ورود بشام شوم
.
.
#سبک_ساخلا_ناقه_می_کاروانیدن …
.
.
حاج اسماعیل زرین
.
.
.
.
شام شومه چون عترت رسول
داخل اولدی با چشم اشکبار
چیخدیلار تماشاچیلر تمام
رهگذرده اللره چنگ و تار
.
.
.
.
بولدولر گلورشاه کربلا
اهل بیتی قولاردا سلسله
عیش و نوشیله مردو زن هامی
ائتدلر سروریله هلهله
بعضی کف چالوب بعضی اوینیوب
ائیلیوب شماتت گله گله
پیشواز ائدوب گورنه نوعیله
اهل بیتی اول فرقۀ شرار
.
.
.
.
جاده لر اودم ازدحامدن
باغلانوب داخی اولمادی عبور
شهرین اهلی جشن ائیلیوب تمام
گردشه چیخوب قلبده سرور
ناقه لرده آل پیمبری
ساخلیوبدولار فرقۀ شرور
گورنه نوعی آل پیمبره
دور ائدوب اوگون چرخ کجمدار
.
.
.
.
بانوان باعصمت و حیا
دستگیرافراد بی حیا
یول گلوبله دلدن دوشوبدولر
زارو خسته محزون و مبتلا
گردنینده زنجیر آهنین
ناقه اوسته بیمار کربلا
قالدیلار نه احواله بولمورم
نه فشاره دؤزدی او شهریار
.
.
.
.
اول خانملاریکه تمامیسی
خاندان عصمتده عمر ائدوب
مكتب دیانتدن اخذ ائدوب
شاهراه عفتده یول گئدوب
اجنبی لر ایچره تصور ائت
گور او جمع غارت شده نئدوب
قان اولار گوگل درک قیلساگر
قلبدن گئدر صبر و اقتدار
.
.
.
.
شام شومین اول گونکه گوندوزی
آل حیدر اولدی تیرہ شام
کف چالان شماتت ائدن دوروب
صف به صف تماشایه اهل شام
ناسزا دئین اوینیوب گولن
داش آتان بعنوان انتقام
اوج ائدردی افلاکه شامدن
بانگ ساز و آواز چنگ و تار
.
.
.
.
اهل شام خندان و شادمان
اهل بیت باناله و فغان
چوخ حزین سیزیلداردی تک به تک
ناقه اوسته اطفال ناتوان
هر بالا آناسیدان آغلیوب
شدّتیله ایستردی آب و نان
چاره ای تاپانمازدی چون آنا
امر ائدردی صبره او غمگسار
.
.
.
.
چشم دل مجسم اوعالمی
ائیلینده دل غمله اودلانور
اهل بیت پیغمبری گورور
آتش ستمدن الولانور
روزگاره سیر ائیله لنگرِ
عرش و فرش زنجیره باغلانور
گزدیرلّه شاماتی سوبسو
صبر ائدور او محبوب کردگار
.
.
.
.
چوخ چتیندی گورسون حضوریده
شهریاردین قوم مشرکین
اجنبی لر ایچره عیالینی
گزدیروله گوز یاشلی دلغمین
چاره سیزائدرحایل عذار
بعضی ینگینی بعضی سی الین
آل حیدر انظار خلقده
بی نهایت اولموش ذلیل وخوار
.
.
.
.
انتهایه ظلم وفسادیده
بسکه یتدیلر فرقۀ دنی
شامده نَلَر اولدی بولمورم
تنگه گلدی اول صبر معدنی
جانه دویدی آخرخطاب ائدوب
دوغمییدی ایکاش آنام منی
گورنقدری قوم ستم شعار
حجت خدایه وئروب فشار
.
.
.
.
حدّ سیز جفا و اذیّتی
بولدولر روا آل حیدره
چیخدی غرفه و بامه شامیان
اود وئروبلا اللرده نی لره
باشلارینه اود توکدی بامدن
انتقام آلوب بدر و خیبره
شرح ائدنده بو غملی مطلبی
آتش مصیبتده دل یانار
.
.
.
.
هر یارالی بیر نازنین باشی
وئردی بیر ستمگر جداسینه
هراوغول باشین مشرف ائتدیلر
محمل ایچره بیکس آناسینه
بو ستم شرر سالدی عالمه
تف اولا او قومین حیاسینه
قانلو باشلار اللرده ائیلدی
خلق ایچنده قاتل لرافتخار
.
.
.
.
اوینادیردیلار قانلی باشلاری
اللرینده اول فرقۀ شرور
نه جسارت و ظلم ائدردیلر
من دیمم او باشلاره اهل زور
دین ائوین یخانلاربو نحویلن
خلق ایچنده ائیلردیلرعبور
بومصیبتین عالمنده گور
اهل بیت نه حالته قالار
.
.
.
.
زینبین شرار ملالینه
دوشسه گرهامی خشک و تر یانار
مختصر او اودّان دوشوبدی بو
عالم اهلی جن و بشریانار
فاطمه حسین وای دئین زمان
جنت ایچره خیر البشریانار
سنده یان بومحنتده گورموسن
اود دوتوب هامی ماسوا یانار
.
.
.
.
شهریار دین باشی نیزه ده
ائیلیوردی قرآن تلاوتی
شرح ائدردی اهل ضلالته
حق کلامین اصل شریعتی
آندیراردی ظلّامه تئز گورر
رنج قبری نار قیامتی
رحمت خدادن نصیبی یوخ
اونلاریکه دیندن اولوب کنار
.
.
.
.
فكر قیلمیون اهل بیتیمی
دستگیرائدوب قوم کینه جو
شهر شامی کوفه دیارینی
گزدیرولّه گوز یاشلی سوبه سو
دادگاه عدل الهیده
اوندا که بولاراولدی روبرو
محضر رسول گرامیده
کشف اولارنه ظلم ائیلیوب بولار
.
.
.
.
دین حقّین احیاسنه قبول
ائیلیوب بولار بالغ وصغار
صبر ائدوب دوزه لّر بوقومدن
هرقدر یتور محنت و فشار
عالمه بومظلومیتیله بیز
ائیلروخ بوگون حقى آشکار
نهضتیم ائدر هر زمانیده
باطلین اساسینی تار و مار
.
.
.
.
باخمیون عزیزه حرملریم
ظلمیله خرابه نشین اولار
دربدر دوشوب چوللری گزر
یوزلری قزل گل کیمی سولار
جام دل ملالیه کاسۀ
چشم دمبدم اشکیله دولار
تئز اولارگولن گوزلر آغلاشور
کیم اولالا محزون ودلفگار
.
.
.
.
شرح قیلسا زرین اگر منیم
شهرشامیده گیروداریمی
اهل بیت مظلومه حالینی
تیره شام اولان روزگاریمی
قانلی باشیمون سرگذشتینی
پست و بی حیا نیزه داریمی
دوست و دشمن آغلار ملالیمه
قوم کینه دن ائیلر انزجار
.
.
.
#ورود_شام #اسماعیل_زرین #ترکی #زبدةالاشعار
نظر دهید