شجاعت حضرت قاسم علیه السلام
.
✍️ #زبدةالاشعار ✍️
.
🆔: @nohe_torki
.
مرحوم شبخیز
.
قاسم آماده اولوب عرصه میدانه گئدور
نقد جان الده دوتوب محضر جانانه گئدور
.
.
ساقی میکده میخانه نی رندانه آچوب
محفل عشقی قلندرلره جانانه آچوب
یولی اولده نچه رند حکیمانه آچوب
نوبت باده یئتوب قاسمه رندانه گئدور
.
.
ایله مست ایلوب او مخموری شراب ازلی
بند نعلینی آچیق قبضه تیغینده الی
جنگه فکرین متمرکز ائلیوب مثل علی
دیه سن یانماقا ئوز شمعینه پروانه گئدور
.
.
گوردی مولائبله جنگه گئده بو طفل صغیر
تئز ایاقدان سالاجاق نیزه و شمشیریله تیر
امرائدوب پیرهن اوستن سالا بیر بردحریر
اولا حافظ که دم خنجر برانه گئدور
.
.
لشگرین قلبین آلوبدی نظره الده حسام
ییخما قا پرچم فرماندهی نی ائتدی قیام
صفلری سندیرا لشگر اولا بی نظم و نظام
یول سالوب مرکز اردویه بو عنوانه گئدور
.
.
نوجواندور هله نورس بوجوان نبوی
باغ وحدتده آچان گلدی گل مرتضوی
هیبتدن یاغیری صولت و سهم علوی
قصد ائدوب عرصه جولانگهی مردانه گئدور
.
.
بیر جواندور هله رخساریده یوخ خط دن اثر
سنی اون دورت اولا اولماز ائلیوب عزم خطر
نه زره دن اثر اگنینده نه کتفینده سپر
بی محابا قویوب اوز مسلخ عرفانه گئدور
.
.
زلفینی صیدی کمنده سالا افشان ائلیوب
کپریگین عمده شکارائتماقا پیکان ائلیوب
باغرینی کیمسه تماشایه چیخوب قان ائلیوب
سانکی صید ائتماقا صیاد نیستانه گئدور
.
.
دگیل اندازه زره قامت مردانه سینه
بیر کفن برد یمانی سالوب اوز شانه سینه
دیه سن شام زفاف حجله جانانه سینه
عزم ، داماد ائلیوب سرخوش و مستانه گئدور
.
.
قاسم اوز قدینه هم قد اله بیر تیغ آلوب
لشگره یاغدیروب اود ولوله کفاره سالوب
جنگینه اهل جدل جنگیده مبهوت قالوب
ائله تکبیر چکور نعره سی کیهانه گئدور
.
.
لشکره ائتدی خطاب ای سپه کوفه و شام
قاسم بن حسنم حیدر صفدردی بابام
جنگه اقدام ائلسم فکر ائده سوز الده حسام
یوز قویوب شیر خدا خندقه شیرانه گئدور
.
.
قوشو نون کثرتینی آلمادی اصلا نظره
باخمادی قان توکن اللرده قلج نیزه لره
حمله ور اولدی او چولده سپه خیره سره
اود سالا ساعقه تک خرمن عدوانه گئدور
.
.
گوردی سعد اوغلی تاپوب یول قوشونا ضعف و خلل
چیخدی لشگردن آجیقلی او زمان سسلدی گل
هارداسان گور موسن ازرق ندی بو جنگ و جدل
کیمدی جولا نه گلور عرصه ده جولا نه گئدور
.
.
قوی قدم عرصه میدانه ئوزون اولما نحیف
جنگه روحیه سی افرادین اولوب گورنه ضعیف
سنسن آخر بو جوانه بیلورم عمده حریف
کیمدی سندن صورا بو جنگه دلیرانه گئدور
.
.
ازرقه گلدی بو سوز وئردی عمر سعده جواب
ندی فکرون بو عملدن منی ائتدون نه حساب
روبرو هاردا اولار جنگیده بیر شیخیله شاب
هاردا بیر تازه جوان جنگینه پیرانه گئدور
.
.
