یاحسین آیت حُسنون ایکی دنیایه دیر #حسینیه_شبخیز

یا حسین …
.
.
مرحوم عباس شبخیز قراملکی تبریزی
.
.
یاحسین آیت حُسنون ایکی دنیایه دَیَر
نظر مرحمتون جنت الاعلایه دَیَر
.
دولت عشقیوی دنیایه ساتانلار نه بیلور
عشقیوین دولتی مین دولت دنیایه دَیَر
.
ای شهادت باغینون سرو چمن آراسی
قامتون سایه سی مین سایۀ طوبایه دَیَر
.
شمع حُسنونله ایشیقلاندی شبستان ولا
جلوۀ شمع رخون، مین گونه، مین آیه دَیَر
.
عشقدن سجده ایدر درگهیوه روح و ملک
آستان حرمین، گُنبد مینایه دَیَر
.
قبریوین نوری کلیم اللّهی مبهوت ایلر
کربلا، شأنیده مین سینۀ سینایه دَیَر
.
ای اولان حُسنینه مین یوسف کنعان مفتون
مصرعین، مصر ندور؟ عرش معلایه دَیَر
.
نیلورم زاهدین اولسون مئی گلفام بهشت
وصلووین باده سی جنّتده کی صهبایه دَیَر
.
قاپووین سائلی نین شأن و جلال و شرفی
دولت قیصر و اسکندر و دارایه دَیَر
.
اوغلوون معجز شقّ القمری فرقنده
عالم عشقده مین معجز عیسایه دَیَر
.
هاشمی خال یوزونده، ایکی دنیانی آلار
زلفونون بیر تلی دنیائیله عقبایه دَیَر
.
سو کنارینده یاتان قارداشیوین بیر جوت الی
وقعۀ حشرده مین لر ید بیضایه دَیَر
.
آلتی آیلیق بالاکی سینه وین اوستونده یاتوب
پایه سی پایه ده مین پایۀ موسایه دَیَر
.
درگهونده قوجا دربانیوین آرامگهی
شأنده قدس داکی مسجدالاقصایه دَیَر
.
او شهیدلر که یولوندا سنون ایثار ایلیوب
هر بیری عشقده مین عاشق شیدایه دَیَر
.
شیعه نین واردی سنون تک ایکی دنیا آقاسی
که اونون رحمت و لطفی هامی مولایه دَیَر
.
عالم عشقده  #شبخیز ، حسینون عشقی
عاقل اول، درک ایله هر عشق و تمنایه دَیَر
.
.
#حسینیه_مدح
#یاحسین_آیت_حسنون_ایکی_دنیایه_دیر
#شبخیز
#ترکی #زبدةالاشعار
.