زبدةالاشعار

گوردی حسین خطرده کتاب اِللهینی #خروج_مدینه_انور_اردبیلی

ترکیب بند
خروج قافلۀ عشق از مدینه
.
.
.
مرحوم انور اردبیلی
.
.
گوردی حسین خطرده کتاب اِللهینی
ناچار قالدی ترک ایلدی زادگاهینی
.
بدعت لر آشکاریدی میخواره حکمران
ابقای دینه قیلدی فدا اوز رفاهینی
.
سنگیندی تعهّدی یوم الستیده
نادیده دوتدی عالمون اجلال و جاهینی
.
خورشید دینی درک ایده بلموردی چهره تار
زایل ایدوبدی تودۀ ابر سیاهینی
.
جسم حسینده واریدی چون روح مرتضی
بی واهمه دیوردی یزیدون گناهینی
.
حقّینده جدّی لَحمک لَحمی دییَن حسین
جان نقدی الده قصد ایلدی عشق راهینی
.
پیغمبرون مدینه سینی قویدی بی صفا
سعی ایلدی اله گتوره دل بخواهینی
.
ظلمت گئجه چخوبدی ایویندن بو نیته
ایثار ثاریله تاپا عشقین پگاهینی
.
سیره چخوبدی یا للعجب نصف شبده گُون
همراه ایدوب نجوم درخشان و ماهینی
.
قویدی بتول یوسفی حیرتده یوسفی
چخدی او چاهدان بو گزور عشق چاهینی
.
سسلندی باغلانان قاپیلار گئتمه یا حسین
سلطان بو نوعی ترک ایلمز بارگاهینی
.
صغرانون آغلاماقینه بیزده دوام یوخ
آرام ایله بو غملی ایوین بی پناهینی
.
یاددان چخوب اوزی گوزی اکبر گوزینده دور
یورقون مریضه نون نظره آل نگاهینی
.
کپریک سانی آخور یوزینه گرچه گوز یاشی
اشکی چتین خموش ایلیه سوز آهینی
.
.
.
غملی حبیبه ال چکه بلمور حبیب دن
ناخوش قزی نیه آیورورسان طبیب دن
.
.
.
پروردگانِ معرفت و عفّت و کمال
اگلشدی اوز محاملینه آل ذوالجلال
.
سس سیز مینوبله محمله سس سیز اوتوردلار
منزلّرینده قطع اولوب آوای قیل و قال
.
قاسم سرِیّه محملینه پاسدار اولوب
لیلایه حافظ اکبر خوش خلق و خدّ و خال
.
عباس علیّه زینبنی ایتدی جابجا
من نوکرم دیدی سنه ای فاطمه مثال
.
گون گورمین یوزیوی گرک آیدا گورمسون
تخت روانویون باجی جان پرده سنده سال
.
اطراف محملینده سنون ای محجّبه
ورّام عقاب مثلی منازلده پرّ و بال
.
آخر نفر که چخدی او ایودن ربابیدی
آغوش مهرده تزه مولود نیک فال
.
آی پارچاسی کیمی یاری قرخ اولمیان بالا
عمری مسافرتده ولی اولدی نیمه سال
.
تا ایستدی کوچه قاپوسندان چخا رباب
باخدی حیاط منزله حسرت او خوش حصال
.
گوبا دیدی گوگل قوشونون آشیانی سن
ای صحن خانه عزّتیوه یتمسین زوال
.
الآن که چوللره دوشورم سینه ده بالام
عشقیله آستانوی ئوپرم گر اولا مجال
.
باجادی سس گلیدی همان صحن خانه دن
ای همسر مُؤَدّبۀ مَفخرُ الرّجال
.
ای کاش گئتمگون کیمی اولسون قیتمگون
یوز ویرمسون سفرده سنه غصّه و ملال
.
دست خطر یتیشسه اگر دیلسز اوغلوا
امکانون اولسا گلمه خانم کربلاده قال
.
.
.
گلسون عزالی کچمیجکسن اطاقوه
اولماز دوام منده سنون آغلاماقوه
.
.
.
مُلک ولا خدیوی حسین میر کاروان
گوردی ربابی مضطرب حالتده ناگران
.
فرمایش ایلدی ایوه حسرتله باخما چوخ
ای با وفا یوبانما ایله ترکِ خانمان
.
سن غملی سن عزیزیم اگر منده غملیم
