارا
.
دیار ماریه ده واردی خورداجا بیر تلّ
او تلّون آدی گرک تلّ زینبیه قالا
.
شهادت امری منیمدور اسارتی باجیمون
ایکیمیز ال بیر اولوب عشقه ویرمشوق امضا
.
بو عشقه اهل حرم هاموسی سهیمیدیلر
اوشاق بیوگه اسارتده یوخدی استثناء
.
ایاق یالین قاچاجاق هاجران وادی عشق
گلین قیزیم گزه جک چوللرى قولاقی یارا
.
رقیه دور بو دیارون سه ساله زهراسی
اونوندا سیلی یوزین اوخشادار جوان آناما
.
نگار بیر قوزی قرباندا ایستیوب مندن
ذبیح عشق اولا لازمدی شیرخواره بالا
.
اسارته اولوب آماده بانوان حرم
شهادت عشقینه مردان حق دوشوبدی یولا
.
اوشاق بیوک هامی ایودن چخوب بدون درنگ
قالوب او بیت امامتده بیر خانم صغرا
.
دوشوبدی قافله دن آیری چون مریضه ایدی
یوخیدی دیلده تواناسی دیزلرینده قوا
.
دوروب گیدنلرینه باخدی بوینی چگننده
عجب دیدی منی گوزدن سالوبسان آی دنیا
.
قالوبدی غملر الینده بو ایوده رشتۀ جان
گیدور طبییم الیمدن کسیلدی راه رجاء
.
گیدوم بو حالیله آیا دؤیوم کیمون قاپوسین
کیمون الیندن آلوم من شرار قلبه دوا
.
چراغی سؤنمش ایویمده امیدیم اکبریدی
آیردی مندن او یوسف جمالی دست قضا
.
گُلیندن آیری دوشن بلبله قفسدی چمن
مریض درد فراقه نه مرهم و نه شفا
.
اورک یانور باخورام دلنوازیمون یرینه
زمانه ایلدی مندن او مه جمالی جدا
.
اقلاً اولمادی قسمت طویون وطنده گورم
الى حنالی گزنده باخام گوزل بؤیونا
.
قضا بیچوبدی منه درد و غصّه پیرهنی
جوانلیقمدا بو دنیا الیمه ویردی عصا
.
وروبدی جغد شحن خیمه عز و ناز ایومه
انیسیم آه جگر دور رفیقیم اشک و نوا
.
دولاندی چرخ زمان کئچدی هفته لر آیلار
خبر بیلنمدی صُغرا گیدوب طبیبی هارا
.
اوره گی غصّه لی غم دیزلرین قوجاقلاردی
الردى دامنه قان یاش اولاردی نوحه سرا
.
دیردی آخ نه یامان سؤندی بختیمون چراغی
نه گئجه وار نه گونوز تیره منزلیمده ضیا
.
چکلمیوب هله ایودن رقیّه نون عطری
گوزومده جلوه لنور دمبدم او گل سیما
.
شیرین سوزی خوش اداسی دوشنده خاطریمه
دیرم هاردادی گویچک غزال طُرفۀ ادا
.
گوزوم گزر سحر آخشام رباب صود أمرین
اقلاً اولمادی فرصت بو ایوده قرخی چخا
.
سسیمه سس ویره نیم یوخ دارخمشام غمدن
دلیم اَلُولی قولاق سسده گوز قالوب قاپیدا
.
اذان سسی اوجالار جانیمه دوشر رعشه
شرار حسرتیله شمع جسم اولار یغما
.
ئوز ئوزیمه دیرم اکبریم گیدن گئجه سی
داراخلادیم قاپونی ایتدیم التجا آتاما
.
آپار دئدیم منیده زنگ کاروانوز اولوم
قوجا بیر عورتیلن قویمیون قالام تنها
.
یریمَه سَه ایاقیمدا دلیم که سالمدی
شیرین شیرین دانشوب وئرّم اصغری یوخیا
.
منی ربابیله بیر محمله سوار ایلیون
او خسته اولسا دیوم اصغره ئوزم لالا
.
مریضه سن دیدی سن کارواندا اینجورسن
گرک مریض اولانا جای استراحت اولا
.
نه استراحتیم اولدی نه قالدی جان منده
فراق اودی اریدوب جسمیمی ایدوبدی فنا
.
نه بیر قاپومی دوگن وار نه حالیمی سوروشان
ئوزوم ئوز ئولمگیمه ایلورم همیشه دعا
.
اورگیم ایستوری بیر گون چخا بیلم ایودن
بو شهری بیر دولانام دیلده آه و واویلا
.
قوناق گیدم خانم امّ البنین منزلینه
عم اوغلومی گورم احوالینی اولام جویا
.
عم اوغلی عم قیزی بیر باش باشا ویروب دانشاق
یاناق ایکی ساری پروانه مثلیده بیر اودا
.
اونوندا ایندیه گرد بلا دوتوب یوزینی
یقین اودا چخا بیلمور منیم کیمی قاپیا
.
عمومدان اولسا اگر سر سلامتی خبری
آتامدا ساغدى یقیناً بحول ذات خدا
.
اگر بیلم ئولوب عبّاس عموم ایویم یخلار
حسینه بیر خطر اولماز ساغ اولسا گر سقّا
.
.
.
#خروج_مدینه_سیفی_اردبیلی
#حضرت_صغری
#گئجیله_یثربی_ترک_ایلینده_میر_هدا
#ترکی
.
#زبدةالاشعار
.
: @nohe_torki