یانور پروانه تک دل شمع آه پر شرارتدن #مجلس_یزید_هوشی_تبریزی

مجلس یزید
.
.
.
مرحوم هوشی تبریزی
.
.
یانورپروانه تک دل شمع آه پر شرارتدن
سالور اود جانه شوریله دمادم بیرحکایتدن
.
ایدورمعمورۀ صبری سرشگ چشمیله ویران
ویره سیلابه دنیانی یری وار اشگ حسرتدن
.
سپهر اطلسه غمدن چیخار آه شرر باری
ویرار اود عالمه هر دم بوسوز نارمحنتدن
.
گزردیوانه تک صحرای غمده اضطرابیله
اوزون ایلر اسیر بند مِحنت بیر اسارتدن
.
یزید بیحیا تک شه گوروب نه دیدۀ دنیا
نه بیرشوم وستم پرور بوشاه پست فطرتدن
.
نچکدی بیلمورم یارب اوگونده آل پیغمبر
اولاندا وارد بزم یزید شوم عداوتدن
.
اورک داغلی قولی ببباغلی یوزه گوز یاشلاری جاری
چو مرغ پرشکسته جمله پیکان شماتتدنjتدن
.
اوتور موشدی یزید بیحیا تخت ریاستده
قباقینده حسین باشی قویولموشدی قساوتدن
.
اگرچه ابرخون اولموشدی مه رخسارینه پرده
گینه ایتموشدی روشن مجلسی نورهدایتدن
.
دوزولموش ال ال اوسته بیرطرف زرین کمربندان
اوتورموش ایلچیلر بیرسمتده هربیر ولایتدن
.
اولوب حاضر اومجلسده شراب ناب بیریاندا
ایدوب چنگیلر آهنگ نوا بیر ایله حالتدن
.
بساط عیشی تاگوردی یزید شوم آماده
ایدوبدور استفاده ایله موقعده بوفرصتدن
.
اوتانموب اول زنازاده حضور حُجّت اللهده
شراب ناب ایچوب سرمست اولوب جام جهالتدن
.
گهی گُلدی گهی ایلچیلره فخرایتدی اول ظالم
گهی نرد اوینویوب شرم اتمیوب شاه ولایتدن
.
بیر اوزگه فکره دوشدی زادۀ هند جگر خواره
سالوبدور سر بسر آفاقه اود نار شقاوتدن
.
غروریله آچوب دل طعنیه ظلمیله دوندردی
گینه قانه دل آل اللهی طعن و شماتتدن
.
گوروبدورچون بواوضاعی سرسلطان مظلومان
کسولسون آز قالوب صبر و قرار اول کان غیرتدن
.
ایدوبدور موج بحر غیرت اللهی گلوب جوشه
اوقومی ایستدی آگه ایده اصل حقیقتدن
.
حجازی لحنیله باشلوب تلاوت ایلدی قرآن
دگوبدور بیربیره مجلس بولحن و بوتلاوتدن
.
ایله بیرشور و هنگامه اومجلسده اولوب برپا
گورن سویلردی اول مجلس علامتدورقیامتدن
.
اوقدری چکمدی سسلر باتوب مجلس اولوب آرام
کسلدی های هو و شور و هنگامه جماعتدن
.
دونوب سویلردی اما بیربیره آهسته آهسته
کیمون بوباشیدور غوغا سالوب بزمه فصاحتدن
.
پیمبر دور و یا اینکه پیمبر زاده دور بوباش
و یا کیم بیرعلامت دور حق قهاره قدرتدن
.
بونه اوضاع دورآخرکسلمش باش اوخور قرآن
بیرحکمت وار بوباش خالی دگل عالمده حکمتدن
.
بو احوالی گورنده زادۀ سفیان بی ایمان
اوجام کفر سرمستی آیلموب خواب غفلتدن
.
بولوردی چون اوزون ناحق حسینی حُجّت برحق
سالارحق نا حقی آخرگوروب تخت ریاستدن
.
مبادا فاش اولا مطلب اوبی دینی ایده رسوا
اودور ال چکمدی اول بیحیا جور وجنایتدن
.
اله غیضیله اول بیرحم چوب خیزران آلدی
گتوردی نالیه کون و مکانی بو جسارتدن
.
جسارت ایلیرم عرض ایلییم یا حجت الرحمن
اوزوندن ایستیرم رخصت بو شرح حال مِحنتدن
.
ایدنده آشنا اوّل او باشین دُرّ دندانی
سنوب دولدوردی آغزین قانیله اوّل کی ضربتدن
.
باخوردی قیزلاری اول بزمده خاصه بی بون زینب
قرار و صبرآلوب ظلمی اوبانوی جلالتدن
.
دله گلدی بویوردی ساخلا بیر ظالم الین ساخلا
گوتور ال ای زنازاده بوجور و بو اهانتدن
.
قوناقه احترام ایلّله شرعا ای جفا کانی
خجالت چک کناره چیخما قانون شریعتدن
.
اوباشی که ویرورسان زینت آغوش طاهادور
حیا ایت حقّیدن ظالم اوتان ختم رسالتدن
.
اوباشی که ویرورسان بسلیوب دورسینه ده زهرا
همیشه جان دیوب جان تک باسوب آغوشه رأفتدن
.
او باشی که ویرورسان جبرئیل اولمش بونا دایه
اونا گلمش بوخدمت امری درگاه جلالتدن
.
اوباشی که ویرورسان گلشن زهراده بیر گل دور
گل زهرانی سالما بو جفائیله طراوتدن
.
اوباشی که ویرورسان قان آخورتشنه دوداقیندن
اون ایکی یاره سی وارضربت قوم ضلالتدن
.
علاوه یولدا بیرسنگ جفا دگمش همین باشه
هله قانی کسلموب دورهمین زخم وجراحتدن
.
.
بوباشی که ویرورسان زینت اولمش عرشه اعلایه
تاپوپ عرش برین فیض شرافت بو شرافتدن
.
قوتاربومطلبی #هوشی مطول ایتمه مضمونی
الینده اود دوتار خامه همین طرز کتابدن
.
ولیکن دائما اولسون بوشهدن چشم امیدین
خدا قورتارسون عالمده سنی ضیق معیشتدن
.
حسینیلیق الونده منصب شاهانه دورشکرایت
سنی عالمده برخوردار ایدوب دورحق بو نعمتدن
.
.
.
#مجلس_یزید
#یانور_پروانه_تک_دل_شمع_آه_پر_شرارتدن
#هوشی_تبریزی
#ترکی
#زبدةالاشعار