گونول ایستر یازام بیر نکته لر اسرار خلقتدن #حیدریه_شبخیز

مدح و منقبت حضرت علی (ع)
.
#زبدةالاشعار
.
: @nohe_torki
.
مرحوم #شبخیز
.
گونول ایستر یازام بیر نکته لر اسرار خلقتدن
ولیکن عاجزم بوباره ده علم فصاحتدن
.
نه من تک بلکه عاجز دور جهاندا هر قلم اهلی
که تشریح ایلسون یازسین رموز راز خلقتدن
.
وئروبدی یوزمنه بیر اوز گه حالت چوخ عجایب دور
گلیبدوروجده گونلوم بو گئجه اول شور و حالتدن
.
منم بیر کهنه دفتر بیر قلم بیرده خیالاتیم
بو فکریله چیخام بیر لحظه دیشره کنج خلوتدن
.
تخیل عالمنده نقش اولور گیزلین حقیقت لر
مشخص دور مجاز آیریلمیوب هرگز حقیقتدن
.
او دور عنقای فکریم اوج ائدور افلاک عرفاندا
بو سودایه که کشف اتسون رموز قاف وحدتدن
.
چیخوبدور ساز عشقین پرده سی شور حجاز اوسته
گئچوبدی نای ذوقون نغمه سی حد نهایتدن
.
گلوبدور الله الله بو گئجه عشقیم عجب شوره
که تا الهام آلا اسرار مرموز طبیعتدن
.
گزیردیم شوق دریاسین گوزوم بیر گوهره دوشدی
که سالموش لعل و یاقوت و عقیقی قدر و قیمتدن
.
ائله والا گهر گوهر که مثلین گورمیوب عالم
ائله گوهرکه عالم لر ائدللر غبطه حسرتدن
.
او گوهرکه اولا مولی الموالی حیدرکرار
بئله بیرگوهره کعبه صدف دور شان و شو کتدن
.
علی نین رتبه سی عیسی بن مریم دن اولوب افزون
آناسی کعبیه تاپدی تشرف تا شرافتدن
.
جلالت سیر قیل بنت الاسده باخ مقاماته
که جان تک چکدی آغوشه اونی کعبه جلالتدن
.
ولی بیت المقدس منع قیلدی ام عیسانی
که ای بانو اوزاق دور بو مکان اول وضع و حالتدن
.
اونی بیت المقدسدن کنار ائتدی او حالتده
بونی بیت الحرامه دعوت ائتدی حق فضیلتدن
.
غرض بو قدر تفصیل کلامه طول وئرماقدان
بودور قصدیم یازام مدح علی شاه ولایتدن
.
او شاه اولیادن که اونون شان و مقامنده
اولوبدور آیه نازل رب الارباب مشیتدن
.
علی اسرار خلقتدورعلی راز طبیعت دور
مجزادی هر اعضاسی بو خلقتدن، طبیعتدن
.
علی بیرماه رخشان دور سپهر علم و حکمتده
که کسب فیض نور ایلوبدی خورشید رسالتدن
.
بو آیدان اون بیر اولدوز آیریلوب چرخ ولایتده
که وئرمیش کون و امکانه ضیا نور امامتدن
.
غدیر خم دا معلوم اولدی جاه و پایه قدری
بو امر اثبات اولوبدور مختلف قول و روایتدن
.
اگرکوهان افلاکه قورولسا هودج جاهی
قویار نافین یئره غضبای گردون بار غیرتدن
.
سنه نهج البلاغه الده بیر محکم سند دور کیم
ائدر هر باب وفصلی مین حکایت لر بلاغتدن
.
ائدردی اجتماعین دردینی درک اوز حیاتنده
اودور بیر لحظه غفلت ایلمزدی اول جماعتدن
.
گچردی اوز جانیندان ایسته سیدی کیمسه گر جانین
ولی گچمزدی بیر دینار بیت المال امتدن
.
او دور علت گزردی کوفه شهرین هر گئجه گزلین
که واقف اولماسون بیر کیمسنهۀ معلول و علتدن
.
یتیم لر یاتماسیدی کوفه شهرینده گئجه راحت
گوز اورتردی بو مولا خورد و خواب و استراحتدن
.
گوروب هاردا بو مولانین نظیرین کیمسه عالمده
که بذل اتسون غذا سین قاتله رحم و مروّتدن
.
پیمبردن روایت وار الیمده معتبر عنوان
بئله مفهوم اولور معنی، او مضمون و عبارتدن
.
علی نین ذوالفقاری اولماسیدی جنگ خندقده
اثر قالمازدی آئین طریقتدن شریعتدن
.
معارک عرصه گاهنده حریف اولمازدی دم ویرسون
لوای حیدری گورجک شهامتدن شجاعتدن
.
یاناردی خرمن گردون گورنده برق شمشیرین
دوشردی لرزیه طاق فلک هول و صلابتدن
.
چیخاردی طاق مینایه جزاک الله ملک لردن
گئدردی عرشه احسنت صداسی اهل جنتدن
.
منیم یوخدور بیانیم تا ائدم عدل علی شرحین
کفایتدور قانار عارف بو اسراری اشارتدن
.
یازیبدی چوخ صراحتله مسیحی«جرجی زیدان»
قتیل اولدی بو سرور کثرت عدل و عدالتدن
.
بو مولانون دلیل عدلینه گر ایسته سن شاهد
مبرهن دور او خون آلوده محراب عباتدن
.
ائله سر مستیدی جام بلادن ساقی کوثر
که چکدی باشینه لا جرعه صهبای شهادتدن
.
دئمم الله دور هرگز، بو شرک محض دور اما
ولی الله اعظم دور علوّ شأن و عزّتدن
.
ائدیبدور جلوه وجه الله ولی الله جمالنده
دگیل الله ولیکن مظهرحق دور وجاهتدن
.
بو دور وجه الله باقی بهشت عدنده ساقی
وصاله جمله عشاقی ائدن واصل سقایتدن
.
بودور لوح حقه عنوان کتاب منزله برهان
بونی کیم رهنمابیلسه اولارفارغ ضلالتدن
.
او کس که اقتدا ایلرطریقتده بو مولایه
اولار آسوده خاطر وحشت روز قیامتدن
.
بودور امداد ائدن نوحه حوادث پرتگاهنده
بو دور خضره وئرن عمر ابد دریای رحمتدن
.
بودور اسمانی تعلیم ایلیوبدورصفوت اللهه
بودور اسراری تلقین ایلیوب جبریله حکمتدن
.
بودور کسدی علاقه عالم نفس و علایقدن
بودورچکدی الین تخت خلافتدن ریاستدن
.
بونون بعد از رسول الله نظیرین کون و امکاندا
نشان وئرمیبدی تاریخ بشر هئچ قوم و ملتدن
.
نه جرعتله بیان قیلدون علی نین مدحتین شبخیز
مگر لطفون قیلوب مولا سنه فیض عنایتدن
.
بوبیر ران ملخ دور تحفه درگاه سلیمانه
دگیل قابل ولیکن ناامید ائتمز اجابتدن
.
بو مولا باب رحمتدور گداسین بوش یولا سالماز
الی هر چند بوشدور بو فقیرین قابلیتدن
.
او دریای کرامتدور منم بیر قطره ناچیز
قیلار بو قطرنی واصل او دریایه کرامتدن
.
.
.
#حیدریه_مدح
#غدیریه
#گونول_ایستر_یازام_بیر_نکته_لر_اسرار_خلقتدن
#ترکی
.
#زبدةالاشعار
.
: @nohe_torki