استمداد حضرت ابوالفضل (ع)
«آهن ئوزی قان آغلادی آهنگر الیندن…»
.
.
.
مرحوم حاج مختار نخستین اردبیلی
.
.
گل قارداشوون گئتدى حسین اللر الیندن
سرلشگریوم آل منی بو لشگر الیندن
.
.
آخر نفسیم دور غمووه منده دؤزوم یوخ
قربان سنه اوغلومدا آنامدا تک ئوزوم یوخ
شرمنده لیگیم بسدی منه آیری سؤزوم یوخ
گئتسون یارالى باشلا گئدور پیکر الیندن
.
.
قویدوم یره سقّالیق اولان نامی حسینیم
اللرده دی الاندا سویون جامی حسینیم
سودور سوسوزون طاقت و آرامی حسینیم
بیر دفعه سوسوزلار سو آلیب اکبر الیندن
.
.
عاجز منی دعواده إئدن بال و پر اولدی
دورت مین اوخا سر نیزیه سینم سپر اولدی
قولسوز بدنه عشقیده سرمایه سراولدی
سر گئتسه قوتارّام بئله دردِ سر الیندن
.
.
گل قارداشووی گؤر نجه قارداش اله دوشدی
قولّار کسیلوبدی سرخونپاش أله دوشدی
گل آهن عمودیله سینان باش أله دوشدی
آهن ئوزی قان آغلادی آهنگر الیندن
.
.
فکریم نه باشیمدی نه قولومدی نه گؤزومدی
دردیم بالا قیزلاردی باجیمدی نه ئوزومدی
من نوکریوم سؤز منیم اوّلکی سؤزومدی
یول گؤزلینون گئتدی حسین گؤزلر الیندن
.
.
بیر ظالم عمودیله منی إئتدی نشانه
قولسوز بدنیم تیتردی قالدوم یانایانه
ویردی باشیما مغزیمی گتدی هیجانه
دنیا گؤزومه تار اولوب أول کافر الیندن
.
.
أول قامت رعنا که اوجالموشدی بوکولدى
أل چالدى قشون باخدی منیم حالیمه گولدى
مغزیم قاریشوب قانه قباقیمده توکولدی
سوزدی دل پر شور او جفا گستر الیندن
.
.
گل گؤرمگه بو قانه باتان یاری دانشدیر
تندن نجه دوشدی یره قولّاری دانشدیر
بیر باخ منه گئت جعفر طیّاری دانشدیر
تصدیقیمی آل ویر منه سن جعفر الیندن
.
.
سیندی پریم عنقای وفا پروریوم من
شاهنشه عالم سن أخا نوکریوم من
کابینه سقوط ایلدى سردفتریوم من
سردفتروون دوشدی یره دفتر الیندن
.
.
.
گل بو یارالی باشه دیزون اوسته مکان وئر
عیسی نفسیم سن دیمورم گل منه جان وئر
سو یوخدی آپار سو یرینه مشگی نشان وئر
سو مشگیمی آلسونلا سوسوز سرور الیندن
.
.
اوخلار اوخا پیوند اولوب ای شه یارام اوسته
ئولمک منه خوشدور سؤزومون من وارام اوسته
بیلمم هارا سالیمدی یاتوم من هارام اوسته
ویرمیش بدنیم عضوینی سرتاسر الیندن
.
.
قارداش بدنیمده نه گؤزل منظره واردی
خنجر یاراسی نقش و نگار إئندی قوتاردی
نقاش قضا چکدی عجب نقش آپاردی
خوش نقشیدی نقّاشون آلار داور الیندن
.
.
آز قالدی باتا ماه بنی هاشمی تز گل
گل باشووه شاباش إئلیوم باشیمی تز گل
قلبیم تله سور گورمگه قارداشیمی تز گل
قانلو گؤزومی پاک إئله خاکستر الیندن
.
.
ای حفظ إئلین قانیله قرآن مبینی
سقّا یخیلوب یرده قالوب قانلو جبینی
باقی قولیلان ساخلامشام پرچم دینی
گل پرچمی آل سالم علم پرور الیندن
.
.
قاتل تله سور باش کسه بیلمور گلنیم وار
بی صاحب اولان باشه گلوب باش چکنیم وار
هئچ کیمسنه نون یوخدی او مولا که منیم وار
قولسوز بدنین باشین آلار کافر الیندن
.
.
من ایلمرم سندن حسین ذرّه گلایه
باش چک منه ای باش چکن هر بیر شهدایه
گل بیر دولانیم باشووه سال باشیمه سایه
گئت قویما گئده زینبیمون معجر الیندن
.
.
چگنیمده سومشگیم دولی هی ویردوم عقابه
تا که صدمه یتمیه مشگیمده کی آبه
بیر شربه سویومدان یته مظلومه ربابه
وئرمور قوری پستانی علی اصغر الیندن
.
.
سو فکری إئدن قولارینون فکرینه قالماز
نه یاره نی بیلمز نه ده مشگین أله سالماز
باش وئرمسه سرنیزیه تا باشی اوجالماز
قاتل لری قویماز یرینه خنجر الیندن
.
.
غم سیلینه بیر سدّ ویر، ای غملی مجاهد
عشق عالمینی سیر ائدن ، ای عشقیده واحد
الله و پیمبردی سنون عشقووه شاهد
یاهو اوجالار عرشه سوسوز لب لر الیندن
.
.
گلدی منی زهرا آنام آغوشینه آلدى
سینمش قولونی زحمتیله بوینوما سالدى
یاندیردی منیم قلبیمی بیر سؤز خبر آلدى
لیلا نجه أل چکدی علی اکبر الیندن
.
.
گلسؤن قدی خم گلمه بو قدّى خمه خاطر
آچما سینووی بو داغیلان سینمه خاطر
قان آغلاما بو قانه بانان پرچمه خاطر
گل گل بو فروشنده نین آل گوهر الیندن
.
.
بیر یاندا سو مشگیمدی بی یان قانلو لوادی
گویا علمیم «سعی» ئیدی مشگیمده «صفا» دی
بیر یاندا آنام فاطمه دی صاحب عزادی
گل سعی و صفاده دوت ئوزون مادر الیندن
.
.
هر چند سنه زحمت اولور عفو ایله قارداش
تز گل گئدورم من ابدى منزله قارداش
زهرایه دئدوم اولمیوب اولماز بئله قارداش
آخر نفسیمدور قوی آلوم ساغر الیندن
.
.
قارداش سسینی قارداش آلوب باخبر اولدی
شه بیلدی فرات اوسته وزیره خطر اولدى
شهباز قوی پنجه سی بی بال و پر اولدی
دو شدی بره شهباز نوى شهور الیندن
.
.
یاز محنت عبّاسی «نخستین» گئجه گوندوز
عارف صفت أول گزمه فنا دهریده دوزدوز
یاندیردی دل زاریمی عبّاس دیین سؤز
گل قارداشوون گئتدى حسین اللر الیندن
.
.
.
.
.
#عباسیه #نخستین
#عباسیه_شهادت
#گل_قارداشوون_گئتدى_حسین_اللر_الیندن
#آهن_ئوزی_قان_آغلادی_آهنگر_الیندن
#ترکی
#زبدةالاشعار
نظر دهید