ترانۀ شاعرانه
اشاره به مقام عزاداری
#گریز #راه_شام_مجلس_یزید
.
✍️ #زبدةالاشعار ✍️
.
🆔: @nohe_torki
.
مرحوم شانی تبریزی
.
گنه گوگلمده برگ بید لرزان تک تزلزل وار
تاپوب رعشه وجودیم جاندا حال صید بسمل وار
.
پریشان خاطرم آشفته حالم زلف جانان تک
نه دلده ذوق گلشن نه گوزیمده حسرت گل وار
.
نه گلشنده صفا نه گلده جلوه غنچه ده بیر غنج (1)
نه حسن یاسمن نه رونق برگ قَرَنفُل وار
.
بودور قورخوم آلوب اود شعله لنسون برق آهیمدن
ریاضت مزرعینده خرمنینده هر نه حاصل وار
.
محبت عالمینده گر چه یوخدور انتها اما
محبت درسین اکمال ایتماقا سعی محصل وار
.
پری پیکر نگاریم پرده دن گورسنسه بی پرده
جنون عشق اولور عشق عالمینده هرنه عاقل وار
.
مذاقیم تلخ دور فرهاد تک شیریندی اشعاریم
باشیمدا شور عشق مهوش شیرین شمایل وار
.
پریشاندور خیالیم توسن طبعیمده جولان یوخ
گنه لنگ اولماز اما کردگاریمدن تفضل وار
.
سوز اهلی چوخدی آنلار شاعرین منظورینی سوزدن
مسائل مطرحینده گر چه دائم بحث جاهل وار
.
حسینه آغلیان گوز دوزخه یانماز بونا سوز یوخ
عمل توفیقی اولسا هر عملده سعی عامل وار
.
سوزون بو جمله ده گنجایشی یوخدوربودورمجمل(2)
یانان دل آغلیان گوزاولسا اسباب توسّل وار
.
حسینیون اهلبیتی یوللانور شامه نه غافل سن
برهنه ناقه وار بی پرده بی روپوش محافل وار
.
یتوبدوربیر قبیله قتله قالموب جزمریض اما
محافظ اولماقا اعراب وحشیدن قبایل وار
.
اوشاق گور تیتره مز برگ خزان تک گورسه مامورین
النیده قمچی وار چگننده شمشیر حمایل وار
.
اسوب تیترردی گلبرک خزان تک نازنین قزلار
دیرسن بیر چمنده تند باد سام آسور یل وار
.
سارالمش آج سوسوزلوخ شدّتندن رنگی اطفالین
طراوتدن دوشوب گل گورموسن غوغای بلبل وار
.
باتوب گون اوزلیلر گون تابشندن جلد اولوب تجدید
اگر چه یوزلرینده تللری مانند سنبل وار
.
باتوب توز توپراقا یوز خشک ایدوب گوزدن آخان یاشی
او حالی گورماقا آغلار گوز اولسا دیدۀ دل وار
.
حسین باشین عبث اوخشاتمادی دوتقون آیا زینب
گوروردی مه جمالین قان دوتوب توز چولقیوب کول وار
.
دوتوب یوز نیزیه رمزیله عرض ایلرعروس زار
عم اوغلی خارج ایله خاطرونده هر نه نسگل وار
.
دیمه یوخدور نقابیم صورتیم اغیاره گورسنمز
یوزومده دسته دسته طرّۀ طرّار تل تل وار
.
گیدر بیراهه دن یول کاروان اهلی گجه گوندوز
نه زاد راحله نه مسکن و مأوا نه منزل وار
.
نجه محمل نشین اولماز گجه یول گتماقا مایل
که هر بیر محمله بیر ماه تابنده مقابل وار
.
نجه مجنون کیمی اکبر جداده چوللری گزمز
شکسته قلب لیلا تک شکسته نچه محمل وار
.
نجه سرسلسله بولمزعلیل سلسله بندی
اولارکه جمله سینده قید و زنجیر و سلاسل وار
.
نجه بختیندن ایلر شکوه کلثوم سیه طالع
قباقدا قارداشی عباس تک بیر بدر کامل وار
.
نجه هر لحظه اما تازه لنمز داغی عباسون
که دائم گوز قباقینده الینده نیزه نوفل وار
.
