طلوع ماه محرّم و ورود کاروان امام حسین(ع)به صحرای کربلا و ماجرای ریّان ابن شبیب با امام رضا(ع)
#گریز به #قتلگاه
.
✍️ زبدة الاشعار ✍️
?: @nohe_torki
.
حاج غلامرضا عینی فرد زنجانی
.
گینه دلیمده منیم ناله و نوا گورونور
گوزومده منظره ی دشت نینوا گورونور
.
غبار غم اَلنور باشیمه منیم تنها
نه، بلکه شیعه لر ایچره بیر ابتلا گورونور
.
هلال ماه محرم عیان اولوب گویا
حسین غمینده اونون قدّی انحنا گورونور
.
به یاد نهضت حریّت حسین شهید
تمام مسجد و بازاریده قرا گورونور
.
یازوبلا سینه ی پرچملره حسینه سلام
شعار نهضتی هر یرده برملا گورونور
.
اسنده قاره علم شقّه سی دیور حق حق
که یعنی سلطنت ظالمان فنا گورونور
.
سمایه اوج ائلیور یاحسین سسی هردم
تمام دیده ی عشّاقیده بُکا گورونور
.
نقدری واردی جهان واردی بو مجالس لر
گمان ائتمه بو غوغایه انتها گورونور
.
گرک قرا گیه احباب شاه تشنه لبان
نه چون امام زمان غمده مبتلا گورونور
.
باخاندا مقتله بیر سوزناک سؤز گوردوم
بو سؤزده گوزیاشوز آخسا اونا بها گورونور
.
شبیبون اوغلودی راوی بئله روایت ائدر
امام هشتمه اصحاب او پارسا گورونور
.
دیور که گئتدوم امام رضا زیارتینه
گوزومده غصه لی گوردوم آقام رضا گورونور
.
امام اوغلی ئولنلر کیمی سیزیلّاردی
نه باشدا واردی عمامه نه ده عبا گورونور
.
اوجا سسیله دیور وای سوسوز ئولن بابا وای
گلوبدی جنّ و ملک باطناً اورا گورونور
.
دئدیم بو گوزلریوه من فدا امام رضا
عزا بساطی بو یرده اولوب بپا گورونور
.
نه وار ندن بیله سن آغلیسان بیان ایله
سن آغلیاندا سمادن بلا یاغا گورونور
.
شبیبون اوغلی دئدی بیلموسن محرّمدور؟
عجبدی سنده بو غفلت بوگون اولا گورونور
.
بو آیدا چوخدی مقام و جلالت و حرمت
بو آیدا آغلا حسینه که چوخ بجا گورونور
.
من آغلورام او امامه باشی سوسوز کسیلوب
جهاندا جدّیم حسین تک حقه فدا گورونور؟
.
پیمبرین بالاسین کسدیلر باشین دالدان
قویون قوزی کیمی گوزده او ماجرا گورونور
.
رجب آیندان اولوبدور بش آی جلای وطن
دئمه بابام کیمی بیرده غم آشنا گورونور
.
ئوزی امام اولا معصوم آتا آنا معصوم
ولی بو قدرتیله چولده دوغرانا گورونور
.
شبیبون اوغلی الینده آپاردی صود امرین
دئدی قوشون گوزوزه اودلانان بالا گورونور؟
.
یوخوزدی رحم و مروّت حسینه یوخدی سوزوم
بو دیلسیزه سو وئرون باری جان تاپا گورونور
.
سو وئرمیوبدیله هئچ، کسدیلر باشین اوخولان
گورون که حرمله تک مرتد و دغا گورونور؟
.
بیر ایش گوروبدی بابام خیمیه گئدنموردی
منیم گوزومده او دیلسیز ئولن بالا گورونور
.
بو آیدا جنگی حرام ایلیوب خدای غفور
قتال ماه محرمده چوخ خطا گورونور
.
