گلدیم مزارون اوسته بیر آز دینجلَم بابا #اربعین_سیدبشیرحسینی

اربعین
زبان حال حضرت سکینه سلام الله علیها
.
#زبدةالاشعار
.
: @nohe_torki
.
سید بشیر حسینی میانجی
.
گلدیم مزارون اوسته بیر آز دینجلَم بابا
عفو ائت منی کی قویمادیلار تئز گلم بابا
.
بو آلتی گوشه قبریوی کیم گورسه آغلیار
باخدوقجا، قلبیده چوخالار درد و غم بابا
.
از بس کی چوخدی حرمتی بو آستانه نون
کیم آغلاسا قاپوندا اولار محترم بابا
.
امّا من آغلادقجا منی وُردی شمر دون
یولاّردا اِیلَدی منه چوخ چوخ ستم، بابا
.
گه وُردی سن ئوپن یوزومه سیلی آغلادیم
گه دیل یاراسی وُردی چوخالدی اَلَم بابا
.
گاهی ایاق یالین باش آچوق سالدی چول لره
باتدی تیکان ایاقلاریم اولدی ورم بابا
.
دور بیر ایاقه باخ منه گور نه پوزولموشام
قرخ گوندی غمدن آغلاموشام دم به دم بابا
.
یا سن قوجاقه آل منی یا که رشید عَموم
سن صاحب کرم سن، او صاحب علم بابا
.
دشمن بو آغلیانلارا هئچ وئرمَدی امان
گلدی دویونجا آغلیا اهل حرم بابا
.
دور پیشواز ائله دیلی داغلی بی بی م گلور
غمدن باشی آغاردی، اولوب قدّی خم بابا
.
داش آلنیوا دَیَنده بی بی م یومدی گوزلرین
وُردی باشین کجاوه یه عمّه م او دم بابا
.
شامین خرابه سینده باجیم ئولدی گلمَدی
دردی چوخ اولدی اُول بالانین عمری کم بابا
.
زوّار ائدوبدی روحینی بو قبریوه “بشیر”
یازدوقجا نوحه آغلوری الده قلم بابا
.
.
.
#اربعین_سیدبشیرحسینی
#گلدیم_مزارون_اوسته_بیر_آز_دینجلم_بابا
#ترکی
.
#زبدةالاشعار
.
: @nohe_torki