تأخیره سالما گتملیدور غملی کاروان
.
صیّادلر الندن امان اولسا گر قوشا
امر محالیدور ایلسون ترک آشیان
.
ناراحت اولما سن قیدرسن بو منزله
زینت تاپار دوباره سنیله بو دودمان
.
شاید حسینی کوفه لی لر ساخلیا قوناق
گوز یولدا منتظردی منه نامه لر یازان
.
غربتده قالسام اصغری ده ویرمرم سنه
تازه آچان گلونی چوخ ایستور بو باغبان
.
صوددن دویور گوزل بالامی قویما آغلیا
سرمایه دور یامان گونه بو طفل بی زبان
.
بیر گون قباقوه گله شاید صود اولمیا
پستانوه بالام ال آتا درناقندا قان
.
بی اعتباریدور بلورم گردش فلک
بیر سوز دیوم یادوندا سنون قالسون هر زمان
.
چوخ اُچونی فلک قولی قوتّلی ایلیوب
چوخ جیرانی یخوب یره بیر تیر و بیر کمان
.
تخت روانده یریوی راحت ایتمیشم
احوالون آلمیشام نظره چون اوشاقلی سان
.
الله سنی اوزی ایلسون عاقبت بخیر
شخصاً کجاوه وه اوزومَم یولدا پاسبان
.
یوخ شرح و بسطه حاجتی فهمیده سن رباب
آخر سوزی سنه ایدورم رمزیله بیان
.
.
.
تاب ایله گر چه چوخدی گیدنده اذیتون
اما گلنده فکر ایدورم آزدی زحمتون
.
.
#حضرت_صغری
.
صغرا اؤتوردی اشک تریله گیدنلرین
هجران داشی شکست ایلدی قوش کیمی پرین
.
اگلشدی صحن خانه ده باخدی اطاقلارا
فکره گیدوبدی بیربیرینه ووردی الّرین
.
دوتدی یوزین سمایه طرف گلدی شِکویه
بیرساده سوز دیدی ولی معناسی چوخ درین
.
باغلاندی دودمان علی دینجل ای فلک
سوندی یانان چراغلاری اولاد حیدرین
.
آی آسمانی زینت ایدن خوش ستاره لر
شهر نبی ایتوردی نجوم منوّرین
.
سیزده آخون منیم آخان اولدوزلاریم کیمی
قاره گیوبدی خانه سی ختم پیمبرین
.
ظلمت ایدون سَمانی قرانلوق ایویم کیمی
گوز داغینه توان یوخودی چون بو مضطرین
.
ای باد نیمه شب اود آلوب یاندیر عالمی
قلبیم دوتوبدی اود نه اَسورسن سرین سرین
.
داخل اولوبدی منزله دیزلر اسه اسه
باشدان ایاقه دوتمیشیدی رعشه پیکرین
.
خاموش ایدوب اطاقیده شمع شبانه نی
بیر گوشیه سخیلدی او قز آچدی معجرین
.
گوردی اوزین غریب ایوی اوخشاتدی غربته
غم غصّه سولدران یوزینه توکدی تل لرین
.
سسلندی ای منیم ایکی آغلار قالان گوزوم
چوخ آغلیون دیوم سیزه هر لحظه آفرین
.
چخدی واریم یوخا بو گیجه ورشکستیم
سرمایه دور دل اهلینه دیداری دلبرین
.
دل پیچ و تاب ایدور آلا گوز دلبریم گیدوب
یوخ طاقت اللریمده سیله آلنیمون ترین
.
.
.
عجز ایلدیم آپارمادی بو مونس غمی
کول باشیمه اوخومادی دلبر عریضه می
.
.
.
گونلر کچوب او ناخوشا تنگ اولدی روزگار
مشکلدی مرگدن بلی احبابه انتظار
.
فکریمده وار تخیّلی بر منظره یازام
شاعر تصرفات ایده شعرینده حقّی وار
.
زندانه دونمشیدی بنی هاشم ایولری
هر ایوده واریدی نچه افتاده اشکبار
.
جُغدِ عزایه مسکنیدی مسلمون ایوی
مسلم دیوب باجی لاری ایلوردی آه و زار
.
بیرده علینون اوغلی ابوالفضل منزلی
دوتموشدی بام و روزن و دیوارینی غبار
.
الله جهاندا هیچ ایوی بی صاحب ایتمسون