نجه یاددان چخاردار سود امر طفلین رباب آیا
که اصغر باشی نیده نی الینده ابن کامل وار
.
نجه زیبنده دور زینب یوزین دشمن گوزی گورسون
معاذالله مگر بو مطلبه گویا اولان دیل وار
.
نجه آغ ساچلارین سالماز اوزه اول معدن ناموس
مگر معجر قالوب یا مقنعه یا اوزگه حایل وار
.
یاخوندور ناقۀ لیلا دایانسون پا به گِل قالسون
که سیل اشک زینبدن بیاباندا اولان گِل وار
.
قرا گونلر ایدنمز قورخودان اوز غربتیندن داد
گورولّه قمچی الده دوره ده نچه قراول وار
.
قوجاقلاردا اوشاقلار گه یاتار گه دیسگنور آغلور
تکان ناقه وار بانگ جرس وار داد و غلغل وار
.
حیا مانع اولور عرض ایلیم بعضی اوشاق آلدی
بیله نقل ایلیوب اوز مقتلینده بعضی ناقل وار
.
حسینون بیر قیزی دوشدی او یولدا ناقه دن قالدى
عدو فکر ایلدی گویا محافظده تغافل وار
.
نه گوردی نیزه باشندا دایاندی شاه دین باشی
ایدوب اوز قدرتین ظاهر دیمه جای تأمل وار
.
که یعنی حشراولونجا قویمارام بو کاروان گیتسون
بالام چولده قالوب نه راهنما وار نه وسائل وار
.
نجه شامه یتنجه گوز گوتورّم اهل بیتمدن
اگر چه خالقه تاپشورموشام منده توکل وار
.
خلاصه کاروانه ایلدی یول گیتماقی مشکل
او باش که اوندا دائم اقتدار حل مشکل وار
.
قضیه کشف اولوب زجرابن قیسی ایتدیلر مأمور
ایله بی رحم ظالم ای خدای حیّ و عادل وار؟
.
قوشوندان بیرنفر یاندی یتیمه حالنه اول دم
یانارصاحب زمان اما او حاله مین اوچوز ایل وار
.
گیدوب تاپسا او طفلی قمچی آلتدا ئولولدورور بولدی
دلینده رحمی یوخ ظلمنده پایان تکامل وار
.
گیدوب زجریله آختاردی اومظلومه قیزی تاپدی
ایتوردی قیز اوزین گویا گوروب مقتول قات لوار
.
قاچوب رنگی یوزیندن اسدی برگ گل تک اعضاسی
یانندا گوردی نه عمه آنا نه اقربا ایل وار
.
ستمگر زجر ال آتدی قمچیه آتلی الین دوندی
دیدی دریای قهر قادره فکرایتمه ساحل وار
.
یتیمه بیر قیزی که آیریلوب اوز اقرباسندن
قالوب صحراده یالقوز اوندا آیا نه تحمل وار
.
بالا تا گوردی رأفت آتلیه اولدی پناهنده
سیخیلدی آت دوشنده گوردی آتلی رحمه مایل وار
.
دیدی آتلی بالا چوخ وحشت ایتمه دوشمه تشویشه
بیله فکرایتمه سندن قافله سالاری غافل وار
.
آنان باشی دوروب نیزه باشیندا انتظاروندور
اونون لطفی سنه اوّلدن آرتوق ایمدی شامل وار
.
ولیکن ایسّیدور گون یول اوزاقدور سنده یورقونسان
بو یردن کاروانه چوخ مسافت چوخ فواصل وار
.
دایانما گل سوار اول ترکمه هنگام سرعتده
اگر نیل مرامه منتها سنده تمایل وار
.
ایشتدی بو سوزی اول نونهال گلشن ناموس
حیا سیرین ایله بیر ذرّه اوندا گور تکامل وار
.
دیدی جدیم بو امری نهی ایدوب شرع مقدّسده
بو امره ایلمز اقدام او که قرآنه قائل وار
.
سورون سیز آتلاری منده سورونم گلم آردوزجا
ازل گون بولموشم راه محبّتده مراحل وار
.
اولار سرعتله آت سوردی او قیز گه قاچدی گه دوردی
مسلّم دور نئجه آمالنه تعجیل آمل وار
.
