در بعضی از حالات حضرت علی اکبر (ع)
.
.
.
مرحوم ذهنی تبریزی
.
.
محبّت عالمینون سیرین ایتسه فکر دقیق
محلّ و منشأ اصلیّه سین ایدر تحقیق
.
محبّتون که وار اون مرتبه مقاماتی
ظهور ایدر آنالاردا تمام علاماتی
.
هامی مراتبی هر جزء جزئیاتی تمام
آنا اوغول آراسیندا گلور ظهوره مدام
.
او استناد که وار مدّعایه اصل دلیل
همان حکایت هاجردی حبّ اسماعیل
.
علاوه بیر سَنَدی که ثبوته حجّت دور
حسینه فاطمه دن اولدوقی محبّت دور
.
آنانون علقۀ مخصوصی واردور اولاده
علی الخصوص اوغول اولسا اوزوده شهزاده
.
اودا جوان اولا ناکام اولا ملک منظر
اونون حیاتین آنا اوز حیاتی فرض ایلر
.
جوان اوغول آنانین وردی ذکری صحبتی دور
گوزونده نور بصر دلده دیزده طاقتی دور
.
اوغول وجودینه نفسین ایدر وقایه آنا
اوغول یولوندا سالار اوز اوزون بلایه آنا
.
آنائیله اوغولون عالم محبّتده
بیر اوزگه عالم مخصوصی وار حقیقتده
.
آنا اوغول نظراً هربیریسی بیر جاندی
حقیقتین دوشوننده ایکیسی بیر جاندی
.
آنا وجود اولا بالفرض اوغولدی ماهیّت
که فرع اصلسیز عالمده تاپماز حیثیّت
.
اوغول که گیتدی هر حیثیّتی گیدر آنانون
جلال و وقر عظمت ،عزّتی گیدر آنانون
.
آنا گوره ایدوب عزم سفر جوانی گیدر
بیله تصوّر ایدر عین جسم و جانی گیدر
.
خصوص بیر سفری که اولا ئولوم سفری
بروز ایدر آنادا اوندا احتضار اثری
.
دوشر گوزی دورانه چیخار باشیندان هوش
سیزیلدیوب او قدر غشّ ایدر دوشر خاموش
.
خدا بولور که نه چکدی او گون خانم لیلا
علیّ اکبری قربانگهه سالاندا یولا
.
گوزون تیکوب اوغولون سرو قدّ قامتینه
که بلکه توشه دوتا آیریلیخ قیامتینه
.
باخور اوغول یوزی آی تک نظرده جلوه لنور
گورور غروبی یاخینراخدی گوز یاشی النور
.
یقین ایدوب داخی بیرده اوغول گوره هیهات
الی اورکده گزورحسرتیله واله و مات
.
آنا اوغول ایدر حیرتله بیر بیرینه نظر
نه لیلی بیر دانیشیردی نه بیر علی اکبر
.
اولوبلا هر ایکیسی بیر بیرینه محو خیال
نه جسمیده حرکت واریدی نه دلده مقال
.
اوغول گوزی آنادا متّصل ایدر افغان
آنا اوغول گوزونه گوز تیکوب باخار حیران
.
اورک دولی سوزوله وار دانیشمالی سوز چوخ
ولیک دیلده ادای کلامه قدرت یوخ
.
دینموری علی گیتمه مباد قلبی سینا
اولا مخالف مقصودی یوز ویره غم اونا
.
گلور ال اوزسون آنالیخ محبّتی قویمور
نقدر ایگلور اوپور باغرینا باسور دویمور
.
خیال ایدور اوز اوزون بلکه ایلسون آرام
گورور که اولموری سلطان عشق عقلینه رام
.
گلور اورکده آنالیخ محبتی جوشه
عزیز جانینی جان تک باسور بیر آغوشه
.
الی ایاقی دوشوب لرزیه اوزون ایتیرور
دورانموری ایاق اوستونده دیزلری تترور
.
چوکور یره که دوشنسون اوغول ایاقینه
اوغول باخیر بو اوزاقدی ادب سیاقینه
.
دوتوب الیندن اوپور عرض ایدور آنام صبر ائت
غریب آتام باخیری غصّه ویرمه خیمیه گیت
.
سن آغلیاندا مبادا بابام چکه خجلت
دوباره دن یتیشه قلب پاکینه محنت
.
بو قدر ساخلاما قربانیوی یول اوستونده
گورنده نعشیمی آچ زلفووی یول اوستونده
.
او وقت آغلا گوررسن بویانمیشام قانه
یارالی نعشیمی باشسیز سالوبلا میدانه
.