بی سرپرست ایوین اولار اجلالی تار و مار
.
آبادیدی اگر چه ابوالفضل منزلی
ام البنین گوزینده ولیکن خرابه وار
.
عبّاسون اوغلی بیر آناسی بیرده همسری
اوچ چاره سیز قالان هر اوچی مین غمه دچار
.
اوچ مینجی او امام حسن دودمانیدور
صغرا و امّ سلمه او منزلده بی قرار
.
سنّی کئچن یبر عورتیله بیر مریضه قز
در بسته ایوده هر ایکیسی وصلته خمار
.
.
#حضرت_ام_البنین
#عبداله_العباس
.
گویا تصادفی او قوناق گلمین ایوه
عبدللهیله امّ بنین وارد اولدولار
.
بیربیرلرینه باخدیلار آغلاشدیلار بیر آز
هر کس ایدوب اورکده اولان دردین آشکار
.
صغرا باخوب عم اوغلوسی عبدللهه دیدی
ای قامتی اوجا عموما زنده یادگار
.
رنگون سولوب شبیهدی بی باغبان گله
اولما ویرور زمانه سنه من کیمی فشار
.
ویرم قسم گوزل عموما گونده گل بیزه
قربانوم داریخما کچر دور روزگار
.
.
.
درک ایلین زماندا محبت مقالتی
عباسون اوغلی باشلادی اوز شرح حالتی
.
.
.
غم غصّه لر منی گتوروب زاره عم قزی
جبر زمان ایدوب بیزی بیچاره عم قزی
.
آواره سن نجه بو بیوک دودماندا سن
منده او ایوده قالمشام آواره عم قزی
.
اولسون قسم عم اوغلوم او قاره گوز اکبره
سن تک اولوب منیمده گونوم قاره عم قزی
.
چوخ غملیدور بیوک نه نه می تک قویانمورم
چوخ مایلم گلم سیزه دیداره عم قیزی
.
یوخ فرقی ایولرین بیزیم ایوده سیزونکیدور
قید وفانی ایلمرم پاره عم قیزی
.
بیر کاروان مسافریمیز گئتدی حیف اولا
تاپشوردولار بیزی در و دیواره عم قیزی
.
.
اوغلانلارا نه همسفر ایتدی اولار منی
نه قوشدولار سنی بالا قیزلاره عم قیزی
.
مسجدده بوش قالوبدی بنی هاشمون یری
نسگلدی روح احمد مختاره عم قیزی
.
برنامه یولّا سیدی گیدنلر قالانلارا
تسکین اولاردی درد دل آزاره عم قیزی
.
کهنه لباس ده منه بر عُمده درد اولوب
سیره چخاندا کوچه و بازاره عم قیزی
.
باشدان عمامه می گوتورم سنده معجر آچ
عجز ایلیک خلوصیله داداره عم قیزی
.
یوخدور امیدیمز ولی الله کریم دور
وار التفاتی عترت اطهاره عم قیزی
.
گلسه اگر گیدنلریمز دودمانینه
دونسه مدینه میز گینه گلزاره عم قیزی
.
تازه لباس آلاندا منه مهربان آتام
عرض ایلرم آلار سنه گوشوراه عم قیزی
.
#انور سنه یتیشدی خدانون تَفضّلی
بو سوزناک نوحه نی یازدون تَخیّلی
.
.
.
#خروج_مدینه #حضرت_صغری
#حضرت_ام_البنین #عبداله_العباس
#گوردی_حسین_خطرده_کتاب_اللهینی
#انور_اردبیلی
#سیمای_عاشورا_انور #ترکی
.
.

متن پیشنهادی:  گوردی که گلور خود بخود آوازۀ ناقوس #دیر_راهب_لعلی_تبریزی

نظر دهید

جستجو در نام شاعر یا مناسبت

Search
Generic filters
Exact matches only
Filter by Custom Post Type

کلمات کلیدی: فهرستاشعار14معصومموضوععاشورائیانماهشاعراصفهانیتبریزیاردبیلیزنجانی

جستجو در مصرع اول

Search
Generic filters

Filter by Custom Post Type

دسته بندی درختی

دسته بندی درختی