ولیک امر ائدوب اتباعینه یزید لعین
حسینی قتله یتورماق بو آی روا گورونور
.
حسین قتلینه فتوا وئروب شریح لعین
جهاندا هئچ بئله بیر اشق الاشقیا گورونور؟
.
محرّمون ایکیسی شهریار کون و مکان
یتیشدی بیر یره گوردی بلا بَدا گورونور
.
سوروشدی بو یرون آدی ندور بیان ائلیون
بو یرده غصه و آلام مطلقا گورونور
.
سایوبلار آدلارینی بیر به بیر امامه ولی
گوروبله اصل آدی ارض کربلا گورونور
.
ائشیتجاقین بو آدی بیلدی مقصده یتیشوب
دئدی بو یرده منیم مدفنیم خدا گورونور
.
چاغیردی محضرینه قارداشی اباالفضلی
هایاندا شاه اولا اوردا او با وفا گورونور
.
وورون بو چولده بویوردی خیام طاهره نی
نزول ائتماقا بو یرده اقتضا گورونور
.
ولیک تلّ دالیندا قورون خیام عباس
او تل که گوروسوز گوزلره اخا گورونور
.
او تل حایل اولور عترتیمه دشمندن
اوجادا گر اولا اولاد مرتضی گورونور
.
خلاصه امر امامیله خیمه لر وورولوب
او خیمه لرده حرم اهلی جابجا گورونور
.
چوخ عزتیله اَنوبدی کجاوه دن زینب
نقاب عفت اوزونده قدی رسا گورونور
.
آلوبدی دوره سینی نچّه قارداشی خانمون
وسطده نقطه ی ترکیب انّما گورونور
.
بالاجا قیزلاری نازیله اندیرور عباس
هاموسی شاد و مفرّحدی دلگشا گورونور
.
رباب اصغرینه صود وئرور هله صودی وار
نه حرمله نه کمان و نه قحط ما ٕ گورونور
.
یاتوبدی خیمه ده آهو باخیش گوزل بالالار
نه دام واردی نه صیاد و نه جفا گورونور
.
به غیر از عالمِ سرّ و علن حسین غریب
گشاده رو هامی اولاد مصطفی گورونور
.
گلوبدی محضر سلطانه زینب کبریٰ
گوروب جمال حسینده غم و بلا گورونور
.
دئدی که ای آنامون یادگاری قارداش حسین
ندن گوزونده سنون اشک غمفزا گورونور
.
(حسین حسین سارالان رنگیوه باجون قربان)
گوزل جمالون اولوب رنگی کهربا گورونور
.
بویوردی زینبینه ای آنام نشانی باجی
بو یر منیم گوزومه قانلی بیر منا گورونور
.
بو یر او یردی سوسوز ئولدورلله قارداشیوی
بو چولده باجی آنام خیرالنّسا گورونور
.
بو چولده دوغرانارام من یزیده باش اگمم
بو انقلابیمه تحسین کبریا گورونور
.
جهانه من وئررم درس عشق و آزادی
مرام و مقصدیم هر یرده باصفا گورونور
.
خلاصه گچدی اوگون گلدی روز عاشورا
گوروبله نیزه لر آلتدا او مقتدا گورونور
.
ائدولله هلهله و های هوی زاغ و زغن
یارالی گوردوله میداندا بیر هما گورونور
.
تمام جنّ و ملک چیخدیلار تماشایه
گوروبله راز و نیاز اوسته بیر آقا گورونور
.
بدن یارالی باشی یاره سجده گاهی یارا
وجود اقدسی باشدان باشا یارا گورونور
.
دگنده بیربیرینه لبلری دیور یارب
یارالی لبلر ائدور امّته دعا گورونور
.
سوکوبدی قلبینی تیر سه شعبه زهر آلود
بنای قلبی همان تیریلن فنا گورونور
.
یارالی آلنّینی تپراقه سورتوری آغلور
فقط دیلینده اوخور ذکر ربّنا گورونور
.