ایتی قلجلاریلا دوغرانیبدی گل بدنیم
آنا گوزوندن ایراخ اولماز اوندا دفن ایدنیم
.
غریب آناسین او شیرین مقال ایدوب آرام
گلوب عقابه طرف ایلدی رکابینه رام
.
قویوب رکابه قدم زین ایوینده دوتدی قرار
بعینه اولدی رسول خدا براقه سوار
.
پیمبر ایلدی معراج قرب دلداره
ولیک اکبر ایدوب عزم محضره یاره
.
فراز تلّه چیخاندا او ماه نورانی
تجلیّاتی ایشقلاندیریب بیابانی
.
گورنده جلوۀ نورین سپاه دل ظلمات
تمام عالم حیرتده قالدی واله و مات
.
یاخونلادوقجا او شهزاده قوم بد کیشه
اوزاقلاشیردی او کج قومدن کج اندیشه
.
بیری بیرینه دیردی سپاه بد فرجام
بونون قتالینه بیز هرگز ایتمروق اقدام
.
اولار صحیفۀ تاریخیمیزده لکّۀ ننگ
اگر ایداق بو جوان ملک صفاتیله جنگ
.
بیریسینون اولا حق و مروّت و انصاف
جهانی ویرسن اونا ایلمز بونیله مصاف
.
اگر قلیج چکه بیر کس بو نوجوان یوزونه
چکوب خطا قلیجی خالق جهان یوزونه
.
حسینون امرینی از بس که سالموشوخ تنگه
بو ماه پارۀ آفاقی گوندروب جنگه
.
اوزوب امیدین اوزوندن دویوبدی جانیدن
که ال چکوب بیله بیر ماه رو جوانیدن
.
یاناردی قلبی سپاهین حسینین عالمینه
که بیله گل بدنی گوندروب قلیج دمینه
.
توکوب سلاح گوتوردی تمام جنگیدن ال
دیردیله بونا یاره ووران ال اولسون شل
.
یتوب سپاهه او مه پاره گوز دولاندیردی
چکوب لجامین آتین عرصه ده دایاندیردی
.
او شاهزادیه لشگر باخاندا دقّتیله
تمام حیرته دوشدی سپاه شدّتیله
.
دیردیله بو پیمبردی ایلیوب رجعت
گوروب حسینینی یالقیز گلوب ایده نصرت
.
محالیدور که ایداق بیز پیمبریله قتال
بو خاطره که یزید لعین اولا خوشحال
.
اولور قیامته دین اهل کفره تکیه کلام
که اوز پیمبرین ئولدوردی ملّت اسلام
.
تمام بیر بیره دگدی سپاه کوفه و شام
یزید ضدّینه آز قالدی ایلسینله قیام
.
گوروب بو شورشی سعد اوغلی چکدی بیر فریاد
که ای جماعت اولون قید فکردن آزاد
.
بو ماه پاره خیال ائتمیون پیمبردور
ولیک باشدان ایاقه رسوله بنزردور
.
بو بنزریش اثر صنع حیّ اکبردور
شبیه صورت پیغمبر اسمی اکبردور
.
چکوب بو صورتی کلک مصوّر ازلی
وجود لوحینه تصویر مصطفی بدلی
.
ایدوب پیمبره مرآت عارض پاکین
ویرور حسینه نشان عکس شاه لولاکین
.
نه وقت همهمه دور بو نه جای وحشتدور
تمام فکروزی اشغال ایدوب نه غفلتدور
.
نقدری قان توکولوب نعشیلر قالیب بی سر
حسینین امری اولوب بو مقامه تا منجر
.
کمکلری قیریلیب بس که چاره سی کسیلیب
صف قتاله گمانی بو نوجوانه گلوب
.
چکون قلیج لاریزی دوغرییون بو ناکامی
بو گونده نایل ایدون کامه والی شامی
.
آتاسی گورسه باتیب قاننه بو فرزندی
یقین ایدون قیریلیر قلبینین رگ و بندی
.
او قدر یاره وورون جسمی چاک چاک اولسون
غریب آتاسی باخیب غصّه دن هلاک اولسون
.
بو فکر باطل عبث ایتمسون سیزی دلگیر
مقام همّت و دعوادور ای سپاه دلیر
.
بو گون اولاردا که وار حبّ شوکت دنیا
گرک امام و پیمبردن ایتمسون پروا
.
او سست عهد سپاهی عمر ایدوب اغوا
اولوب تمامی دوباره مصمّم دعوا
.
دل آچدی نطقه او آزاد زاد شهزاده
فصیح بیر رجز عنوان ایدوب او اثناده
.
