زبانحال حضرت زهرا (س) خطاب به مولا علی (ع)
.
.
مرحوم انور اردبیلی
.
.
گلدی خزان سارالدی گول سولدی چمن عم اوغلی جان
آز قالوری دوشم اجل بندینه من عم اوغلی جان
.
.
دوقوز ایل عمر دور سنون امریوه عرض ایدوب بلا
ایلمیشم وظیفه می صدق و صفائیلن ادا
دردون اولاندا سعی ایدوب دردیوه اولموشام دوا
ناظر اولوبسان ایتدیگیم حرمته سن عم اوغلی جان
.
.
کلمه ی جانیلن سنی هر چاغیراندا سسلدیم
بو ایوی باغبان کیمی گلشن ایدیم هوسلدیم
خون جگر یدیم ولی دورد گل نازی بسلدیم
گللرین ایگلینمدی گل بجرن عم اوغلی جان
.
.
خلقده کیم صفیّه دور حق بگنن صفاتی وار
آینه مثلی جلوه ی حسن کمال ذاتی وار
همدموین قاباقدا چون مسئله ی وفاتی وار
ایله حلال اینجیسن فاطمه دن عم اوغلی جان
.
.
من اوگولون شبیهیم سیندیرا شاخه سین دولی
بال و پری سینان قوشام حسرتیله اورک دولی
اولدی اولان گیچوب گیچن باشلامیشام ئولوم یولی
سنده نچاره باشیمه گلدی گلن عم اوغلی جان
.
.
عمری قوتاردی خاتمین اولدی او گونکه رحلتی
گتدی جناب جبرئیل هدیه حنوط جنّتی
واردی همان هدیّه دن فاطمه نونده قسمتی
غسل ویر اول حنوطیله ایله کفن عم اوغلی جان
.
.
هرنه وصیّت ایلورم سعی ایله لوح دیلده یاز
کوینگین اوستن ایت منیم غسلومی ایتمه سوز و ساز
ساخلا سینان قابورقامی پرده ده ای امین راز
سرّ نهانی خوش دگل اولسا علن عم اوغلی جان
.
.
قویما گله جنازه مون اوستونه فوج دشمنی
قبریمه نصف شبده سن لطف ایلیوب آپار منی
خوشدی بو داغدیده نون قالسا نهاندا مدفنی
دفنیمه شرکت ایتمسون اهل فتن عم اوغلی جان
.
.
قتله یتنده محسنوم قالمادی آغزیمون دادی
اوز نفسیمدن اینجیدوم دردیمه چاره اولمادی
من گیدورم اوشاقلاریم حیف اولا خیردا خیردادی
سگیز ایله یتیشمیوب سنّ حسن عم اوغلی جان
.
.
واردی محبتون سنون دلده یتیم اوشاقلارا
اوزگه اوشاقلاری هارا فاطمه بسلین هارا
سینمون اوسته گللریم بس که عزیز گلوب بارا
سعی ایله صحبتونده اول نرم سخن عم اوغلی جان
.
.
وقت اذان افقلری تار ایلین زمان هوا
یاندیر ایوین چراغینی ای شه ملک ارتضا
موقع خواب اوشاقلارین یرلرین ایله جابجا
منده مزاریده یاتوم خسته بدن عم اوغلی جان
.
.
یاتدی ایلیکه طفل لر ایو سنه دوندی محبسه
فاطمه نی خیاله سال یاسین اوخی بو بیکسه
اگلشه بولمسن غمین قلبده شدّت ایلسه
قبریمون اوسته گل ایله شرح محن عم اوغلی جان
.
.
عم قیزی سسله قلبیمی نار غمیله داغلیوم
دفتر خاطراتیمی دلده آچوم وراقلیوم
قبریمون اوسته آغلاسن من لحد آلتدا آغلیوم
آغلاشا یاخشی دور ایکی غصّه چکن عم اوغلی جان
.
.
منکه وطن غریبیم دردیمی وار کیمیم بوله
نه آنام اولدی نه باجیم گوزلریمون یاشین سیله
مجلس یاسه قونشولار گلمسه ایتمیون گله
بزم عزانی نیلیور الده ئولن عم اوغلی جان
.
.
مدرک اولوب یانان قاپیم ظلم و جفایه مستدل
ایتمه عوض اونی دانار ظلمینی فرقه ی دغل
سنسادا چارچوبه سی قالسین او نوعی ویرما ال
بلکه باخوب نوا ایده اهل وطن عم اوغلی جان
.
.
#فاطمیه #انور_اردبیلی #فاطمیه_شهادت #ترکی #زبدةالاشعار
نظر دهید