گوروب عباس نام آور حسین بی یاور آتلاندی #عباسیه_دلریش

در خصوص میدان رفتن جناب ابوالفضل العباس (ع)
.
#زبدةالاشعار
.
: @nohe_torki
.
مرحوم دلریش
.
گوروب عباس نام آور حسین بی یاور آتلاندی
توکوب رخسارینه گوزدن او گون اشک تر آتلاندی
.
گلوب عرض ایلدی قارداش بو گون وئر رخصت میدان
گوریم بو لشگر اعدا ندندور یکسر آتلاندی
.
قالوبدور تشنه لب بو چولده جمله آل پیغمبر
ائدوبلر بیر طرفده غش علی اصغر آتلاندی
.
سکینه بی قرار اولموش بو هایهوی دشمندن
گوریم آیا نه غوغادور بو قوم کافر آتلاندی
.
آلوب چون رخصت میدان شجاع یل یل هاشم
ائدوبدور آیه فتحی باشیندا مغفر آتلاندی
.
سکینه خیمه دن گوردی که اول ماه بنی هاشم
آتاسی چون وحید اولموش عمومی مضطر آتلاندی
.
گلوب عرض ایلدی جانیم منیم اولسون سنه قربان
داخی قویمام بو میدانه که یوخ بیر یاور آتلاندی
.
بو میدان قانلی میداندور بو میدانه گئدن گلمز
نئجه شهزاده قارداشیم علی اکبر آتلاندی
.
دونوب یاسه طوئی اول قاسم داماد ناکامین
عروسی باشینه سالمیش قرادن معجر آتلاندی
.
عموجان یوخ ترحم بو گروه بی حیالرده
دوروبلار دسته دسته اللرینده خنجر آتلاندی
.
بودور قورخوم سنی آلسون الیمدن لشگر عدوان
بیزی آخر اسیر ائتسون بو شمر ابتر آتلاندی
.
بویوردی حضرت عباس که ای سرو دلآرامیم
که دون باخ بیر بو میدانه نقدری لشگر آتلاندی
.
بویاندا شاه لب تشنه قالوبدور بی کس و تنها
قیریلمیش یار و انصاری بر شاه محشر آتلاندی
.
تسلّی وئردی اول طفله او سبط ساقی کوثر
وداع اهلبیت ایلوب چو شیر داور آتلاندی
.
صنوبر قامتینه بیر زره پرویندن گییدی
گوتوردی تیغ آتشبار و هم بیر جوهر آتلاندی
.
فلک قوسین کمان ایلوب او شیر بچه یزدان
سالوبدور چگنینه ترکش او نور انور آتلاندی
.
گوتوردی بیر سپر الماس اونون اطراف دورینده
که قبه یرلرینده نصبیدی چون اختر آتلاندی
.
کمند زلف حوران بهشتدن گتدی چون جبریل
مایکلر تماشایه آچوبلر چون در آتلاندی
.
اگر گورسیدی ضربین رستم و سهراب و اسکندر
اولوردی بو شهنشاهه کمینه چاکر آتلاندی
.
سوار اولدی عقابه چون در دردانه حیدر
قباقینجه دوشوب جبریل أول نام آور آتلاندی
.
دوشوب عیسی یمینیندن و هم موسى یساریندن
ائدوب تورات و انجیلی دلینده ازبر آتلاندی
.
روانه اولدی میدانه او شیر بیشه هیجا
یتوب صفدر قباقینه که اول خوش منظر آتلاندی
.
چکوب بیر نعره خشمیندن او دم شیر غضنفر فر
ائدوب اول نعره ضربیندن که لرزه یرلر آتلاندی
.
دیدی ای لشگر عدوان منم سقای مظلومان
آتام دور حجت یزدان بابام پیغمبر آتلاندی
.
چکوبدور غیضیله تیغ شرربارین غلافیندن
اوزینی لشگره ووردی داغیلدی لشگر آتلاندی
.
ائدوبدور کشته نی پشته دو نیم ایلوب علمداری
اولوبدور قان او چولده سویرینه سئللر آتلاندی
.
ائدوب بیر نوع جنگ اول شه مایک سؤیلدی احسن
گورن سؤیلردی گویا کربلاده حیدر آتلاندی
.
توکوب برگ خزان تک باشلاری ایلوب پراکنده
عقابه هی ووروب سالدی او دمده لنگر آتلاندی
.
فراته دوندروب مرکب گئدردی مرد مردانه
نئجه آب بقادن اوتری اول اسکندر آتلاندی
.
یتوب ناگه فراته حضرت عباس شیرافکن
گوروبدور سو یولین کسمیش او قوم کافر آتلاندی
.
گلوبدور غیرتی جوشه چکوب تیغ شرربارین
داغیتدی قوم اعدانی او دم اول سرور آتلاندی
.
فرات ایچره یتوب دولدوردی مشکین اول وفا پرور
قایتدی رزمگاهه همچو باد صرصر آتلاندی
.
دیسم تا حشره دین بو محنتی بالله تمام اولماز
که من بیر شمّه عرض ائتدیم آچوب گوگلوم پر آتلاندی
.
خداوندا باغیشلا لطفیله «دلریش» مداحی
اولوبدور بو شهنشاهه بیر عبد کمتر آتلاندی
.
.
#عباسیه_شجاعت
#گوروب_عباس_نام_آور_حسین_بی_یاور_آتلاندی
#ترکی
.
#زبدةالاشعار
.
: @nohe_torki