تانیتدیریب او سپاهه آتا باباسین، اوزون
یتورممیشدی تمامه هنوز دیلده سوزون
.
او دم خروشه گلوب بکر آدلی بیر ظالم
فنون رزمه او جاهل واریدی چوخ عالم
.
دئدی من ایمدی گیدوب بو جوانی ئولدورّم
حسینه شربت زهر فراقین ایچدورّم
.
کمال کبریله میدانه ایلدی سرعت
ایدوب مقابله نور منیریله ظلمت
.
اولاندا اکبریله روبرو او شرّ لئام
فراز تلّیده دورموشدی شاه عرش مقام
.
سالوب توجّهنی جان و دل چکیده سینه
باخاردی مرکز میداندا نور دیده سینه
.
او دمده زینب کبراده انتظاریله
باخاردی قارداشینا چشم اشکباریله
.
گوروب که سولدی حسینون جمال گلناری
سارالدی رنگی اولوب گوز یاشی یوزه جاری
.
دئدی حسین نیه بس حالون اولدی دیگرگون
نه غم یتیشدی سنه ایلدی بیله محزون
.
بویور گوروم آنام اوغلی نه واقع اولدی مگر
علی اکبری ئولدوردی یوخسا دشمنلر
.
بویوردی باجی هنوز اکبریم سلامتدور
منی بو حاله سالان اوزگه بیر علامتدور
.
گلوب قتالنه بیر پهلوان نام آور
که چوخ شجاع و قویدور او دشمن داور
.
عرب حساب ایدر ابطال عمده دن بکری
نظیری آز تاپلور چوخدور حیله و مکری
.
مقام رزمده مین آتلویه برابردور
اونا اگر چه رشادتده فائق اکبردور
.
ولی ایچوبدی سو سیراب اولوب دگل او سوسوز
عطشدن آلمیوب اود دوتمیوب جگرلری سوز
.
علیّ اکبرین امّا عطش قرارین آلوب
خصوص محنت و غم الدن اختیارین آلوب
.
ایشیتدی بو سوزی زینب چکوب جگردن آه
دئدی علاج ندور ای سپهر حکمته ماه
.
ایشتمیشم دئدی جدّیمدن اولما باجی ملول
آنا دعا ایده اوغولون اولور دعاسی قبول
.
دایانما تیز خبر ایله آناسی لیلایه
که فرض دور بو گون اکبر دعاسی لیلایه
.
اوتورماسون دئ دیل آچسون دعایه مستعجل
جوانین حفظ ایده بلکه خدای عزّ و جل
.
اوغول آناسینا فوراً یتوردی زینب اوزین
دیوب قضیّه نی اشگیله دولدوروردی گوزین
.
آنا ایشیتدی که وار اوغلونون باشندا بلا
الین ووروب الینه چکردی آه و واویلا
.
ال آتدی معجرینی باشدان آچدی آتدی یره
که نوجواننه دلدن دعای خیر ویره
.
الینه زلفین آلوب چکدی آه آه اوسته
آچوب نیاز دلین بی نیازه آهسته
.
توکوب سرشک یوزه باشلادی مناجاته
دیردی دردینی فیّاض اهل حاجاته
.
ایدردی عرض که ای خالق رؤف و رحیم
قالوبدی پنجۀ دشمنده پارۀ جگریم
.
بالام جواندی دگل فنّ حربده عامل
ولی حریفی قتال آزموده دور کامل
.
تفضلاً بو دعانی قبول ایله مندن
علیّ اکبریمی ساخلا شرّ دشمندن
.
ای التفاتیله یعقوبه یوسفی یتورن
منیمده یوسفیمی حفظ قیل یتور منه سن
.
سنون یولوندا اونی گرچه ویرمیشم قربان
ولی اورکده واریمدور بیر آرزو پنهان
.
گلییدی بیرده گوریدیم یوزین گیدیدی گینه
گیچیدی باشیله جاندان قتال ایدیدی گینه
.
دعا اجابته یتدی حضور یزداندا
قبول اولوب اثری ظاهر اولدی میداندا
.
قلج الینده ایدوب حمله اکبر اوستینه بکر
اولوندی ردّ او حمله قایتدی اهلنه مکر
.
علی سلاله سنون تیغی برق تک ناگاه
هواده اوینادی بیر روشن اولدی میدانگاه
.
ایله جلادتله بکرون اندیروب باشنا
او کافرون باشی گویا بولوندی اوز باشنا
.
او ضربتیله نفسدن سالوب او بیعاری
وجودین ایتدی لباس حیاتدن عاری
.
