وداع حضرت علی اکبر علیه السلام
.
#زبدةالاشعار
.
: @nohe_torki
.
#سبک_یارالی_جان_یارالی … 4 سبک
سبک اصلی با صدای حاج داود علیزاده ( مجلس کامل )
.
مرحوم یحیوی
.
گل اوتور خیمه ده اکبر باشووا من دولانیم
فرش ایدوم تپراقا معجر باشووا من دولانیم
.
.
آنا قربان گوزوه باخ آناوون عَرضه سینه
بش دقیقه بو غریبون گل اوغول خیمه سینه
پر ووروم یانماقچون شمع رخون سایه سینه
مثل پروانه مکرّر باشووا من دولانیم
.
.
مه جمالونده که خالی بوریوب موی سرون
خوش دگل ابر سیه اوستونه دوشسه قمرون
ساغ یوزوندن آیروم صول یوزوه طرّه لرون
هاشمی خالووی گوستر باشووا من دولانیم
.
.
من سنی یولّایورام دشت مناده ئوله سن
سالاسان لیلی بیچاره نی چولدن چوله سن
نه سن اسماعیل اولارسان گئده سن ساغ گله سن
نه ده لیلی اولور هاجر باشووا من دولانیم
.
.
ای منیم آرخام ائلیم شأن و جلالیم کومگیم
گور نجه رعشیه دوشموش بدنیم جان و رگیم
دیزلریم عضولریم بیرده قان اولموش اورگیم
قوری یاپراق کیمی تیترر باشووا من دولانیم
.
.
من بؤیوتدوم سنی اؤز جانیملن قانیملن
هاجره فخر ایدورم سن کیمی قربانیملن
قوی ووروم کاکلووه شانه بو مژگانیملن
گوز یاشیلا سپوم عنبر باشووا من دولانیم
.
.
تار مویوندن آییر سینمه پیرایه وئریم
یا ئولندن صورا تحفه اونی زهرایه وئریم
یا نشانون آپاریم یثربه صغرایه وئریم
بینوادور سنی گوزلر باشووا من دولانیم
.
ختم دیداردی گل بیرده چکیم آغوشه
دیگ سینم گتوروب آتش محنت جوشه
گوز بولاقیندان اورک قانی وئروبدور گوشه
قطره قطره اودی قینر باشووا من دولانیم
.
.
باشدان عمّامه گوتور نوروی تابنده ایله
سربرهنه گورونوب آی گونی شرمنده ایله
جلوه ی حسنله ئولموش اورگیم زنده ایله
دگمه میش باشوا خنجر باشووا من دولانیم
.
سالمیش عشقون دل ویرانیمه بیر محکم اساس
قولاقون گل سینمون اوسته یاپشدیر قولاق آس
دقّت ائت گور نه ائدرسن اورگیمدن احساس
اورگیم گور سنی سسلر باشووا من دولانیم
.
.
منه گوز آلتی باخوب آغلاما یاندیرما منی
دوشیوم قوی قدمون آلتدا بویانمیش سینه نی
گاهوارونده اوشاق وقتی یاتیرداندا سنی
گیجه لر ائتمیشم ازبر باشووا من دولانیم
.
.
خنجرو نیزه نه لازم سنه ای تازه جوان
حَسَدیندن ئولور اول ابروی مژگانه باخان
کیپریگون نیزه سنون مردم چشمون اوخ آتان
قاشلارون تیغ دو پیکر باشووا من دولانیم
.
.
من غریبم نه پناهیم وار امیدیم نه کسیم
سسیمه سس ویری کیملر علی غیر از نفسیم
سندن اوزگه بیلورم یوخدی منیم دادرسیم
نه آنام وار نه برادر باشووا من دولانیم
.
.
یحیوی بیرده دییر کرب وبلاده گورونوم
خاک پر قیمتیله خلعت اعلا بورونوم
آستانوندن اؤپوم تا یوزی اوسته سورونوم
آرادا قبر مطهر باشیوا من دولانیم
.
.
#اکبریه_شهادت
#گل_اوتور_خیمه_ده_اکبر_باشووا_من_دولانیم
#ترکی
.
#زبدةالاشعار
.
: @nohe_torki
نظر دهید