دیوانۀ حسینم …
.
.
مرحوم یحیوی
.
.
دیوانۀ حسینم درمانه حاجتیم وار
چون هر گئجه دخیلم زنجیره عادتیم وار
.
.
اورگشمیشم بو رمزی عرشون ملک لریندن
ال چکمرم حسینون قانلو اتک لریندن
فطرس تک حاجت آلام پرخون بیلک لریندن
اصغر کیمی قباقدا اعظم وساطتیم وار
.
.
فرمایش ایلیوبدور جعفر امام صادق
هر کیمسه نون حسینه ایمانی اولسا لایق
قلبینده شبهه قالماز الهام اولور حقایق
بو باره ده یازیلمیش بی حد روایتیم وار
.
.
سنگر گورر گوزیمده مژگان چشمگیری
اوز گوزلرینده گورمور اما سه شعبه تیری
بی جا مذمّت ایلور بو عاشق حقیری
بولمز نقدر حسینه عشق و ارادتیم وار
.
.
ایمان ایچینده درّ نورافکنیم حسیندور
ظلماتیده چراغ شب روشنیم حسیندور
عکس حسین بهشتیم هم گلشنیم حسیندور
هر گونده منزلیمده باغ زیارتیم وار
.
.
ای مدّعی عزیز ذات خدا حسیندور
هر گوز اونی گورنمز شمس الضّحی حسیندور
صبحه صفا حسیندور ظهره ضیا حسیندور
اول نوردن اورکده شمع هدایتیم وار
.
.
گوگدن یاغان یاغشلار یک رنگ و یک صدادور
داغدا آجی تیکاندورباغدا گل صفادور
نام حسینده مثل باران پربهادور
سن بیر آجی تیکانسان من گل طراوتیم وار
.
.
ای مدعی دخیلم گودال قتلگاهه
یوز قویموشام اوزاقدان شش گوشه بارگاهه
یانموش چوله سپیلمش خرگاهه خیمه گاهه
مصنوعی شیعه لردن قلبیمده نفرتیم وار
.
.
یا مظهر العجایب یا مظهرالغرایب
سال باشیم اوسته سایه سنسن بو باشه صاحب
سن اهل فهمه ظاهر سن اهل جهله غایب
شور محبّتوندن باشدا علامتیم وار
.
.
دنیاده بیر غریبم الله منیم پناهیم
بیر بندّ فقیرم دینیمدی تکیه گاهیم
هم تربت حسیندور طاعتده سجده گاهیم
حمد ایلرم خدایه روح عبادتیم وار
.
.
من ریزه خار خوان پر زیور حسینم
پروانه تک نثار نور سر حسینم
هم خاک پای مولا خاک در حسینم
قوم بنی اسدلن ارحامی نسبتیم وار
.
.
وقتیکه جان وئرنده گوزدن چکیلدی پرده
ظاهر اولور حقیقت سیمای خیر و شرده
تصدیق ائده رسن اوندا گرداب پر خطرده
آیا نیه حسینه دنیاده خدمتیم وار
.
.
زنبور انگبینم هر گلدن آلمارام بار
برگ محمّدیدن قلببیمده شبنمیم وار
یدّی کتاب نوحه قویدوم اوزیمدن آثار
عباسقلی آدیم دور یحیوی شهرتیم وار
محشر گونی آقامدا چشم شفاعتیم وار
.
.
#حسینیه #یحیوی_اردبیلی #حسینیه_مدح #ترکی #زبدةالاشعار
نظر دهید