سالوب یره او خبیثون جنازۀ نحسین
گلوب مروّته دشمنلر ایلدی تحسین
.
غریب آتاسی دا تلّ اوسته بیر دئدی احسن
فدا رشادتیوه ای جوان مستحسن
.
بالا گورنده آتا مرحمتله سسلندی
قولینا قوّه گلوب تازه دن هوسلندی
.
رموز رزمه آپارمیشدی کاملاً چون پی
چکوب عقابینه مهمیز تیز پی در پی
.
ز بس ویروب فرسه فارسون فراستی پر
اوچاردی آت دیه سن بس هواده بی شهپر
.
جدا ویروب یره بیر آت دولاندیروب پرکار
معاینه دولانوب نقطه باشنه پرگار
.
چکوب لجامین ایدوب جست و خیزدن اونی رام
تهورّیله دوتوب قلب عرصه ده آرام
.
گوروب بو قدرتی دوشدی هراسه لشگر کین
صلابت آلدی هامی پهلوانلارین اورگین
.
مبارز ایستدی یوز دوتدی قومه هر سودن
جواب گلمدی اصلا سپاه ترسودن
.
قلوب لشگری دوتموشدی بسکه وحشت او دم
جسارت ایتمدی بیر کس قویا قتاله قدم
.
ال آتدی قائمۀ تیغ تیز خون ریزه
هجوم ایدوب او سپاه شریر خون ریزه
.
ایله ووراردی قلج قوم بدسگاله علی
گورن دیردی گلوب عرصۀ قتاله علی
.
صعود ایدوب انوب هر دمده تیغ صاعقه دم
آچاردی خرمن عمر عدویه راه عدم
.
ایدوب باباسی شه لافتی تک بیر جنگ
سالوب فشاره سپاه اهلین ایتدی عرصه نی تنگ
.
او قدر باشی بدندن ایدوب الی قولدان
که خسته اولدی وجودی دوشوب اوزی قولدان
.
علاوه جسمینه دگمیشدی بیر نچه یاره
که آرتیریردی عطش شدّتین او بی یاره
.
او حالیده دولانوب باخدی بیر خیامه طرف
گوروب تجلّی ده تلّ اوسته ماه برج شرف
.
گورنده شعشعۀ نور نیّر عشقی
قرار و طاقتین آلدی تحیّر عشقی
.
آتا محبّتی از بسکه قلبینه دولدی
چکوب قتالیدن ال مایل حضور اولدی
.
اوزون یتوردی حضور امام عطشانه
اوپوب ادب یرین عرض ایتدی شاه ذیشانه
.
بابا اماندور علاج ائت عطشدن اودلاندیم
علی الخصوص قتال ایلیوب یارالاندیم
.
پوزوب صفوف سپاهی نظامیدن سالدیم
یره نقدر سوار عظامیدن سالدیم
.
هنر هنرسیز اولان اهل شامه بولدوردوم
رشادتیله نچه پهلوانلار ئولدوردوم
.
سالوب آتین دوشونه قوم آل سفیانی
حقارتیله دولاندورموشام بیابانی
.
گییوم آغیر بدنیم یاره من اوزوم خسته
چوخ اینجیدیم اوتورا بولمدیم عقاب اوسته
.
دئدیم جمالیوی بیرده گلوم زیارت ایدوم
زیارتونده اگر گلسه بیر تجارت ایدوم
.
نظرده نفع بودور ای امام تشنه جگر
که بیر ایچیم ویره سن سو منه تاپیلسا اگر
.
جگر حرارتین عرضیم بودور که سوندوره سن
قولوما قوّه ویروب قلبیمی سویوندوره سن
.
او قوّتیله قولوم تا قلج دولاندورسون
منه مبارز اجل کاسه سی دولان دورسون
.
باخوب جوانینه حسرتله سرور مدنی
گوروب گییوم قیزاریر بسکه قان ویرور بدنی
.
گل جمالی سولوب کهربا کیمی سارالوب
قرار و طاقتین الدن عطش نه که وار آلوب
.
آچوب هر ایکی قولون انتهای رأفتدن
او سرو قدّی باسوب باغرینا عطوفتدن
.
بویوردی سوز عطش ناتوان ایدوب دیلیوی
ویر ایمدی کامیمه شیرین زبان اوغول دیلیوی
.
آتاسی کامینه دل ویردی اکبر ناکام
گوروب آتاسین اوزوندن او تشنه خشکین کام
.
گوگول حرارتینه اولدی بیر علاوه سبب
دالی دالی چکیلوب بیر قدر اوکان ادب
.
