گل بیزی ئولدورمه حارث خالق یکتایه باخ #طفلان_مسلم #صافی_تبریزی

زبانحال طفلان حضرت مسلم (ع)
.
#زبدةالاشعار
.
: @nohe_torki
.
مرحوم صافی تبریزی
.
گل بیزی ئولدورمه حارث خالق یکتایه باخ
یا پیمبردن اوتان یا حضرت زهرایه باخ
.
.
رحمه گل آخر یتیموخ بیکسوخ افتاده یوخ
مسلمون اولادیوخ ظالم ایکی شهزاده یوخ
بیز رهین منّتوخ هر قدری بو دنیاده یوخ
شرم قیل قورتار عقوبتدن بیزی عقبایه باخ
.
.
بسدی بیر ایل چکمیشوخ زنداندا بیز رنج و تعب
چوخ آجیقلانما یتیموخ قیل مراعات ادب
بیر آنامیز وار که یول گوزلور وطنده روز و شب
ایکی گلدن آیریلان بیر بلبل شیدایه باخ
.
.
آز ویروب سیلی ایکی نسرینی دوندر سوسنه
گورمیوب بو ظلمی بیر دشمن روا بیر دشمنه
کافر اولساخ بیز قوناقوخ فرضیدور حرمت سنه
اَکرم الضّیفی ائشیت بیر لحظه بو ایمانه باخ
.
.
گوئیا تقدیریمز چکدی بیزی بو منزله
چوخ دولاندوردی گتوردی ویردی دست قاتله
چاره یوخ بیز سلم محضوخ ائتمروخ هرگز گله
سن مآل کاری فکر ایله فنا دنیایه باخ
.
.
گورمیوب بو دیدۀ عالم بیزیم تک بیر قوناق
هم غریب اولسون همی یالقوز کمک سیزهم اوشاق
اوز قوناقین بیر نفر ئولدورمیوب سندن قاباق
سنده گل ئولدورمه قانونِ شه بطحایه باخ
.
.
گر مسلمان سان خلاف دین اسلام ایلمه
مسلمین ایچره اوزون رسوا و بدنام ایلمه
عامداً ظالم ایکی قتله سن اقدام ایلمه
دوزخی یاد ایله گوز آچ خالدُ فیهایه باخ
.
.
اولسا منظورون بو ئولدورماقدا دنیا ثروتی
چک بیزی بازارده سات باشوندان آت بو نیّتی
آل ایکی یوسف جمالون هر نه اولسا قیمتی
صورت اوضاع مصری گورمه سن معنایه باخ
.
.
قتلیمیزده گر بیزیم ابن زیادین وار گوزی
زنده تسلیم ایله گورسون بیز ایکی سولموش یوزی
سن بیزی ئولدورمه قوی ئولدورسه ئولدورسون اؤزی
قبر ائوین سال یادیوه باشوندا کی غوغایه باخ
.
.
تنگ اولوبدی ایمدی که بو عرصۀ فرصت بیزه
ئولدورورسن چاره یوخدور قویموسان حرمت بیزه
ویر ایکی رکعت نمازین قدریجه مهلت بیزه
مذهب دین و شریعت صاحبی طاهایه باخ
.
.
آلدیار رخصت نمازه ایتدیلر فوری قیام
باغلیوب احرام بولدوله سواللهی حرام
سویلیوب اوّلده بسم الله آخرده سلام
یوز دوتوب درگاه حقّه عشقه باخ سودایه باخ
.
.
عرض قیلدیلر خداوندا بیزه یوخدور پناه
بو ستمگر اؤز ایوینده اولمادی امّیدگاه
عدلیله حکم ایله محشرده اؤزون اول دادخواه
بیزده سن بو اشک چشمه لرزش اعضایه باخ
.
.
کلمۀ نفرین ایشیدجک ویرمدی حارث امان
باشلارین کسدی سویا آتدی سو رنگی اولدى قان
بیر بیریندن آیری دوشسون قویمادی آب روان
سن محبّت ذرّه سینده قدرت دریایه باخ
.
.
.
/// #گریز #عباسیه_شهادت ///
.
.
سو یوزینده قول بویون اولدی ایکی باشسیز بدن
یاد اولور بو ماجرادن اوزگه بیر درد و محن
قول بویون أولموب حسین عباسیله آخر ندن
هم امامون حالنه هم تشنه لب سقایه باخ
.
.
شاه لب تشنه یتنده باوفا قارداشینه
بولمدى باخسون او سرور قارداشون گوز یاشینه
یا کسیلمیش اللرینه یا داغیلمیش باشینه
شیعه سنده چشم باطنله همان صحرایه باخ
.
.
سسلدی عبّاس سنسیز گلموری بیرده بئلیم
ایله بولدیم جان وئروب ایمدی هامی آرخام ائلیم
نه دیوم جانیم سنه قربان داخی دوتمور الیم
بیرجه آچ قانلی گوزون بو صورت و سیمایه باخ
.
.
«صافیا» بول مسلمون روحی اولور برزخده شاد
بو ایکی طفل یتیمی یاد ایدوب قیلدوقجا داد
وار بو امّیدیم که اولسون توشۀ قبر و معاد
ایله خدمت ساز برگ محشر کبرایه باخ
.
.
#طفلان_مسلم #صافی_تبریزی
#گل_بیزی_ئولدورمه_حارث_خالق_یکتایه_باخ
#ترکی
.
#زبدةالاشعار
.
: @nohe_torki