گل خوش بوی گلزار رسالت یا رسول الله #پیامبراسلام_اکبر_قنبری

یا رسول الله(ص)
.
زبدة الاشعار
.
: @nohe_torki
.
اکبر قنبری تیکمه داش
.
گل خوش بوی گلزار رسالت یا رسول الله
وجودی خلقته شمس هدایت یا رسول الله
.
تاپوب سندن صفا بوتون ارض و سما
سنه فخر ائیلیر تمام انبیا
.
.
.
آقا سن رحمت للعالمین کل عالم سن
اوزون یوز ییرمی دورد مین انبیانین ایچره خاتم سن
دلیل آفرینش اشرف اولاد آدم سن
سنه الله وئریب آیری جلالت یارسول الله
.
.
رسول الله سن حقدن سنه نازل اولوب قرآن
یئتوب غار حراده بو ندای خالق منان
اولوب وحی اقرا باسم ربک امر ائیلیوب سبحان
ائدیب علم لدنی حق عنایت یارسول الله
.
.
سنون شامل اولوبدی حالیوه لطف حق داور
اولوب خلاق العالمدن سنه جبریل وحی آور
ائدیب سندن سورا معراج عرشه هانسی پیغمبر
سنون حقینده اولدی بو سعادت یارسول الله
.
.
او دوران که جهالتدیدی بیر عده بد آموخته
ائدردی قیزلارین زنده به گور اشخاص ناپخته
بو اهدافیله که گوندرمه سینلر خانه بخته
ائدیردی دهریده طغیان جهالت یارسول الله
.
.
تلاش ائتدین قوتاردین قوم گمراهی جهالتدن
صراط حقه چکدون اونلاری راه بطالتدن
سعادتمند اولوب چوخلار قوتاردی بربریتدن
بو یولدا رنج چکدون بی نهایت یارسول الله
.
.
وجودون باعث اولدی نخل آزادی ثمر تاپدی
سنون نور جمالون درک ائدن نور بصر تاپدی
آییلدی خواب غفلتدن ره حقی بشر تاپدی
مسیرین یوخسا آزمیشدی جماعت یارسول الله
.
.
سنون سایه نده عالمده شریعت بر قرار اولدی
تلولو ائتدی خورشید حقیقت آشکار اولدی
یاغوب باران رحمت دشت و صحرا لاله زار اولدی
عدالت باغلاری تاپدی طراوت یارسول الله
.
.
سفارش ائیلدین سن بو سوزی بالای منبرده
بویوردون امتیم آگاه اولون بو امره هر یئرده
کلام اللهی تاپشیردیم سیزه من عترتیم بیرده
ایکی موردقالیب سندن امانت یارسول الله
.
.
سنون آدون اولوب زیب اذان ازبردی دیللرده
سنون نورینله نورانی اولوب خورشید خاورده
آقا بو قنبری دن کسمه لطفون یوم محشرده
کرم قیل سن اوزون ائیله شفاعت یارسول الله
.
.
#پیامبراسلام_مدح
#گل_خوش_بوی_گلزار_رسالت_یا_رسول_الله
#اکبر_قنبری
#ترکی
.
#زبدةالاشعار
.
: @nohe_torki