حماسه عاشورا وقایع سید الشهداء
#حسین_کیمدی
.
.
علومی تبریزی
.
.
گنه گلدی محرم اولدی عاشورا حسین کیمدی
اوجالدی تکیه لردن آه و واویلا حسین کیمدی
.
.
گینه سسلر اوجالدی یاده دوشدی غصه لر غملر
مرتب اولدی مجلس لر قورولدی بزم ماتم لر
گینه ذکر مصیبت تازه لندی چخدی پرچم لر
تلاطم ایلوری عشاق چون دریا حسین کیمدی
.
.
سیه پوش اولدی امت اوج ایدور فریاد وا عطشان
گچوللر هر طرفدن دسته دسته دسته لرگریان
هامو آسایشندن ال چکوبدی واله و حیران
هامو یرده عزاخانه اولوب برپا حسین کیمدی
.
.
قیامتدور مگر دریای خلقتده نه طوفاندی
ویروللر سس سسه هر بیر طرف فریاد و افغاندی
گلور معناده بیر سس عرشدن عالم پریشاندی
بیله معلوم حسینیم وای دیر زهرا حسین کیمدی
.
.
حسین بن علیدی بو ایدوب اسلامه بیر خدمت
آچوب دنیاده بیر مکتب ویروبدی درس حرّیت
هر ایل ایام عاشورا ده بو حاله دوشر امت
اولار که بیلمیه بیر اهل دل آیا حسین کیمدی
.
.
اگر صدقیله اولسان بزم ماتمده عزاداری
دل پاکیله ایتسن بوعزاده گوز یاشین جاری
قسم اللهه وارگوز یاشوین یاخشی خریداری
ویرر قیمت بیلور چون خالق یکتا حسین کیمدی
.
.
گچوم قوی مطلبه اطرافیمه آماده لر گلسون
عزادار اولماقا دورسون هامو افتاده لر گلسون
حسین آزاده لر سلطانیدور آزاده لرگلسون
مین اوچ یوز ایلدن آرتوخدی تانور دنیا حسین کیمدی
.
.
جهاندا چوخ مسلمانه تاپوب ال کافر ئولدوردی
بو عادی بیر تعارضدی امیری نوکر اولدوردی
او گون اما حسینی امت پیغمبر اولدوردی
نه امت بیلمدی آئینۀ طاها حسین کیمدی
.
.
او چولده آل طاهایه آخار بیر سو حرام اولدی
سوسوز یار و هواداری حسینون قتل عام اولدی
ایدن آللهیله هر عهد و پیمانی تمام اولدی
اولوب سنگرنشینی زینب کبرا حسین کیمدی
.
.
حسین جان ملت اسلامه سن تک شهریار اولماز
سنه قربان سنه هر کیم رعیت اولسا خوار اولماز
غمینده سیّدی هانسی اورک آرام اولار اولماز
دگل بیهوده باشلاردا اولان سودا حسین کیمدی
.
.
او چولده گچدی جاندان باوفا اصحابی سرتاسر
حبیب و مسلم و عون و بریر و عابس و جعفر
او وقت اولدی که باتدی قانه اکبر آدلی پیغمبر
اوغول داغی چکوبدی قلبینه اعدا حسین کیمدی
.
.
او قاسم که دیولّر مجتبانین یادگاریدی
ولایت باغینین دائم خزانسیز بیر بهاریدی
او دا شهزاده اکبر تک حسینون جان نثاریدی
شهادت نامیه قویدی اودا امضا حسین کیمدی
.
.
مقاتلده یانقلی بیر خبر وار شرحه معذورم
دیمزدیم چون محرّمدی دیماخ لازمدی مأمورم
ولیک پرده لی قوی رد اولوم اظهاره مجبورم
تصوّر ایت یخلدی بیر نفر تنها حسین کیمدی
.
.
یازولار حرمله اوچ اوخ گتوردی دشت هیجایه
چکوب زهرانی اوچ دفعه او صحرای غم افزایه
بیرین ویردی او بی ایمان جبین پاک سقایه
دوشوب دلدن یارالی تشنه لب سقا حسین کیمدی
.
.
حسینون اوندا که قالموردی بیر کس یار و جانبازی
گلوب میدانه اما الده بیر ششماهه سربازی
ایکمجی اوخ گلوب وصل ایلدی پایانه آغازی
نه سنگین بیر وظیفه ایلیوب ایفا حسین کیمدی
.
.
او قلبیکه اونا عالمده عالم قلبی بسته ایدی
اوغول داغی چکلمشدی همان قلبه شکسته ایدی
اوچومجی اوخ گلوب یخدی آت اوستن بسکه خسته ایدی
ملائک شوره گلدی باشلادی غوغا حسین کیمدی
.
.
نمازه باشلینده اقتدایه مصطفی گلدی
مرتب اولدی صفلر الده قرآن مرتضی گلدی
قویاندا سجدیه باش قهرمان کربلا گلدی
او حالی کشف ایده بیر دلده یوخ یارا حسین کیمدی
.
.
حسینی ئولدورور گوردی عراق اهلی حجاز اوسته
حسین محو جمال یاریدی راز و نیاز اوسته
دعا ایلور عزادار امتی بیر بیر نماز اوسته
قالوب حیران دیور هر عاشق شیدا حسین کیمدی
.
.
«علومی» بو سوزون ناقص قالوب یتمزدی اتمامه
«جواد پیله ور» اولدی سبب قورتولدی بو نامه
او دور مداح زهرا خدمتی محکمدی اسلامه
سالار هنگامه مجلسده دینده تا حسین کیمدی
.
.
.
#ورود_محرم #علومی_تبریزی
#حسینیه #حسینیه_شهادت #حسینیه_علومی_تبریزی
#گنه_گلدی_محرم_اولدی_عاشورا_حسین_کیمدی
#ترکی
#زبدةالاشعار
نظر دهید