شهادت امام حسین (ع)
.
.
مرحوم صافی تبریزی
.
گوردوله تشنه جان ویرور منبع چشمه حیات
حیرته دوشدی قدسیان، جمله ملائک اولدی مات
.
حضرت لم یزل اوزی گوتدی حجاب و حایلی
تا جبروت اهلنه گوستره اول شمایلی
یرده بولوردی جان ویرور، وصل حبیب مایلی
ایستمدی او بینده مانع اولا سرادقات
.
ایستدی بیر بیانیله شرح ایده بو مصائبی
بولدوره کیمدی جان ویرن، کیمدی بو شان صاحبی
آنلیا قدسیان ندور بنده چلوخ مراتبی
گوگده اولان ملک لره کشف اولا بو مکاشفات
.
گلدی ندا هامی سالون کرب و بلایه بیر نظر
گور نه تجلیاتله نفس حسینده وار اثر
بیر ایله اوخ قلج دگوب، خوشدی دوشوبدی بی خبر
عین وجودین ایلیوب، محو صفات عین ذات
.
اصلنی بولموسوز اگر کیمدی بو تشنه جان ویرن
آدی حسیندی، جدیدور احمد، او شاه ممتحن
آناسی فاطمه، حسن قارداشی، ابن ابوالحسن
بونلار اولوب سبب یتوب، کونه قراریلن ثبات
.
دوشدی تمام ماسوا شیونه بو خطابدن
نوحه و ناله اوج ایدوب ساکن نه قبابدن
باب مصیبت آچدیلار خلقه بو فتح بابدن
ساخلار عزا ویرونجه جان، معتمدینله ثقات
.
گلدی گروه انبیا دشت بلایه صف به صف
تاپدیلار بیر یارالنی محضر حقده جان به کف
سویلدیلر که دوغمیوب بیر آنا بیله بیر خلف
حشره کیمی عقیمدور بیله وجوده امهات
.
گوردوله چوخ شکفته دور، گل کیمی سید انام
ویردیله ختم مرسلین احمده تسلیت تمام
لیک الی بیلینده دور، یوخ داخی طاقت قیام
حسرتیله باخور توکور یاش، او قل انما صفات
.
هاجریله خدیجه هم گوردی اوغول آناسینی
زلفنه قان یاخوب، گییوب اگننه غم لباسینی
باشلادیلار حسین حسین، ساخلادیلار عزاسینی
هانسی عزیزه ئولمه میش یاندی بیله مخدرات؟
.
بیر ایله حالده حسین یاده سالوب حبیبنی
دردینه چاره ایتماقا آختاروب اوز طبیبنی
تاپدی تمام عمردن بیر او نفس نصیبنی
ایستدی دلده قالمیا، کاشف عشق اولان نکات
.
عرض ایلدی خدا منیم گر چه ئولوبدی اکبریم
اللریم اوسته اوخلانوب ظلمله تشنه اصغریم
قیزلاریم آغلور، اوخشوری باجیلاریم حرملریم
دل سنیلندور، سهلدور هم بو بنین، هم اول بنات
.
نفسیمه بو وجودیله بزم وصاله حایلم
طایر روح سسلنور، تازه حیاته مایلم
آختارورام اودور سنی، باب امیده سائلم
دینجلی سینسا بو قفس، عین حیات اولور ممات
.
لفظ قبول ویرمیشم سن کیمی بی قرینمه
دگسه دوباره اوف دیمم، مین بیله یاره سینمه
شمر سو ویرموری خوشام، تشنه جگر سکینمه
هر یانا گر چه زینبون گوز یاشی تک آخار فرات
.
خوشدور الهی قارداشیم اولماقی سرنگون علم
قوللاری کوی عشقده، بی سبب اولمیوب قلم
قانیله ایلیوب همی سر شهادتین رقم
هم کتب مصائبون اولینه مقدمات
.
بولموشم هر نه ویرمیشم لایق آستان دگل
سنسن اوزون ویرن آلان، کیمسیه بو نهان دگل
مین بیله عالمه خوشام، بو که بیر امتحان دگل
مقصد دل دگل مگر، امت ناجیه نجات
.
قادر لایزالیدن یتدی حسینه بیر ندا
قطب مدار عالمی حیرته سالدی بو صدا
لفظ محیطیله او دم، اولدی محاط ماسوا
دولدی همان صلائیله نه فلکیله شش جهات
.
غم یمه یا حسین، سنه بول گیله خون بها منم
ویرم اگر نه ایستسن، معطی هر جزا منم
عهدینه ایلین وفا، عاشق باوفا منم
چون منیلندی حشرده اجر دماء سائلات
.
ارض سنون، سما سنون، ماه سنون، فلک سنون
حور سنون، جنان سنون، عرش سنون، ملک سنون
حوض سنون که تشنه سن، بو هامی ماملک سنون
یتمیه جاخ به غیر سن، کیمسیه بیله التفات
.
عالمه یا حسین شفا تربت مقتلونده دور
مرتبه مطولون شرحی بو مجملونده دور
بیرده عصات امته، حکم نجات الینده دور
هر کسه ایسته سن اوزون مهر ایله ویرگلن برات
.
#صافی محبت اهلیسن، نور حق اکتساب ایله
هر قدر اولسا ممکنون جرمدن اجتناب ایله
آل علی مصائبین دفتره یاز حساب ایله
عین محاسباتده خرج اولی بو مکاتبات
.
#حسینیه_شهادت
#گوردوله_تشنه_جان_ویرور_منبع_چشمه_حیات
#صافی_تبریزی
#ترکی
.
نظر دهید