زبانحال حضرت رقیه سلام الله علیها
.
✍️ #زبدةالاشعار ✍️
.
🆔: @nohe_torki
.
موسی آقایی اردبیلی
.
گلدون ای شه بوخرابه یری آباد ایلدون
ایوون آباد سینیق قلبیلری شاد ایلدون
بیزی غم غصه الیندن آلوب آزاد ایلدون
چوخ گوزل وقتیده بی کسلرووی یاد ایلدون
یوخودی طاقتیمیز محنت هجرانه بابا
.
.
قانلی زلفی یوزه افشان ایلیوبسن بوگیجه
چاره سیز دردیمه درمان ایلیوبسن بوگیجه
عرشین اهلین یره مهمان ایلیوبسن بوگیجه
جمله سین عشقووه حیران ایلیوبسن بوگیجه
حیف اولا گوزلرون آغشته اولوب قانه بابا
.
.
وصل جانانه نجه عارف کامل تله سر
صادقانه ایلیر طی مراحل تله سر
نکهت فصل بهاره نجه بلبل تله سر
اکبری گورمگه ای شاه اوجور دل تله سر
اولموشام عشقینه ویرانه ده دیوانه بابا
.
.
نقدر چهره ی زیبا یارادا حی قدیر
دییرم مملکت حسنیده اکبردی امیر
عشقینون اولموشام اوچ ایلدی کمندینده اسیر
کیم دیور حسنیده یوخ یوسفه عالمده نظیر
ویرمرم بیر باخیشین مین مه کنعانه بابا
.
.
کسدیلر باشووی غرق ایلدیلر یاسه منی
یوخودون پرپر ایدن لحضه خزان یاسمنی
اوقدر قمچی ویروب قولاریما زجر دنی
کیم گوروب شهپری سینمیش قوشا بنذتدی منی
که سالیبدی تورا ظلم اهلی غریبانه بابا
.
.
شمر ظالم بیزه رحم ایتمدی یولاردا بیر آز
یورقونام گوزلرووی آچ منه چوخ ایلمه ناز
بیر سوزوم واردی بیان ایلییم ای محرم راز
داخی عمم قیلا بیلمور ایاق اوستونده نماز
سن اوزون بیر نظر ایله اوپریشانه بابا
.
.
جانیما جان یارادیبدی سنی خلاق غفور
بوخرابه یری باشون ایلیوب وادی طور
لحن نوریله سنه آغلیور انجیل وزبور
بش پیمبر دولانور باشووه ای مخزن نور
اوخشیور روضه ی رضوانه بو ویرانه بابا
.
.
تا که ایراد ایلدون نیزه ده کهف آیه سینی
محکم ایتدون شرف و عشق ایوینون پایه سینی
دینین اوستن کسه بیلمز باشوون سایه سینی
تیرو خنجر نقدر ایشله ده سرمایه سینی
خنجرین آفتی یوخ شمس درخشانه بابا
.
.
.
باخدیم اولدوزلار ایچینده که تاپام آلنوا تای
آچدیلار دیل دیدیلر باخما سما سمتینه دای
بیزده کی نوری اونون آلنی ویریبدی بیزه پای
تای اولانمز او شهین آلنینا نه گون نده آی
خوش منیم حالیمه اولدوم سنه پروانه بابا
.
.
هاله تک باشوون اطرافین آلوب قان شفقی
لاله تک پرپر ایدوب لبلرووی هانسی شقی
ایله بیل توش اولونوبدی تیکانا گل ورقی
ایندی بیر بوسیه مهمان ایله بو مستحقی
بلکه روحیم اولا خسته جانا بیگانه بابا
.
.
گوزلریمدن که آخور صورتیمه خون جگر
صورتیمده بو سوزون نقشینی حسرتله چکر
میزبان رسمیدی گل مقدم مهمانه توکر
گلوموز یوخدی اگر عیبی یوخ ای نور بصر
جان نثار ایلرم الان سنه مستانه بابا
.
.
حسرتیله یارالی حلقووه دقت ایدورم
باخورام یارووه تحصیل ملاحت ایدورم
بیلمورم من نجه بو محنته طاقت ایدورم
اوزومی بوسوزه هر لحضه ملامت ایدورم
نیه جان ویرممیشم سن کیمی جانانه بابا
.
.
اهل کوفه نه گناه اوسته کسیبلر باشووی
دوغریبلار نیه عباس کیمین قارداشووی
حق دانیشدون،اودی قان ایلدیلر گوز یاشووی
قان ویریب لخته پریشان ایلیوبدی قاشووی
یا که عباسه دوتوب یاس اوکمانخانه بابا
.
.
گوشه ی چشمیله باخ عترت پیغمبرووه
یغیشوب خسته همالر کیمی دورو برووه
هامی حیراندی او قانیله دولان گوزلرووه
باشوون یاره سینین قانی آخوب لبلرووه
دوندریب لبلرووی لعل بدخشانه بابا
.
.
بوگوزل منظره که قان یارادیب شوکتیلن
گوییا نقشدی نقاش چکوب همتیلن
کیم نظر ایلسه اول منظریه دقتیلن
مست اولار جان سنه قربان ایلیر منتیلن
یول تاپار مملکت حکمت و عرفانه بابا
.
.
سنی سرمست ایلیوبدی می صهبای الست
اودی یاددان چیخادوبسان منی ای باده پرست
شمر دون ایستدی زوریله ویره نوره شکست
بیلمدی زوریله نور اولمز او بد باورو پست
اودی دالدان باشووی کسدی وقیهانه بابا
.
.
باده ی عشقووی نوش ایلمیشم سو یرینه
قویورام باش گیجه لر تپراقا پرقو یرینه
باخمیشام بوسه پیغمبر خوشخو یرینه
یاحسین سسله سم عیب ایلمه یاهو یرینه
چونکه یوخ فاصله سندن حق رحمانه بابا
.
.
ای اولان خیمه ی شاهانه سی ظلمیله تباه
ایکی دنیاده ویرن”یحیویه”عزت وجاه
عرصه ی شعرده لطفون ایلیوب “شاهینی”شاه
نظر لطفیله ” موسا ” یه ده بیر ایله نگاه
باش اگوب درگه پاکونده حقیرانه بابا
.
.
#حضرت_رقیه_شهادت
#گلدون_ای_شه_بو_خرابه_یری_آباد_ایلدون
#ترکی
.
✍️ #زبدةالاشعار ✍️
.
🆔: @nohe_torki
نظر دهید