گنه باتوب غمه غم گلشنینده مرغ خیال #وداع_زائر_تبریزی

حالات وداع حضرت سیدالشهدا (ع)
.
.
مرحرم زائر تبریزی
.
.
گنه باتوب غمه غم گلشنینده مرغ خیال
غم و ملالیله گویلوم دولوبدی مالامال
.
دوشوب خیالیمه چون آخر وداع حسین
اولوب نظرده مجسّم غم و ملال حسین
.
دوروبدی خیمه قباقینده شاه مظلومان
آلوبلا دورہ سین آل رسول هاله مثال
.
بیری دوتوب اتگیندن دیور عمو گیتمه
بیری دیور بابا بیرده منی قوجاقیوه آل
.
قوجاقلیوب آتینون بوینونی بیری مأیوس
یواش یواش دیور ای پادشاه عرش جلال
.
بویور گوروم کیمه بس تاپشوروب بیزی گیدوسن
بو غربت ایچره قالور بی پناه اهل و عیال
.
گوروب که بیر طرفینده دوروب باخور باجیلار
أُویان طرفده توکولّر حرملر اشگ زلال
.
چون آیریلوبدی حرمدن او دمده میر حَرَم
گوروب گلور دالیجا زینب حمیده خصال
.
یواش یواش دیوری بیر دایان حسین قارداش
تأمُّل ائتگیله سندن واریمدی بیرجه سئوال
.
نه واردی بوردا حرم نه باجی نه خردا اوشاق
دوروب ایکی باجی قارداش اولوبدی مجلس حال
.
بویور گوروم گله جاقسان دوباره خیمه لره
و یا قاییتماقوا وئرمز اهل کوفه مجال
.
سارالدی رنگی گلوگیر اولوب امام حسین
اشاره ئیله بویوردی اولور بو امر محال
.
ایشیتدی بو سوزی علیا مکرّمه زینب
او غملو قلبینی دوتدی علاوه درد و ملال
.
دیدی حسین باجون ئولسون ایتورموشم ئوزومی
دینمرم سوزومی دیلده یوخدی تاب مَقال
.
بو قدر دشمن ایچینده قویوب بیزی گیدوسن
تمام عورت اوشاق دور بو- بیر صفوف رجال
.
وداع ایدوب باجی چوخ نسگلیله قارداشینی
قایتدی خیمیه مأیوس ایدردی فکر و خیال
.
جناب زینب اوتورموشدی مین خیالیله
دیزین قوجاقلیوب اولموشدی چوخ پریشان حال
.
او قدر گچمدی گوردی که های هو اوجالوب
دولوبدی طبل بشارت سسیله دشت و جبال
.
اورک دؤگوندی ، بدن تیتریوب قاچوب رنگی
یتوردی هولیله تلّ اوسته ایلوب أستعجال
.
باخوب گوروبدی که میدان جنگی توز بوریوب
ائدولَّه هلهله میداندا قوم بد افعال
.
یخوبلا شاه شهیدانی ذوالجناح اوستن
یارالی جسمی اولوب زخم کینیله پامال
.
دیدی بو حالوه قربان اولا باجون زینب
نجه گوروم بَلَشوب قانیوه بو خط و بو خال
.
بو نوحه « زایر » ایدوب کل کائناتی ملول
نه شرق و غرب باتوبدور غمه جنوب و شمال
.
.
#حسینیه_وداع #وداع #زائر_تبریزی
#گنه_باتوب_غمه_غم_گلشنینده_مرغ_خیال
#ترکی
#زبدةالاشعار