دیدی بغیشله بابا بوقصوری مندن سن
که من دیدیم سوسوزام بولمدیم سوسوز سنسن
.
بو فکردن نجه گیچمیشدیم ایندی ده گیچرم
قلج دمینده ئولوم شربتین گیدوب ایچرم
.
دوباره عطف عنان ایتدی کارزاره گلوب
ایله قتال ایلدی لشگر آه و زاره گلوب
.
گینه او قدری پیاده سواره ئولدوردی
انین و ضجّه قوشوندان فضانی دولدوردی
.
پوزوب داغیتدی صفوف سپاه بدشیمی
یاروب گچردی نجه که یارار نهنگ یمی
.
او وقتیده که علی اکبر اهتمامیله
دولاندیروردی قلج همّت تمامیله
.
بیچوب توکردی یره پاره پاره اعدانی
ئولن قالان قوشونا تنگ ایدردی میدانی
.
بیر آدی منقذ اوزی شمر شوم کینینده
گزردی اکبر شهزاده نین کمینینده
.
دئدی که بوینوما گلسون عرب وبالی اگر
قویام خیامه گیده بو جوان تشنه جگر
.
گیدردی آردیجا ایتدوقجا شاهزاده مصاف
که بیر محلّیده فرصت تاپوب او بی انصاف
.
کلاف رشتۀ بیدادیدن اله اوج آلوب
قلج شل اولموش الینده هوایه بیر اوجالوب
.
قلنجی غیظیله اندیردی تا او کان خطا
دوز اندی حیف قلج ایتمدی عملده خطا
.
او مه جبینون ایله دگدی زوریله باشینا
بولوندی آی کیمی باش اگلنوب قلج قاشینا
.
قان آخدی گوزلری دولدی بویاندی مه عارض
جمال زردینه بیر رنگ سرخ اولوب عارض
.
دوشوب خسوفه داخی اولمادی او مه طالع
ایدوب اونون اثری لیلینی سیه طالع
.
چکیلدی پردۀ رخ مه عذار لیلایه
نجه که پرده چکر ابر تار لیل آیه
.
یاراسی مهلکیدی الدن آلدی یاراسین
کمان تک اگدی قد سرو عالم آراسین
.
باش آخدی اگلشه بولموب داخی عقاب اوسته
اگوب قویوب آتینون بوینونا باش آهسته
.
آچوب ایکی قولون آت بوینونا حمایل ایدوب
گهی گلوب اوزونه گه آت اوسته هوشه گیدوب
.
نه قان قویاردی گوز آچسون باخوب یولی گورسون
نه دیزده واریدی قوّه که مرکبین سورسون
.
او حالتینده که دولموشدی قانیله گوزلر
بونی بولوردی آناسی باجیسی یول گوزلر
.
لجامی بوشلادی آت مطلق العنان اولسون
که بلکه خیمیه یوز دوندروب روان اولسون
.
دیردی دورما عقاب ایله خیمه گاهه شتاب
دایانما همّت ایله منده قالمادی داخی تاب
.
اماندی یخما یره ویرمه اهل شامه منی
او قدر ساخلا یتور منتظر آنامه منی
.
زبسکه واریدی تعلیم و مشق او حیواندا
یول آختاروردی گزردی صفوف عدواندا
.
که بلکه راکبینون میلینی اله گتوره
او پاره پاره جوانی آناسینا یتوره
.
او باوفا فرس هر سمتدن ایدردی یولون
گچردی بیر صفی بیر اوزگه صف کسردی یولون
.
کیمی سینین اوگون ئولموشدی یار و یولداشی
کیمی سینین آتاسی یا عموسی قارداشی
.
اودور که لشگر هامی داغ بر دل اولموشدی
تمام قلبیلری کینه ئیله دولموشدی
.
او شاهزاده نون اطرافینی آلوب لشکر
کسوب یولون ال آچوب فرقۀ شقاوتگر
.
قلج دی هی انور هی متّصل هوایه گیدور
تصوّر ایتمه انن بیر قلج هوایه گیدور
.
یتن گورور که وجودینده یوخدی بیر یری صاف
گینه ویرور یارا رحم ایلمور او بی انصاف
.
بیریسی قلب گوزیله باخا او بی یاره
بولر نقدر دگوب یاره اوستونه یاره
.
خلاص اولانمادی اهل جفا کمندیندن
که دوغرانوب بدن آیریلدی بند بندیندن
.
دولاندوروردی او آت پاره پاره صاحبینی
او ورطه دن چکه بلکه کناره صاحبینی
.
بو مطلبی که اولور طبع منطقم گویا
کتاب مقتله بعضی لری یازوب گویا
.
