دفن حضرت زهرا (س)
.
.
مرحوم فتی تبریزی
.
.
گوردی ظلمت گجه هر سمت سکوت
رعب لی منظره مثل برهوت
.
بیر علی بیر گجه بیر نعش بتول
اودا کی ظلم عدودن مقتول
.
بیرده محنتلره ناظر الله
او کی هر سرّ و علندن آگاه
.
باخدی خیبر قوپادان قدرتدن
قالمور اول قدر دوشه طاقتدن
.
گوردی لازمدی ایده راز و نیاز
ایکی رکعت قیلا اللهه نماز
.
دادینه یتدی اودم قادر حیّ
گوردی بیر سس گلور آهسته اِلَىّ
.
قویدی زهرانی یره افتاده
گوردی بیر قبر او دم آماده
.
ایکی ال چخدی او دم نورانی
آلدی تا قبره قویا زهرانی
.
بیر بیره ووردی الین حسرتدن
باخدی آز قالدى ئوله محنتدن
.
یوزونی قویدی اونون باش داشینا
ویردی رخصت او زمان گوز یاشینا
.
اورگی دولدی غمیله داشدی
صحبته شاه ولا دیل آچدی
.
بوغولور سینه ده غملی نفسیم
دولانور روحوما یورقون قفسیم
.
نیلیور سنسیز على دنیانی
قورخورام عمریم اولا طولانی
.
ای قرانلیق گجه سن شاهد سن
یانورام من نجه سن شاهد سن
.
یانمیوم من نجه یاریم گیتدی
اونیلان دار و نداریم گیتدی
.
کاش علینونده چخیدی جانی
اوندا کی دفن ایلدی زهرانی
.
اوزولوبدور بو الیم هر یردن
همی زهرا همی پیغمبردن
.
نه ایدوم فاطمه نه چاره تاپوم
ایویم اوچدی داخی باغلاندی قاپوم
.
بیر منم بیر بو قرانلوق صحرا
ویرموسن سنده منه سس زهرا
.
در دیمی وار نه گلن هایه دیوم
آیدا چخمور سوزومی آیه دیوم
.
دردیمی دلده اولان آهه دیوم
یا گیدوم چولده اولان چاهه دیوم
.
نه یوزیله ایوه ساری قییدیم
خبر آلسا سنی زینب نه دیوم
.
باشلانوب ایوده یقین شیون و شین
زینبون اوخشوری آغلار حسنین
.
دیوری شامه دؤنن گوندوزی وای
ضرب سیلی له سولان گل یوزی وای
.
ظلم الیله ایوى اودلانمیش وای
تازیانه ئیله یوزی یانمیش وای
.
گجه لَردَنده قرانلیق گونی وای
ظلمیله سقط اولونان محسنی وای
قالمادی سنده توان ئولدون آنا
آه و افسوس جوان ئولدون آنا
.
یوخ ئوزون ئولمدون ئولدوردی عدو
اوندا که یولدا سنی ووردی عدو
.
بوقدر یازما دایان بسدی فتی
هاردا یازماقلا بو غم باشه چاتا
.
.
#فاطمیه #فتی_تبریزی #فاطمیه_شهادت #ترکی #زبدةالاشعار
نظر دهید