بیر آز یول گئتدی اگلشدی یره گوز یاشلی عرض ایتدی
داخی گور منده یارب طاقت طی منازل وار
.
گوتوردی معجرین باشدان ازل ایتدی ائیکی حصّه
بو مجمل مختصر مطلبده مین باب تفاضل وار
.
بیرین مجروح ایاقه باغلادی سالدی بیرین باشه
گنه دوشدی یولا هولیله گوردی بانک عاجل وار
.
یتیشدی کاروانه مین مشقتله اومظلومه
گوروب چوخ رنج و زحمتدن صورا مقصوده نایل وار
.
آتاباشین جدا باشنده گورجک بیر اورکلندی
دیدی عفو ایت منی گوگلیمده گر بیجا تخیّل وار
.
خیال ایتدیم منی یالقوز قویوب چولده اؤزون گتدون
خیالیم عکسنون اثباتنه ایندی دلایل وار
.
جدا اوسته دایاندون قویمادون بو کاروان گیتسون
ثبوت اولدی منه سنده همان لطف اوائل وار
.
گلوب منظوراله شه باشی گیتدی یولّانوب لشگر
بولوندی حمل و نقل کاروانه اوزگه حامل وار
.
#گریز به #مجلس_یزید
.
او شمع محفل عشق عهدینون نقصاننه باخدی
گوروب دارالجفای شامده بیر اوزگه محفل وار
.
نجه محفل نجه مجلس به جز بیر مرد نصرانی
اولوب احضار او بزمه هر نه اوباش و اراذل وار
.
هله دعوت ایدوب اهل فرنگ رومی خارجدن
که گویا مجلس نحسینده آز کفّار داخل وار
.
دیسم اولدی حقارت باورایله دوشمه تردیده
علوم اهلی یازوب کیفیّتین شرح مقاتل وار
.
یره اگلشماقا حق نصب ایدن سلطانه رخصت یوخ
سریر سلطنتده مسند سلطان باطل وار
.
ئوزی ناخوشدی ، یورقوندی وجودی ، خسته دورجانی
بدنده آتش تب ، گردنینده جامعه غُل وار
.
رضای حق ایدوب واداراونی دورسون ایاق اوسته
دیمه عاجزدی سانما اقتدارینده تنزّل وار
.
ایدوبدور ظلمت کفر یزید اول بزمی ظلمانی
قزل طشت ایچره امّا شعلۀ شمع محافل وار
.
یزیدی مست ایدوب حبّ ریاست بادۀ غفلت
آتوب قرآنی داندی هر نه احکام و رسائل وار
.
بیرالده خیزران بیر الده رأس شاه مظلومان
قباقدا تختۀ شطرنج و اسباب مشاغل وار
.
آچوب دل ناسزایه سویلدی طعن و شمادتله
حسین گور کیمدی افضل کیمده احقاق تفضّل وار
.
خلافت مسندینده ساکنم باشون قباقیمده
بو گون ذیحق لقین اثباتینه حلّ مسائل وار
.
سنون اهل و عیالون دربدردور خانمان ویران
منیم بزمیمده امّا گور نه عالی بیر تجمل وار
.
دئمزدون بیر سوز اصلا آل بوسفیان وصفینده
دیردون اوز آتان مدحینده هرگونه فضائل وار
.
نجه گور عزت آل امیه آشکار اولدی
دیمه بیز اهلبیتون شأنینه آیات نازل وار
.
اگر فخر ایلسن #شانی بو فخرینده مذمت یوخ
که طبعونده تسلّط نطق و نظمونده تسلسل وار
.
غرض اوصاف اعطادن صفات ذات معطیعدور
نجه فخر ایلمز آیا او که بو فیضه قایل وار
.
ویروب هرشاعره دل صاحبی روز ازل بیر دل
دل اهلی اولسا آنلار سنده اما اوزگه بیر دل وار
.
حسین کان کرمدور منبع جود و سخاوتدور
که اوندا حرمت مهمان وار اکرام سائل وار
.
.
(1)کرشمه و ناز کردن
(2)مجمل = خلاصه
.
#حسینیه_مدح #حسینیه_شهادت
#گنه_گوگلمده_برگ_بید_لرزان_تک_تزلزل_وار
#ترکی
.
✍️ #زبدةالاشعار ✍️
.
🆔: @nohe_torki
نظر دهید