چیخوب کناره او یردن که قانلی بیر یمیدی
یتیشدی بیر یره اهل اناثه مخیمیدی
.
بیر عورتون نظری غفلتاً عقابه دوشوب
گوروب بیر آت گلور اما عجب عقابه دوشوب
.
دولاندیریبلا او قدری لجامی پاره لنوب
ویروبلا راکبین از بس اوزوده یاره لنوب
.
اونیله بیر خبر ناگهان تازه گلور
یواش یواش یرور اوستونده بیر جنازه گلور
.
گلوب برابره بیر دقّتیله سالدی نظر
گوروب آت اوسته دوشوب بیر مه ملک منظر
.
جواندی صفحۀ رویونده یوخ علامت خط
ولی قلج بدنینده چکوب خط اوستونه خط
.
جمالی آی گوزی شهلا هلاله بنزر قاش
بشر یوزونده ملک صورتی چکوب نقّاش
.
ایدوبدی حسنونی تکمیل هاشمی خالی
که حسن حسن دگول اولسا خالیدن خالی
.
یانوب اونا اورگی چکدی قلببدن بیرآه
دیدی بونون آناسی اولمییدی کاش الله
.
اگر آناسی جوانین بو حالیله گورسه
آز ایلیوب اوز اوزون غصّه سیندن ئولدورسه
.
یاناردی قلبی سرشگین توکردی آغلاردی
اوغول آناسی کیمی سس چکردی آغلاردی
.
او شاهزاده سس آلدی گوروب آنا دلیدی
بله گمان ایلدی خیملر مقابلیدی
.
خیال ایدوب آنام آگاه اولوب بو رازه گلوب
بوناله صاحبی لیلادی پیشوازه گلوب
.
دئدی آنا گل آپاردی منی قان آز آغلا
گوزون یاشیله یو زلفونله یاره می باغلا
.
بو یاره لر بدنیمدن آلوب توان ئولورم
یتوب دوداقیمه جانیم داخی جوان ئولورم
.
او عورت آنلادی وار شاهزاده نون آناسی
علاوه سوزشه گلدی اورکده کی یاراسی
.
دئدی گرگ بو جوانی آناسینا یتورم
آت اوسته ویرمیه جان اقرباسینه یتورم
.
آتین لجامینی دوتدی او رحم دل عورت
که بلکه فعلیله اوز قولینه ویره صورت
.
تلاش ایدوب آپاروردی خیامه مستعجل
بو امره غافلیدی وار یول اوسته دام اجل
.
بیله بولوردی ئولومدن اونی کنار آپارور
ولیک بولمزیدی قاتله شکار آپارور
.
یتوب او وقتیده یعقوب عسقلان دنی
گوروب آت اوسته او صد پاره دوغرانان بدنی
.
لجامی آلدی او بیچاره دن او بد فرجام
دئدی بو خدمتیوه ویرم ایمدی من انجام
.
نچه قدم آرالاندی باخاردی عورت هنوز
شقاوتین او ستم پیشه فوراً ایتدی بروز
.
نه قلبی رحمه گلوب حال زار اکبردن
نه شرم ایدوب نه اوتاندی خدای اکبردن
.
تصوّر ایتمدی گچمز خدا خلافندن
ال آتدی خنجرین عریان ایدوب غلافندن
.
اشاره ایتدی ایکی کتفینون آراسیندان
یوخییدی صاف یری ووردی قلج یاراسیندان
.
ویران دلیر قولی قوّه لی ایتی خنجر
بدن لطیف نه مانع نه حایل دیگر
.
او نازنین بدنون دگدیقی یرین بیچدی
یتیشدی هر یره خنجر دایانمادی گیچدی
.
او سخت یاره جگر بندینی گسست ایلدی
ایله قولوندان آلوب طاقتین که سست ایلدی
.
نفس شماریه دوشدی توکندی تاب و توان
اوزون آت اوسته داخی ساخلیانمادی او جوان
.
اولان زماندا سرازیر صدر زینیندن
بیر آه چکدی قاباقجا دل حزینیندن
.
او خشک اولان دیلیله ایلدی ادای کلام
ادبله سویلدی بابا علیک منّی سلام
.
بولوردی چون عطشیندن آتاسینون غمی وار
بو باره دن دل پاکینده درد مدغمی وار
.
دئدی بابا بودی جدّیم منه سو ایتدی کرم
که یعنی بول نگران اولما ای شه اکرم
.
گوزی یولوندا قالوب ساخلیوبدی سو سنه ده
یتورسون الده کی جامی او لعل سوسنه ده
.