دیور بو چولده بلیّاته صابرم الله
حسینده رمز بلایه بوگون بلا گورونور
.
باتوبدی قانیمه بیر بیر وفالی انصاریم
حسینده ملحق اولا ایندی اولّارا گورونور
.
علیّ اکبریمی دوغریوبدی اهل عراق(۱)
عباده قطعه به قطعه او دلربا گورونور
.
خسوف ائدوبدی مهِ هاشمی اباالفضلیم
خجل رقیه دن اول صاحب لوا گورونور
.
باشیمی ذبح ائده حاضردی قاتلیم دالدان
یانیمدادور آنام اما مگر اونا گورونور
.
بو داغلی سینمی تیر سه شعبه گورنه یاریب
کرامتونله سینان قلبیمه دوا گورونور
.
یارالی قلبیمه خاطر باغیشلا شیعه لری
اگرچه شیعه لریمدن سنه خطا گورونور
.
▪️قبض روح امام حسین(ع)در گودال #قتلگاه روز عاشورا
.
حسین رضاً بقضائک دیوردی مقتلده
نه قیزلاری گوزه نه خویش و اقربا گورونور
.
آلوب عمامه اله اشرف رُسُل احمد
یانیندا نوحه کنان فوج انبیا گورونور
.
وداع ائدنده دیوب خیمه ده تَرَکتُ الخَلق
آتوب حجابی اونا ذات لایُری گورونور
.
یارالاروندان آخور قانی ایستی گوداله
یارالار هر بیری جسمینده بیر لالا گورونور
.
دگوبدی مغزینه داش مرکب اوسته قلبینه اوخ
بو حالیلن گینه زنده او رهنما گورونور
.
بو سؤز نه سؤزدی ئورک پارچالانسا انسان ئولر
یتیشدی بیر یره سؤز خامه ده ثنا گورونور
.
دئدی خدا، ملک الموته آل حسین جانین
دئدی بو امر منه مشکل ای خدا گورونور
.
یارالیدور ائلیوم قبض روح هاردان اونی
چاتوبدی اوخ سینه سی اوسته باش باشا گورونور
.
قدملری ، سینه سی، بطنی، آلنی یاره لیدور
بیلکلری، کوره گی، صاف یری هارا؟ گورونور
.
یازولّا گلدی ندا ، جانینی ئوزوم آلّام
بو جان منیمکیدی پیکردن آیریلا گورونور
.
بو قان منیمکیدی گودالی دولدوروب الان
بو قانه ذات خداوند خون بها گورونور
.
بیچیلدی پیکرینه رخت اِرجعی رَبّک
بو خلعت هیکل مجروحینه رسا گورونور
.
قدم گوتوردی سنان الده بیر اوجا نیزه
اونون دالیجا گلن شمر بی حیا گورونور
.
سوسوز بوغازه چالوب نیزه سین دولاندیردی(۲)
قتیل او نیزه ئیلن شاه کربلا گورونور
.
چیخوبدی سینه سینه شمر آه یا زهرا
قرا یل اسدی جهان تیره و دُجا گورونور
.
بهانه شمر و سنان اولدی ، حق آلوب جانین
حسین ذات ربوبیّته فدا گورونور
.
حسین حسین دییر اخلاص اوزیلن«عینی فرد»
گئدر هایاندا گوره بی ریا عزا گورونور
ـــــــــــــــــــــــ
(۱)فقطَّعوهُ ارباً ارباً
(۲)روایت از شهید ثالث
(زنجان:سال۵۱،ماه محرم/اجرای برنامه طشت گذاری۶۹زینبیّه)
.
#ورود_محرم
#ورود_کربلا
#قتلگاه
#گینه_دلیمده_منیم_ناله_و_نوا_گورونور
#عینی_فرد
#ترکی
.
✍️ #زبدةالاشعار ✍️
?: @nohe_torki
نظر دهید