گلوب مقاله بیرگئجه علی ولیّ ذوالمنن #فاطمیه_محمدی_ناعم

شرح وقایع کوچه از زبان امام حسن مجتبی (ع)
.
#زبدةالاشعار
.
: @nohe_torki
.
.
کربلایی محمد رضا محمدی (ناعم)
.
گلوب مقاله بیرگئجه علی ولیّ ذوالمنن
چاغیردی ارشد اوغلونی یانیندا اگلشوب حسن
.
دیدی اوره کده آهیلن نه وقتیدور سوزوم قالیب
او آغلیان گوزونده آی گوزل بالام گوزوم قالیب
.
اوره کده کی نهان سوزی اوغول منه عیان ائله
او کوچه ماجراسینی ئوزون منه بیان ائله
.
دوباره شعلۀ غمه منیله گل آلیش بالا
آنون نه چکدی کوچه ده ئوزون منه دانیش بالا
.
بو سوزلری ائشیتدی تا کریم جمع پنج تن
بیانه گلدی آهیلن عزیز اولیا حسن
.
بابا او کوچه محنتین نه سن سوروش نه من دییم
بو مطلبین صراحتین نه سن سوروش نه من دییم
.
آنام گلوردی منزله الینده مدرک فدک
اوره کده کی مسرّتین نه سن سوروش نه من دییم
.
کسوبدی ناگهان یولی ستمله اشقی الاشقیا
او ظالمون جسارتین نه سن سوروش نه من دییم
.
ال آتدی ثانی لعین فدک قباله سین آلا
او صحنه نین قیامتین نه سن سوروش نه من دییم
.
دایاندی یاره لی ننم مقابلینده کوه تک
بتولین استقامتین نه سن سوروش نه من دییم
.
نقدری ثانی جهد ائدوب آنام قباله وئرمدی
آنامون اول شجاعتین نه سن سوروش نه من دییم
.
نه گوردوم اوندا ناگهان،دولاندی گردش فلک
بو چرخ سفله عادتین نه سن سوروش نه من دییم
.
باخاباخا منیم گوزوم اوجالدی ثانی نون اَلی
او جانینون جنایتین نه سن سوروش نه من دییم
.
آغیر ال اندی غیظیلن،ننم ییخیلدی کوچه ده
ملالینی او ساعتین،نه سن سوروش نه من دییم
.
قباله نی او بد سیَر،آلیب جیریب توکوب یئره
او ظالمون قساوتین،نه سن سوروش نه من دییم
.
الین قویوب جمالینه ایاقه دوردی فاطمه
اوره کده اوج حسرتین،نه سن سوروش نه من دییم
.
نه گوردوم اوندا صورتی،کبود اولوب جفائیلن
دوتوبدی لکّه طلعتین،نه سن سوروش نه من دییم
.
دئدیم آنا گئدک ائوه،بابامی آگه ایلیک
اگرچه درد غربتین نه سن سوروش نه من دییم
.
دیدی منیم سولان یوزوم،یانور جفای ثانیدن
او سیلی نون حرارتین،نه سن سوروش نه من دییم
.
گوزومده تار اولوب جهان،گورنمورم قباقیمی
آغیر الین او قدرتین،نه سن سوروش نه من دییم
.
بو کوچه ماجراسینی،نقدری من وارام دئمه
بابان ائشیتسه رقّتین، نه سن سوروش نه من دییم
.
بتولون امرینه بابا،بو سرّی فاش ائدنمدیم
آنامون حدّ غیرتین،نه سن سوروش نه من دییم
.
بو شعری سوز آهیلن یازوبدی «ناعم» جوان
جزا گونونده دوت اَلین،چیخاندا گوگلره فغان
.
.
#فاطمیه_محمدی_ناعم
#فاطمیه_شهادت
#گلوب_مقاله_بیر_گئجه_علی_ولی_ذوالمنن
#ترکی
.
#زبدةالاشعار
.
: @nohe_torki