آتا اوغول سسین آلدی بولوب باشیندا نه وار
کمال سرعتیله اولدی ذوالجناحه سوار
.
یتیشدی رزمگهه شاه اولیا ولدی
دیردی شیونیله این انت یا ولدی
.
گیدردی صاق و صولا آختاراردی جان و دلین
گهی دیردی اوغول گه دوتاردی غصّه دلین
.
گزوب تفحّص ایدردی قد صنوبرینی
یتیشدی بیر یره قان ایچره تاپدی اکبرینی
.
بیر آز قالوردی اوزون ذوالجناحیدن آتدی
اورک دوگوندی دیزی تیتردی نفس باتدی
.
دوروب گیدنمدی بیر آز دیزی دیزی گیتدی
سوروندی هولیله تا نوجوانینه یتدی
.
یانیقلی بیر دلیله صیحه چکدی یا ولدا
همین بو کلمه سینی یتدی دفعه ایتدی ادا
.
گوتوردی باشینی یردن آلوب دیز اوسته امام
نقدر باغرینا باسدی دل اولمادی آرام
.
نه سوندی نار محبّت نه سوزی اسگیلدی
تصوّر ایله حسینه نقدر نسگلدی
.
باخوب جوانینه آرتیردی آه و افغانین
الیله دیشلرینون سیلدی توپراقین قانین
.
یوزون قویوب یوزونه تا او قانینه باتانین
اوغول قانی بویادی آغ محاسنین آتانین
.
اوغول اوغول دئدی هر قدر گوردی سس گلمور
ایدوب معاینه گورسون گلور نفس گلمور
.
طبیب حاذق ایدوب مه یوزون اونا مرآت
دوتوب نفسگهینه ایتدی کسب معلومات
.
گوروب هنوز نفس وار عزیز جانینده
ولیک قان آپاروب طاقتینده جانینده
.
بویوردی یاتما اویان آچگوزون جوانیم اوغول
منیله بیر دانیش ای مایۀ روانیم اوغول
.
می وصالی اوزون ایچدون اخذ کام ایلدون
آتاوی زهر فراقونله تلخکام ایلدون
.
نه تیز غروبه یتیشدون سحر ستاره سی تک
اوزون گیدوب منی ظلمات غمده قویدون تک
.
نه بی مروّتیمیشلر بو رحمسیز لشگر
سنی بو حاله سالوب ای جوان گل پیکر
.
دوتوم که قتلون اوغول قصد قوم ناکسیدی
باشونداکی بو قلج یاره سی سنه بسیدی
.
دور ای محبّتی باش فکرینی باشیندان آتان
بوقدر دشمن الینده قالوب کمکسیز آتان
.
هجوم ایدور من بی یاره فرقۀ ناکس
دور آل اله قلجون دشمنون قباقینی کس
.
اویان گوز آچ آتاوین باخ بو قانلی گوز یاشینا
افّ اولسون عهدینه توپراق بو عالمین باشینا
.
دیمه بونشئه ده سندن صورا دایانّام علی
ستمله قانه بو گون سن کیمی بویانّام علی
.
بو ورطه ده داخی سنسیز ثبات اولا منده
بیر آز دایان گلورم سن گیدن یولی منده
.
خوشام بو جانی ویرم جانستانه بو یرده
گیدوب خیامیده کی حشری گورمییم بیرده
.
دوشوبدی خیمه لره سندن اوتری شور نشور
باجون سکینه گوزی یولدا دلده نالۀ شور
.
یقین ایدوب که قلجلار یازوب بو گل جسمی
اوزی رسالۀ محنتدی جسمیدور اسمی
.
کتاب غمدن ایدوب درسین ایندیدن ازبر
او خوش زبانین اولوب وردی وای علی اکبر
.
آنان بولوب که سنی سولدوروبلار ای گل یاس
سن ئولمه میش باش آچوب خیمه ده دوتوب سنه یاس
.
وصیّتون وار اگر گل دیله بیان ایله
اورکده ساخلاما درد دلون عیان ایله
.
آتا سسی یتیشنده اوغول قولاقینه
او حالدیدی که یتمیشدی جان دوداقینه
.
او صون نفسده مسیحا نفسدن آلدی نفس
حزین حزین سسیله سویلوب ای شه بیکس
.
یتور سلامیمی لیلایه سینه داغلاماسون
تسلّی ویر اونا مندن صورا چوخ آغلاماسون
.
دوباره ضعف اولوب عارض توانینی آلدی
نفس قییتدی دوشوب دیلدن ال ایاق چالدی
.
