در عزیمت حضرت ابوالفضل به نهر آب
و مقابله با دشمن
..
..
..
..
شاهی اردبیلی
..
..
..
..
گیدی وزیر شاه دین جوشن و خود زرنگار
توسن بادپا مینوب ، اولدی فراته رهسپار
..
..
..
..
پهنه آسمان دولوب لشکر انکسافدن
برق لرون قلیجلاری خارج اولوب غلافدن
سیندی بولیندی نورلر آخدی توکولدی قافدن
کیچدی فضاده رعبلر مرتبۀ گزافدن
پیرهن فضا دولوب باد افق شکافدن
بیشه و باغ ایدوب فغان چشمه لر اولدی اشکبار
..
..
..
..
آتش سرخ تیره دن گیدی فلک لباس لر
پیکر چرخ پیردن یاغدی او دم هراس لر
خوف لر ایتدی گوزلری قاشلارا ناشناس لر
عاطفه گلشنین پوزوب یاردی داغیندی داسلر
قرمزی کوینگین قرا تپراقا بوکدی یاسلر
سوسن آچوب عزایه دل لاله لر اولدی داغدار
..
..
..
..
گنبد نیلگونده گیدی قارا نجوم لر
ایتدی عروس مشرقون حجله سینه هجوم لر
صبحلر اولدی شام لر شام لر اولدی شوم لر
پنجه لرینده رعبلر ، داشلاری ایتدی موملر
میندی عقاب عقابینه ، وحشته دوشدی بوم لر
شش جهت ایلیوب فغان، نالیه گلدی هشت و چار
..
..
..
..
گوردی قشون هراس آخار یال و سم عقابدن
نعل سمنددن چیخوب برق کیچر شهابدن
بیر قشون اوسته بیر نفر حمله ایدر رکابدن
باک ایلمز او قان توکن ، نعره چکن دوابدن
عاشقه هاردا وار خطر، آتش و باد و آبدن
شعله نی ژاله بار ایدر ، نکهت کوی عشق بار
..
..
..
..
عشقدور آستاننی اوجده ایلین بنا
نعشی چکوب مغاکدن عرشده ایلین رها
عشقده دور مراحل کسب کمال کبریا
عشقده دور مشارق مهر مقام منتها
عشقده دور تجلی طور «تعز من تشا»
حضرت پاک عشقدور ساحت قدس کردگار
..
..
..
..
عشقیله سیلدن تاپار عاشق اولان سلامتی
نیزه ده اوخدا درک ایدر برد یمن ظرافتی
خنجر تیزدن گورر برگ سمن لطافتی
کیمدی خطا دیلین آچوب مطرح ایدن بو صحبتی
سالدیلار عاشقون قولین اولدی زیادہ محنتی
عاشقه سر سرابدور لحم و عظام ننگ و عار
..
..
..
..
عاشقون اوخ یاریب توکوب سینه سنی فلات ایدر
سینه سینی فلات ایدوب نشر مکملات ایدر
نشر مکملات ایدوب عالمی مات مات ایدر
عالمی مات مات ایدوب نیزه لری نبات ایدر
نیزه لری نبات ایدوب ، دشمنه التفات ایدر
دشمنه التفات ایدوب ، قهرنی ایتمز آشکار
..
..
..
..
شعله مگر خلاف ایدوب ساحت عشقی یاندیرار
عاشقی قانیلن و یا نیزه قلینج بویاندیرار
عشق اوزی بیر فروغیلن داغ داشی پارچالاندیرار
عشقه طرف الین مگر، خوف و خطر اوزاندیرار
عاشقی سیردن و یا سد اجل دایاندیرار
یا متوقف ایلیر ، پنجۀ مرگ و احتضار
..
..
..
..
ویردیلار عاشقین قولی اولدی قلم دایانمادی
صول اله آلدی خنجرین ایتمدی غم دایانمادی
یخدی داغیتدی صفلری ویردی بهم دایانمادی
سالدیلا صول قولین گنه اولمادی کم دایانمادی
سیر فراز عشق ایدوب میر حرم دایانمادی
گلدی صدا سپهردن آفرین ای ذوى الوقار
..
