گردون اجل زهرۀ زهرانی آپاردی #فاطمیه_تائب_تبریزی

شهادت حضرت زهرا (س)
.
.
مرحوم تائب تبریزی
.
.
گردون اجل زهرۀ زهرانی آپاردی
باغ نبویدن گل طاهانی آپاردی
.
.
زهرا دیمه بیر كوكبۀ شمس هدایت
زهرا دیمه انگیزۀ الطاف و عنایت
زهرا دیمه گلباز گلستان ولایت
گلباز گیدوب ذوق گلستانی آپاردی
.
.
دعوت یتشوب فاطمیه دار بقادن
گیتدی اوزی قورتولدی غم دار فنادن
گیتدی ایوی امّا خانمین دوشدی صفادن
آرام و قرار دل مولانی آپاردی
.
.
مولایه گوزل یاور و یارائیدی زهرا
نطقینده اولان منطق گویائیدی زهرا
قلبینده کی تسکین و تسلّایدی زهرا
مولادن اولان صبر و تسلانی آپاردی
.
.
گُلچینه گلی دَرماقی منظور نظردی
بو رسمدی گلشنده دَرَللّر گل وَردی
گلچین اجلده گل پیغمبری دَردی
سولدوردی او زیبا گل طاهانی آپاردی
.
.
افسوس جهاندان او خانملار گوزی گتدی
گئتدی اوزی قالدی بالالاردا گوزی گتدی
گزلین غمی تک دلده قالوب چوخ سوزی گتدی
قبره اورگینده غم پنهانی آپاردی
.
.
زهرائیدی آرام دل و جانی علی نین
زهرائیدی غم یولداشی جانانی علی نین
زهرائیدی ایوده سر و سامانی علی نین
گئتدی اوزی ایودن سروسامانی آپاردی
.
.
چرخ ادبه زهره زهرائیدی زهرا
بحر شرفه گوهر یکتائیدی زهرا
هم حیدره دنیا همی عقبائیدی زهرا
مولا نظریندن هامی دنیانی آپاردی
.
.
گل صاحبی گئتدی پوزولوب فاطمه باغی
داغ اوسته على آلدی یانان قلبینه داغی
مظلوم علی نین ایوینین سُوندی چراغی
سوندوردی اجل شمع فروزانی آپاردی
.
.
افسوس علی نین او بهین یاوری گئتدی
هم مسلکی هم مذهبی همسنگری گئتدی
کشتی امید بنده اولان لنگری گئتدی
طوفان بلا وقرده دریانی آپاردی
.
.
بیر قاره بولود منزل زهرایه چوکولدی
باران بلایا سر مولایه توكولدی
بار غمیله قامت رعناسی بوکولدی
بالمرّه علیدن قد بالانی آپاردی
.
.
سویلردی که امّید دلیم سندى الهی
سنگ غمیله شیشه دلیم سندی الهی
الدن کمکیم گتدی بلیم سندى الهی
دست اجل اول قامت رعنانی آپاردی
.
.
یاندی اورگیم محنت سوزانین الینده
دویدوم جانا بو امّت قرآنین الینده
قالدی اَتگیم زینب نالانین الینده
دل طاقتیمی ناله و افغانی آپاردی
.
.
کلثوم قوجاقلار منی دلده محن آغلار
ایستر آناسین مندن او شیرین سخن آغلار
دلده آناوای گاه حسین و حسن آغلار
بو صحنه دلیمدن داخی یارانی آپاردی
.
.
تائب اگر ایستورسن اولا مشکلین آسان
قرآنیله الفت ایله هر قدر اولا امکان
قرآن اوخی قرآن اوخی قرآن اوخی قرآن
هر کس که دوتوب دامن قرآنی آپاردی
.
.
#فاطمیه_فاطمیه_شهادت #تائب_تبریزی #ترکی #زبدةالاشعار