آتا جمالینه حسرتله بیرده بیر باخدی
شهادتینی ایدوب ذکر گوزلری آخدی
.
گتوردی درده قلوب ملایک و روحی
چکنده شهقه که آیریلدی جسمیدن روحی
.
آتا گوروب بالا جان ویردی حالی بس نولدی
بیله دیولّه که گویا حسین او وقت اولدی
.
باخوب جوانلارینا دوره ده او کان شرف
بویوردی قارداشوزی حمل ایدون خیامه طرف
.
گورورسوز ئولدی جوانیم گوزوم قباقینده
جنازه سی قالا قویمون آتا قوجاقینده
.
دیوب تمامیسی لبّیک قصد نصرتیله
ولی باخاردی جوانلار او نعشه حیرتیله
.
خیال ایدردیله ال ویرسالار او نعشه اگر
تماماً آیریلاجاخ بند بندیدن پیکر
.
باخوبلا حملی گرک بر سبیل عقل اولسون
عبایه چولقادیلار تا جنازه نقل اولسون
.
دینمرم که نجه خیمه گاهه حمل اولدی
ولیک شور قیامتله خیمه لر دولدی
.
اوجالدی عرشه او دم اهلبیتدن آواز
دیردیلر گلور اکبر گلون ایداخ پیشواز
.
بویوک کیچیک هامی صبرین حصارینی یخدی
مخدّرات تماماً خیامدن چخدی
.
ایله ایدردیله شیون چکردیلر فریاد
گورن او حالی پیمبر وفاتین ایلدی یاد
.
ستاره وشلر او مه پیکری آرایه آلوب
تمامیسی قمر اوسته صف ستاره سالوب
.
او نعشین عترت پیغمبر آلدی دور برین
توکردی قیز گلین عورت عذاره اشک ترین
.
بویوک کیچیک بیله آغلاردی هایهائیله
که دولدی بادیۀ نینوا نواییله
.
فغان و شیونیله عرشه اوج ایدوب سسلر
بیری اخا بیریسی وای جوان اوغول سسلر
.
بیری دیردی که شهزاده اکبریم ایوای
بیری دیردی شبیه پیمبریم ایوای
.
بیری یولار سر زلفون بیری دیر قارداش
سن ئولمییدون ئولیدی بو گون باجون ایکاش
.
خیامیدن هامی چیخمیشدی دیشره خرد و کبار
ولی اوغول آناسی اوز یرینده دوتدی قرار
.
قرار و صبری الیندن اگر چه گیتمیشدی
اوغول غمی اونی بیتاب و طاقت ایتمیشدی
.
تعجّبم او محبت او عشقیده بیر آنا
گوره که گلدی اوغول نعشی خیمه ده دایانا
.
نقدر فکر ایدورم صبرینه نه اولدی سبب
گلور خیالیمه لیلانی ساخلامیشدی ادب
.
مباد گورسه اوغول نعشینی چکه ناله
اوغول آتاسی خجالت چکه بو احواله
.
همان گونی او خانم بولمورم ایدوب نجه شام
صباح اولاندا که ایستردی اولسون عازم شام
.
دولاندی قتلگهی لیلی ملول و غمین
یتیشدی بیر یره تاپدی نشان درد و غمین
.
گوروب اوغول نه اوغول دوغرانوب تمام اعضا
چیخوب اوزوندن اولوب منظرینده تیره فضا
.
ایکی الیله ویروب باشینه دئدی علی جان
سنی گورونجه بو حالیله کاش ئولیدی آنان
.
سنون تک اوغلی ئولن بیر آنا حیاتی نئدر
ئولومدی حقّی نجه آرزو حیاتین ائدر
.
بهار عمرومه بیر نوبهار ایدن گلیدون
امیدیم عالمینه مایۀ توکّلیدون
.
عجب امیدیمی یأسه زمانه دوندردی
بهار عمرومی چوخ تئز خزانه دوندردی
.
آنان بیرعمر، گون آی ایل باشا یتورموشدی
سنون کیمی اله بیر سرو قد گتورموشدی
.
که بیله گونده اوغول سایه سینده دالدالانا
نه اینکه نعشیوه باخدوقجا گون اوگونده قالا
.
عجب یتوردی منی آرزویه دور زمان
بو روزگارون امان دور گردشیندن امان
.
یارالی سینوه باخدوقجا سینه دن یانّام
گوگول زبانه چکر اود دوتوب الولانّام
.
.
#اکبریه_شهادت
#محبت_عالمینون_سیرین_ایتسه_فکر_دقیق
#ترکی
#زبدةالاشعار #اکبریه #ذهنی_تبریزی
.
نظر دهید