..
..
..
قول ندی مین قناد آچوب عرش خدایه سالدی پر
قالخوب آت اوسته بیر انوب ایتدی ئوزینده بیر سفر
جرئتی گورسنوب فزون همّتی اولدی کارگر
خرجه ویروب رسالتین شاد و جبین گشاده تر
هیچ دیه سن که سالمیوب قول لارینی لعین لر
یا ایله بیل که اوخ دگل دشمنی ایلیور، نثار
..
..
..
..
یللر اسوب قولاقلارا دگدی صدای طرّقو
تیرلرین کمان لر ، درسنی ویردی، مو به مو
اوخلار آچوب هواده دل ایستدی عذر اولوب فرو
بیراوخ اصابت ایلدی مشگه دلوب توکولدی سو
ران مبارکنده نم حس ایلدی او نیک خو
پیکرینه سویوخ هوا کیچدی قوتاردی کار زار
..
..
..
..
آتدی زمان نقابینی سیندی بوتون حدودلر
واقعه لر وقوعنه تاپدی او دم ، ورود لر
گلدی ظهوره قوّه دن ایلدی قان عنود لر
سایه لنوب طلوع لر ، پرده لنوب شهود لر
گورمیه لر که تا انور آی یوزینه عمودلر
اندی انن یاریلدی آی ، آینه اولدی سنگسار
..
..
..
..
قول لارینون کسیلمگی ایتمدی کم صلابتین
سینه سینون بولونمگی آلمادی استقامتین
تارکنه عمود انوب بیلمدی هیچ جراحتین
آلنی دلیندی تیرلن ویرمدى استطاعتین
رخنه سی مشگنون پوزوب حالینی آلدی طاقتین
سیر فراز عشقدن دوشدی دایاندی بیقرار
..
..
..
..
سسلدی هارداسان حسین مشگیم اوتاندیرور منی
تیره غبار شرملن ، قاره پویاندیرور ، منی
غم لر آلوب قوجاقنه گور نه دولاندیرور منی
اود سوویلان کیچر ولی سو ئوزی یاندیرور منی
ایندی اجلده ناز ایدور گور نه یو باندیرور منی
هیچ دیمیور که قلبدن قانیم آخور فرات وار
..
..
..
..
گرچه بوگون یارالیام خنجر و نیزه دن حسین
بودل زاره یول ویروم غملری من ، ندن حسین
ملک عدمدن ایلرم عشقویلن عدن حسین
غم ندی گرچه دوغرانا ، مین یره بو بدن حسین
غم بودی کی خجالتم نازلو رقیّه دن حسین
تشنه لرین تصوّری ، آلمیش الیمدن اختیار
..
..
..
..
شیشه عمری نیلورم ، سیندیرا قوی اجل داشی
چوخدان آلوبدی جانیمی ، اکبروون قلم قاشی
بیرده بدن کی قول لاری یوخدی او نیلیور باشی
آیری سبیله وار یری قانه دولانسا گوز یاشی
یعنی که نازلو قیزلارون، قمچی لر اولدی یولداشی
اسب خزانی زین ایدوب گللری ایتدیلر سوار
..
..
..
..
من نجه ساخلیوم بو دم زنده توان و طاقتی
فاش گورور بو گوزلریم، نقش هجوم و غارتی
من گورورم رقیّه نون اولدی بهم جلالتی
دخت یزیده ویردیلر مصطبۀ امارتی
سانما حقیر « شاهیا » مسئلۀ ریاستی
دانشی جهل ایدن بودور ، ایله بو نقشدن فرار
..
..
..
..
#عباسیه #شاهی_اردبیلی #عباسیه_شجاعت #عباسیه_شهادت #ترکی #زبدةالاشعار
نظر دهید