اذن وئرسن بو کشاکشده سنی شاد ائدرم
جنگه اوغلانلاریمی بیر به بیر ارشاد ائدرم
سنه بو طرزیله بو عرصه ده امداد ائدرم
گوره سن جنگه بوچولده نئجه فتانه گئدور
.
.
ازرق القصه عمر سعدی اودم رام ائلدی
مکریله فیصله وئردی ایشی اتمام ائلدی
بیربیر اوغلا نلارینی جنگینه اعزام ائلدی
هر بیری جنگه گلور دوزخ نیرانه گئدور
.
.
گوردی ازرق بوجوان علوی عاشق پاک
ائتدی دورت اوغلونی بیر بیر بو معارکده هلاک
بو مصائب اثریندن سینه سین ایلدی چاک
ئوزی آماده اولوب جنگه اودیوانه گئدور
.
.
چکدی بیر عربده آت ،ایسته دی میدانه سالا
قانینه قان ائده اوغلا نلارینون قانین آلا
آتا دور نیله سین آخر نه که شیریندی بالا
بو گئدیش بیلمدی اما اجلستانه گئدور
.
.
روبرو اولدی او دم قاسمیله ازرق دون
دورت اوغول داغی اورکده ئوزی سرمست جنون
قاسمین گوردی الینده قالاجاق زار و زبون
بیلدی بو جنگ دگیل ورطه طوفانه گئدور
.
.
آلدی شمشیرین اله ایلدی آهنگ جدل
اولدی مابین ده بیر نئچه قلج رد و بدل
قاسم بن حسن القصه تاپوب ازرقه ال
پیکر ی یئرده قالوب صوتی بیابانه گئدور
.
مکریله گتدی یوروش قاسم گل پیرهنه
ایله بیر ظلم ائلدی زینت باغ حسنه
دوشدی توپراقلاراعرض ایلدی شاه زمنه
عمری گل قاسمیون گور نجه پایانه گئدور
.
.
داداه گل دورمی اشرار زمن آلدی باجی
توپراقا قاسیموی اهل جفا سالدی باجی
بدنیم اتلار ایاقینده دوشوب قالدی باجی
گله سن دادینه گل پیکری تالانه گئدور
.
.
لطف قیل کسمه میش اشرار زمن باشیمی گل
ئوز الونله قانی سیل پاک ائله گوز یاشیمی گل
شاد ائله تک نه منی جمله بنب هاشمی گل
باشیمون قانی آخور گورنجه دامانه گئدور
.
.
قاسمیون آلدی سسین وارث سلطان نجف
سالدی آت الده قلج غیظیله میدانه طرف
آزقالور بیلدی اولا پیکری اول چولده تلف
کوردی چون هلهله عرش حق سبحانه گئدور
.
.
ذوالفقار الده گتوردی آتی جولانه او شاه
بیلدی جسمین ائلیوب قاسمیون اوخ نیزه تباه
حمله ائتدی قوشونا اولدی پراکنده سپاه
یوز قویوب هر بیری بیر سمته شتابانه گئدور
.
.
تاپدی میداندا غرض قاسمی سلطان زمن
گوردی خندان داغلیوب یئرده گل باغ حسن
دیه سن ال گله گلشنده تاپوب زاغ و زغن
باغبان آغلاماقا صحن گلستانه گئدور
.
.
دوشدی بو فکره خیامه آپارا پیکرینی
نئجه قتلاله طرف حمل ائلیوب اکبرینی
یئردن اما گوتوره بیلمدی اول دلبرینی
دوغرانوب پیکری هر قطعه سی بیر یانه گئدور
.
.
سینه سی سینه ده گوردی او شهنشاه جهان
قیشلاری یئردن اوزولمورآخیری هر یانا قان
نقدر ائتدی تقلا دورا بلکه او جوان
گوردی عمری قوتولوب خانه دیوانه گئدور
.
.
.
#قاسمیه #شبخیز
#قاسمیه_شجاعت
#قاسمیه_شهادت
#قاسم_آماده_اولوب_عرصه_میدانه_گئدور
#ترکی
.
✍️ #زبدةالاشعار ✍️
.
🆔: @nohe_torki
نظر دهید