گئنه دل مژده وئرور مهدی زهرا گله جک #معروف_اهری #مهدیه

یا مهدی
.
✍️ #زبدةالاشعار ✍️
.
🆔: @nohe_torki
.
معروف اهری
.
گئنه دل مژده وئرور مهدی زهرا گله جک
پسر منتقم ام ابیها گله جک
گله جک جان علی مرشد دانا گله جک
هامی درد اهلی دیور غم یئمه مولا گله جک
نگران اولما ئورک بیر گونی مولا گله جک
.
.
.
گئنه ای اهل ولا عهد و وفا صحبتی وار
شکر حق زمزمه لطف و عطا صحبتی وار
عاشقان غم یئمیون عشق و صفا صحبتی وار
حکمتیلن آچیلور باب رجا صحبتی وار
صاحب عصر گلور مهدی بیا صحبتی وار
قطره لر حاضر اولون وصلت دریا گله جک
.
.
.
گله جک مهدی زهرا که جهان گلشن اولا
گله جک منجی حق گوزلریمیز روشن اولا
گله جک اهل زمین حادثه دن ایمن اولا
گله جک ذکر بیا مهدی اگر دلدن اولا
قویمیاق نعمت وصلون دادینی الدن اولا
بی ریا سسله دئنن گل آقا ٬ آقا گله جک
.
.
.
دولی فتنیله دئنن عصر و زمان اولدی آقا
فلکین حادثه دن قدی کمان اولدی آقا
بعضی انسانلارا دین سفره نان اولدی آقا
آقالار آلدی قاشین شکل زنان اولدی آقا
قوجالار تیپ جوان ووردی جوان اولدی آقا
گؤره سن پیر و جوان اصلینه آیا گله جک؟
.
.
.
آقاجان حجب و حیا گوهری ارزان ساتیلور
جان وئرور روح بشر حرمت انسان ساتیلور
فقر دنیانی آلیب نان شبه جان ساتیلور
مرزی یوخ فاجعه نین مرزده نسوان ساتیلور
دین و ایمان و شرف گؤر نجه ارزان ساتیلور
داخی بونداندا بتر روز مبادا گله جک؟
.
.
.
کوچه بازاری دولانماق آقا چوخ مشکل اولوب
یانوب ایمان بوداقی شاخ نجابت کول اولوب
سنگ و میزان بشر گور نقدر یونگول اولوب
فصل خرمندی خانملار ساچ آچوب سنبل اولوب
خاردن کمدی اگر ئوزگیه خاطر گل اولوب
نچه سین یولدا قویوب گر ائوه تنها گله جک
.
.
.
قاریشوب رنگ و ریا نیت و اعمالیمیزه
جن و انسان و ملک آغلیور احوالیمیزه
بوشلی دوشدوق آقاجان عزت و اجلالیمیزه
چوخ چتین نایل اولاق کعبه آمالیمیزه
سنی درک ایتماق آقا بسته دی اقبالیمیزه
طالع و بختیمیز آیا سر سودا گله جک ؟
.
.
.
حقلی سن گر آقاجان ایندی ظهور ائتمیه سن
هله غیبتده قالیب عرض حضور ائتمیه سن
عالمی غرق صفا عرصه نور ائتمیه سن
بیزی حسرتده قویوب قلبه عبور ائتمیه سن
یانسون اول قلب که سن اوندا خطور ائتمیه سن
قلبلر وصلینه گر اولسا مهیا گله جک
.
.
.
ایستیسوز باغ وصالینده گئدوب گل دره سیز؟
ایستیسوز شاخه گل نرگسه گل گؤندره سیز؟
ایستیسوز مهدی گله قامت سروین گؤره سیز؟
ایستیسوز مقدمینون آلتدا دوشوب جان وئره سیز؟
ایستیسوز فیض ظهورین سر وقتین بیله سیز؟
قوی دییم هانسی زمان نرگس زیبا گله جک
.
.
.
اوندا که یئر دیل آچوب دور زمان گلدی دیله
اوندا که پرچم وجدان بشر دوشدی اله
اوندا که عالم ئوزی عامل اولانماز عمله
اوندا که حاصل ایمانی بشر وئردی یئله
چوخ اوشاق وار که بیلینمور آتاسی کیمدی هله!
گلسه مولا ئورگی دردیله همپا گله جک
.
.
.
اوندا که دولدی ئورکلرده فسادین آجیسی
اوندا که یوردی بیزی غم یولونون قی قاجیسی
اوندا که قارداشینا رحم ائلمز ئوز باجیسی
نصف ایمان داغیلوب ٬ زایل اولاندا هامیسی
اوچ یوز اون اوچ نفرین کامل اولاندا سایسی
ذوالفقار الده او گون مهدی زهرا گله جک
.
#مهدیه
#گئنه_دل_مژده_وئرور_مهدی_زهرا_گله_جک
#معروف_اهری
#ترکی
.
✍️ #زبدةالاشعار ✍️
.
🆔: @nohe_torki